ពលរដ្ឋនៅក្នុងឃុំសំរោង ស្រុកសំរោង ខេត្តតាកែវ រិះគន់ការស្ថាបនាផ្លូវមួយខ្សែនៅក្នុងឃុំ ថាមិនមានគុណភាពដែលអាចធានាការដឹកជញ្ជូនធ្ងន់បានទេ ប៉ុន្តែប្រធានក្រុមហ៊ុនដែលកសាងផ្លូវ បំភ្លឺថា បានកសាងផ្លូវតាមតែគម្រោងបានដាក់ឲ្យដេញថ្លៃប៉ុណ្ណោះ។
ផ្លូវកសាងរួចប្រវែងជាង ២គីឡូម៉ែត្រ ចំណាយថវិកាកសាងជាង ៦២លានរៀល របស់មូលនិធិឃុំសំរោង ស្រុកសំរោង ក្នុងខេត្តតាកែវ ត្រូវបានប្រជាពលរដ្ឋតាមភូមិខ្លះរិះគន់ថា កសាងមិនធានាដល់ការដឹកជញ្ជូនបានយូរអង្វែងទេ។ ការរិះគន់នេះ បានធ្វើឡើងក្រោយពីអ្នកភូមិ និងអាជ្ញាធរខ្លះ ពិនិត្យឃើញថា ផ្លូវនោះមិនបានចាក់ដីបំពេញតាមកិច្ចសន្យា បែរជាកាយដីស្រែយកទៅទប់ជើងទេរ។
ពលរដ្ឋភូមិតាពោនខាងកើត មិនបញ្ចេញឈ្មោះ ឲ្យដឹងថា ដីស្រែគាត់ត្រូវក្រុមហ៊ុនកសាងផ្លូវកាយយកទៅទប់ជើងទេរមិនមានសំណង។ លោកបន្តថា តាមកិច្ចសន្យាកសាង គឺក្រុមហ៊ុនត្រូវរកដីយកមកចាក់បំពេញផ្លូវ មិនត្រូវកាយដីស្រែអ្នកស្រុកយកទៅកសាងទេ៖ «គុណភាពផ្លូវហ្នឹងវាមិនទាន់បានគ្រប់ពេញលេញតាមស្តង់ដាររបស់វាទេ។ បើអ៊ីចឹង ប្រជាពលរដ្ឋទាំងអស់គេប្រតិកម្មដែរហ្នឹង គេមិនទាន់ទទួលយកជាផ្លូវការ»។
មេភូមិតាពោនខាងលិចវិញ លោក នូ ផន ឲ្យដឹងថា ផ្លូវកាត់ភូមិនោះមានតែ ១០០ម៉ែត្រទេ សំណង់ផ្លូវអាចប្រើប្រាស់បាន ៥ឆ្នាំ។ លោកថា ពិតជាមានកាយដីស្រែអ្នកស្រុកខ្លះបំពេញជើងទេរផ្លូវមែន៖ «ព្រោះអីកន្លែងដែលគេកាយដីរបស់ប្រជាជនហ្នឹង ក្រុមហ៊ុនហ្នឹងក៏គេកំពុងតែលុបឲ្យវិញហើយ វាមិនបានស្មើដើមទេ ក៏ប៉ុន្តែវាប្រហាក់ប្រហែល និងអាចធ្វើស្រែកើត»។
បំភ្លឺចំពោះការចោទនោះ ប្រធានក្រុមហ៊ុន ហ៊ន ភាន់ត្រៃ ឲ្យដឹងថា អាជ្ញាធរឃុំ និងគណៈកម្មការវត្តអង្គលង្គញ់ បានសុំឲ្យក្រុមហ៊ុនពង្រីកផ្លូវពីថ្នល់ជាតិលេខ២ ទៅកាន់ផ្លូវវត្តនោះឲ្យបានបាតក្រោមផ្លូវដល់ទៅ ៧ម៉ែត្រ ដែលក្នុងគម្រោងឲ្យកសាងតែ ៦ម៉ែត្រ ទើបក្រុមហ៊ុនកាយដីស្រែដែលមានស្មៅបំពេញជើងទេ។ លោកថា បើអាជ្ញាធរមូលដ្ឋានមិនអនុញ្ញាតឲ្យក្រុមហ៊ុនកាយដីស្រែក្បែរនោះបំពេញជើងទេរទេ ក៏ក្រុមហ៊ុនមិនហ៊ានធ្វើដែរ៖ «យើងខ្ញុំធ្វើតែតាមប្លង់ តាមខ្នាតរបស់ខ្ញុំទេ ព្រោះអាហ្នឹងយើងកាយនេះ កាយមិនមែនជាកាយយកមកចាក់លើខ្នងទេ កាយតម្រឹមជើងទេរហ្នឹង ឲ្យវាស្មើ ព្រោះអាជើងទេរចាស់ហ្នឹងវាមានតូចមានធំ»។
