ជីវភាពប្រជាសហគមន៍ត្រពាំងសង្កែ ស្ថិតក្នុងឃុំត្រពាំងសង្កែ ស្រុកទឹកឈូ ខេត្តកំពត មានភាពប្រសើរជាងមុន បន្ទាប់ពីបានបង្កើតសហគមន៍នេសាទ កាលពីឆ្នាំ ២០០៩ មក។ ក៏ប៉ុន្តែពួកគាត់ព្រួយបារម្ភខ្លាចក្រុមហ៊ុន ឯកជនរំលោភយកតំបន់សហគមន៍គ្រប់គ្រងនោះទៅអភិវឌ្ឍន៍អ្វីផ្សេង ធ្វើឲ្យបាត់បង់ឱកាសដែលពួកគាត់កសាងបានដ៏ល្អនេះវិញទៅអនាគត។
រាល់ពេលរសៀល ប្រជាសហគមន៍ត្រពាំងសង្កែ រួមទាំងអ្នកនេសាទនានា ក្រៅសហគមន៍ ប្រមាណ ៣ រយនាក់ ជួបជុំគ្នានៅសហគមន៍ រៀបចំឧបករណ៍នេសាទរៀងខ្លួន មុនចុះទូកចេញទៅនេសាទនៅពេលយប់។
ពួកគាត់ម្នាក់ៗ សុទ្ធតែប្រើឧបករណ៍នេសាទបូរាណ ឬឧបករណ៍នេសាទជាលក្ខណៈគ្រួសារ ដូចជាឈិប សំណាញ់ សន្ទូចជាដើម។ ពួកគាត់ថា មូលហេតុដែលប្រើឧបករណ៍ទាំងនេះ គឺដើម្បីរក្សាធនធានជលផលសមុទ្រក្នុងដែនសហគមន៍គាត់ឲ្យនៅគង់វង្ស សម្រាប់ចិញ្ចឹមកូនចៅទៅអនាគត។
នៅទីធ្លាដីមួយឡូត៍មួយកន្លែង របស់សហគមន៍ មានអ្នកនេសាទប្រមាណជាង ១០០ នាក់ ខ្លះរៀបចំ វេចខ្ចប់បាយទឹក ខ្លះរៀបចំបទឈិបសម្រាប់លីចុះទូកទៅនេសាទ។
ពួកគាត់ម្នាក់ៗ និយាយថាផលនេសាទសហគមន៍ឆ្នាំនេះកើនឡើងទ្វេដង ប្រៀបធៀបទៅប៉ុន្មានឆ្នាំមុនដែលមិនទាន់បង្កើតសហគមន៍។
អ្នកនេសាទ ជី វូហេង នៅសហគមន៍ភូមិត្រពាំងសង្កែ កំពុងរៀបចំបទឈិបជាមួយអ្នកនេសាទជាច្រើននាក់ទៀត បញ្ជាក់អំពីប្រាក់ចំណូលដែលគាត់រកបានគេពីការនេសាទ ដោយប្រើឧបករណ៍ អូសឈិប ក្នុងមួយយប់ៗ ថាបានច្រើនជាងកាលពីមិនទាន់បង្កើតសហគមន៍ កាលពី៥ ឆ្នាំមុន៖សំឡេង។
រីឯលោក ឈិន ធី និងអ្នកនេសាទដែលកំពុងរៀបចំឧបករណ៍ឈិប នៅក្បែរគ្នានោះ ក៏អះអាងប្រហាក់ប្រហែលគ្នាដែរ៖ សំឡេង។
សហគមន៍ត្រពាំងសង្កែ មានដែននេសាទ ៣៣៧ ហិកតា ក្នុងនោះមានដីព្រៃលិចទឹក ឬដីព្រៃកោងកាងទំហំប្រហែល៥០ ហិកតារ ជាជម្រកជីវចម្រុះដែលមានព្រែកឬដៃសមុទ្រហូរកាត់។
ប្រធានសហគមន៍ត្រពាំងសង្កែ លោក ស៊ឹម ហ៊ីម ឲ្យដឹងថា ទម្រាំបានបង្កើតជាសហគមន៍ រក្សាជលផលបានដូច្នេះ គាត់ជួបបញ្ហាច្រើនណាស់ ដូចជាប្រឈមនឹងការបង្ក្រាប ទប់ស្កាត់បទល្មើសនេសាទ កិច្ចប្រឹងប្រែងអប់រំប្រជាពលរដ្ឋឲ្យយល់ដឹងអំពីគ្រោះថ្នាក់បទល្មើសនេសាទ និងផលប្រយោជន៍នៃការដាំព្រៃកោងកាងឡើងវិញ រួមទាំងផលប្រយោជន៍នៃការនេសាទប្រើឧបករណ៍នេសាទជាលក្ខណៈគ្រួសារជាដើម៖ សំឡេង។
លោកបន្តថាសហគមន៍របស់លោកមានសមាជិក ៣ ភូមិមានចំនួន ១, ០៩៥ គ្រួសារ ក្នុង៩០ ភាគរយប្រកបរបរនេសាទ ក៏ប៉ុន្តែ មានអ្នកនេសាទមកពីឃុំចំនួន ៤ ទៀត ក៏អាស្រ័យផលនៅតំបន់សហគមន៍នេះដែរ។ ឃុំទាំងនោះមាន ឃុំត្រពាំងសង្កែ ឃុំកូនសត្វ ឃុំត្រពាំងព្រីង ឃុំកំពង់សំរោង៖ សំឡេង។
លោកថាសហគមន៍នេះ ផ្ដល់ផលប្រយោជន៍ឲ្យប្រជាពលរដ្ឋនៅក្នុងតំបន់បានច្រើនក្រៅពីផ្ដល់ប្រាក់ចំណូលប្រចាំថ្ងៃ ដូចជាជួយទប់ស្កាត់ការចំណាកស្រុក ការពារនិងដាំព្រៃលិចទឹកឡើងវិញ បង្កើតបរិស្ថានល្អនៅក្នុងសហគមន៍ទៀតផង។
ទោះបីជាមានមោទនភាពយ៉ាងនេះ លោក ស៊ឹម ហ៊ីម បានបង្ហើបឲ្យដឹងថា ប្រជាសហគមន៍មានការព្រួយបារម្ភខ្លាច ក្រែងរដ្ឋាភិបាលយកតំបន់សហគមន៍របស់លោក ដែលកំពុងទទួលផលបានសុខសាន្តសព្វថ្ងៃនេះ ទៅអភិវឌ្ឍន៍ធ្វើអ្វីផ្សេងទៀត នាំឲ្យពួកគាត់បាត់បង់ឱកាសទៅអនាគត៖ សំឡេង។
ការព្រួយបារម្ភនេះ បន្ទាប់ពីសហគមន៍ត្រពាំងសង្កែឮដំណឹងថា មានក្រុមហ៊ុនឯកជនមួយ ដែលមិនមានឈ្មោះពិតប្រាកដ បានកាប់បំផ្លាញព្រៃកោងកាង និងកាយដីបាទសមុទ្រធ្វើជាព្រែក នៅតំបន់ក្បែរនោះ ដើម្បីអភិវឌ្ឍន៍កំពង់ផែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។