ប្រជាពលរដ្ឋ និងអង្គការសង្គមស៊ីវិលមួយចំនួន បានរំពឹងថា អភិបាលខេត្តថ្មីដែលជាកូនចៅអ្នកសៀមរាប នឹងប្រឹងប្រែងធ្វើការងារសេសសល់ជាច្រើនពីអភិបាលខេត្តជំនាន់មុនៗឱ្យបានប្រសើរ ដើម្បីឱ្យសក្ដិសមនឹងកេរ្តិ៍ជាម្ចាស់ស្រុក។
លោក ស៊ូ ភិរិន្ទ បានបញ្ចប់តួនាទីពីអភិបាលខេត្តសៀមរាប ហើយកាលពីថ្ងៃទី២៩ ខែមេសា កន្លងទៅ ដោយសារតែរូបលោកដល់វ័យចូលនិវត្តន៍ បន្ទាប់ពីរូបលោកបានគ្រប់គ្រងតំណែងជាអភិបាលនៃខេត្តនេះប្រហែល ៧ឆ្នាំមក។
ពិធីផ្ទេរតំណែងអភិបាលខេត្តថ្មី បានប្រគល់ឱ្យឧត្តមសេនីយ៍យោធាម្នាក់ គឺលោក ឃឹម ប៊ុនសុង ជាមេបញ្ជាការកងយោធពលខេមរភូមិន្ទនៃតំបន់ប្រតិបត្តិការសឹកប្រចាំខេត្តនេះ។
«ចម្រៀងជូនពរ»
លោក ស៊ូ ភិរិន្ទ ជាអតីតអភិបាលខេត្តសៀមរាប ដែលផុតអាណត្តិទៅ បានមានប្រសាសន៍ប្រាប់អ្នកជំនួសតំណែងថា មានការងារសង្គមជាច្រើនដែលអភិបាលខេត្តថ្មីត្រូវធ្វើបន្តពីរូបលោក ដើម្បីអភិវឌ្ឍទីក្រុង និងធ្វើឱ្យជីវភាពរស់នៅរបស់ប្រជាពលរដ្ឋកាន់តែប្រសើរ។
ការងារទាំងនោះ ដូចជាការបង្កើនបរិមាណទឹកស្អាត និងការបង្កើនថាមពលអគ្គិសនីឱ្យកាន់តែច្រើនឡើង ដោយសារតែបច្ចុប្បន្ន បញ្ហាទាំងនេះមិនទាន់អាចឆ្លើយតបតាមតម្រូវការប្រើប្រាស់ និងកសិករមិនទាន់មានផលិតកសិផលបានគ្រប់គ្រាន់តាមតម្រូវការទីផ្សារជាដើម៖ «ចំណាកស្រុករបស់ប្រជាជនខុសច្បាប់ បង្កឱ្យខ្វះកម្លាំងពលកម្មក្នុងខេត្ត និងសុវត្ថិភាពផ្ទាល់ខ្លួនរបស់យើងនៅទូទាំងខេត្ត។ ស្រុកអង្គរជុំ មួយ គ្រាន់តែយើងសង្កេតមើល គឺ ១ម៉ឺននាក់ ស្រុកថៃ ដល់ម៉ោងហ្នឹង ៧ពាន់នាក់ នៅស្រុកផ្សេងៗក៏មានខ្លះដែរ។ នេះជាកង្វល់របស់យើង។ ភាពក្រីក្ររបស់ប្រជាពលរដ្ឋ ជាក្ដីកង្វល់របស់អាជ្ញាធរមូលដ្ឋាន ដូច្នេះមូលដ្ឋានគ្រប់លំដាប់ថ្នាក់ត្រូវបន្តកិច្ចខិតខំប្រឹងប្រែងយ៉ាងខ្លាំងក្លាថែមទៀត។ ដីសម្បទានសង្គមកិច្ច ត្រូវផ្ដល់ឱ្យយោធិនពិការ គ្រួសារយោធិន និងប្រជាពលរដ្ឋ។ យើងនៅធ្វើបន្តទៅទៀត ដូច៣១៧ និងការប្រគល់ដីរបស់យើងនៅឃុំកំពង់ភ្លុក និងបញ្ហាផ្សេងៗទៀតនៅស្រុកវ៉ារិន ជាដើម»។
ប្រជាពលរដ្ឋមួយចំនួនបានឱ្យដឹងថា ខេត្តសៀមរាប បច្ចុប្បន្ន ក្រៅតែពីដូចការរៀបរាប់របស់អតីតអភិបាលខេត្តនេះ គឺការអភិវឌ្ឍហេដ្ឋារចនាសម្ព័ន្ធជាច្រើនទៀត ដូចជាផ្លូវថ្នល់ដែលខូចខាតក្នុងទីក្រុង ត្រូវធ្វើឱ្យល្អស្អាតឡើងវិញ ការធ្វើប្រព័ន្ធបង្ហូរទឹកក្រខ្វក់ និងការពារទឹកជំនន់ ព្រមទាំងសណ្ដាប់ធ្នាប់ចរាចរណ៍នៅក្នុងទីក្រុងជាដើម គឺអភិបាលខេត្តថ្មីត្រូវធ្វើបន្ត។