ជំទប់ទី១ ឃុំសំរោង លោក សិន វិបុល អះអាងថា ការកសាងផ្លូវលំនោះអស់ប្រាក់ជាង ៦២លានរៀល ជាថវិកាមូលនិធិឃុំឆ្នាំ២០១៤។ លោកថា ក្រុមហ៊ុន ហ៊ន ភាន់ត្រៃ បានកសាងផ្លូវមិនអាចធានាដល់ការដឹកជញ្ជូនធ្ងន់បានយូរឆ្នាំទេ។ បញ្ហានេះ មានពលរដ្ឋខ្លះបានចោទថា អាជ្ញាធរឃុំបានឃុបឃិតជាមួយក្រុមហ៊ុនកសាងផ្លូវ ទើបផ្លូវគ្មានគុណភាព៖ «នីតិវិធីក្រុមហ៊ុនធ្វើ គឺអត់បានដឹកដីចាក់ទេ តែក្រុមហ៊ុនកកាយដីស្រែប្រជាពលរដ្ឋយកមកទប់ ដំឡើងធ្វើជាតួផ្លូវ និងចាក់ដីខ្សាច់ឈូសឆាយយកតែម្តង។ ការដែលធ្វើអ៊ីចឹង គឺក្រុមហ៊ុនមានភាពចំណេញច្រើន»។
ដូចគ្នាដែរ មេឃុំសំរោង លោក សុខ សេង ពន្យល់ថា ផ្លូវលំនោះដាក់ឲ្យដេញថ្លៃកសាង គឺដំបូង ៩៣០ម៉ែត្រ គឺចំណាយទឹកប្រាក់អស់ជាង ២៩លានរៀល។ នៅពេលសល់ទឹកប្រាក់ អាជ្ញាធរឃុំដាក់ដេញថ្លៃជាង ១ពាន់ម៉ែត្របន្តទៀត សរុបចម្ងាយផ្លូវកសាង ២.០១៧ម៉ែត្រ។ លោកថា ធម្មតាផ្លូវលំរដ្ឋកំណត់ធានាការប្រើប្រាស់ ៥ឆ្នាំទេ វាមិនអាចត្រូវតាមស្តង់ដារដែលចំណាយថវិកាច្រើនទេ៖ «គំនូសប្លង់ហ្នឹងមិនបានត្រូវកាយទប់ជើងទេរទេ ព្រោះផ្លូវយើងចាស់ធ្លាប់ធ្វើម្តងហើយ ដាក់ក្រួសសហ្នឹង ឬខ្សាច់សហ្នឹងពីលើតែម្តង ប៉ុន្តែដោយថាយើងចង់បានផ្លូវហ្នឹងឲ្យវាធំបន្តិច សុំឲ្យគេជួយត្រាសសេអាខាងៗបន្តិចៗជួយទប់ជើងទេរផង ឲ្យបានផ្លូវហ្នឹងមើលទៅធំ»។
ផ្លូវលំដែលពលរដ្ឋឃុំសំរោង រិះគន់ថាគ្មានគុណភាពនេះ កសាងដោយក្រុមហ៊ុន ហ៊ន ភាន់ត្រៃ មានបណ្តោយ ២០១៧ម៉ែត្រ បាតក្រោម ៦ម៉ែត្រ ខ្នងលើ ៤ម៉ែត្រ កសាងពីវត្តអង្គលង្គញ់ ទៅដល់ភូមិតាពោនខាងលិច កាត់តាមភូមិស្វាយ ភូមិតាពោនខាងកើត និងភូមិតាពោនខាងលិច។ ផ្លូវនោះបានបើកឲ្យដំណើរការកាលពីថ្ងៃទី៣០ ខែមិថុនា ឆ្នាំ២០១៥ កន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។