ក្រុមប្រជាពលរដ្ឋខ្លះបានសម្ដែងការស្វាគមន៍ចំពោះវត្តមានអភិបាលខេត្តថ្មី ហើយទន្ទឹមនឹងការស្វាគមន៍នេះ គេចង់ឱ្យអភិបាលខេត្តថ្មីជួយដោះស្រាយបញ្ហាដែលអភិបាលខេត្តចាស់នៅមិនទាន់បានដោះស្រាយនៅឡើយដែរ។
ស្ត្រីអ្នកភូមិបន្ទាយស្រី ស្រុកបន្ទាយស្រី ម្នាក់ឈ្មោះ នាង ឃុននី បានមានប្រសាសន៍ថា គ្រួសាររបស់គាត់ត្រូវក្រុមអាជ្ញាធរអប្សរារុះរើទីលំនៅកាលពី ២ឆ្នាំមុន។ បញ្ហានេះនៅមិនទាន់បានដោះស្រាយយ៉ាងណានៅឡើយទេ ហើយអ្នកស្រីចង់ឱ្យអភិបាលខេត្តថ្មីជួយដោះស្រាយរឿងនោះ៖ «ខ្ញុំសង្ឃឹមថា អភិបាលខេត្តដែលឡើងមកកាន់ខេត្តសៀមរាប ថ្មី មានដំណោះស្រាយប្រជាពលរដ្ឋឱ្យសមរម្យ ដែលអាចទទួលយកបាន ឬមួយដំណោះស្រាយជាមួយក្រុមអាជ្ញាធរអប្សរា»។
ជាមួយគ្នានេះ ក្រុមអង្គការក្រៅរដ្ឋាភិបាលមួយចំនួនដែលកំពុងធ្វើការក្នុងខេត្តសៀមរាប ក៏រំពឹងថា អភិបាលខេត្តថ្មីនឹងបន្តកិច្ចសហការការងារជាមួយគ្នាបានល្អថែមទៀត។
អ្នកស៊ើបអង្កេតរបស់ សមាគមអាដហុក (Adhoc) ការពារសិទ្ធិមនុស្ស ខេត្តសៀមរាប លោក សួស ណារិន បានមានប្រសាសន៍ថា ក្រុមបណ្ដាញការងាររបស់អង្គការក្រៅរដ្ឋាភិបាល នឹងរៀបចំពេលណាមួយដើម្បីចូលជួបសម្ដែងការគួរសមជាមួយអភិបាលខេត្តដែលទើបតែឡើងកាន់តំណែងថ្មី។ មន្ត្រីដដែលបានបញ្ជាក់ថា បន្ទាប់ពីអភិបាលខេត្តថ្មីឡើងកាន់តំណែងនេះ សមាគមការពារសិទ្ធិមនុស្សអាដហុក មានគម្រោងនឹងដាក់បញ្ហាទំនាស់ដីធ្លីខ្លះៗដែលមិនទាន់បានដោះស្រាយនៅឡើយ ឱ្យអភិបាលខេត្តថ្មីជួយដោះស្រាយបន្ត៖ «រឿងធំៗប្រហែលជា ៥ករណី ដែលយើងត្រូវដាក់ ដូចជានៅឃុំស្គន់ នៅភូមិតាពេន នៅភូមិវត្តដំណាក់ នៅចុងកៅស៊ូ និងនៅឃុំស្រែណូយ ជាដើម»។
ចំណែកអ្នកសម្របសម្រួល អង្គការសិទ្ធិមនុស្សលីកាដូ (Licadho) លោក នូ ពុទ្ធិ បានយល់ឃើញថា អភិបាលខេត្តថ្មីនឹងយកចិត្តទុកដាក់បន្តដោះស្រាយបញ្ហាមួយចំនួនដែលនៅសេសសល់ពីមុន៖ «សង្គមស៊ីវិលសង្ឃឹមថា ឯកឧត្តមថ្មីនឹងមានសម្មានចិត្តទូលំទូលាយធ្វើការដើម្បីសង្គមនៅក្នុងសហគមន៍ទូទាំងខេត្តសៀមរាប នេះ»។
អភិបាលខេត្តថ្មី លោក ឃឹម ប៊ុនសុង បានមានប្រសាសន៍ថា លោកមានសេចក្តីរីករាយ និងមានកិត្តិយសដ៏ខ្ពង់ខ្ពស់បំផុតដែលព្រះមហាក្សត្រ និងប្រមុខរាជរដ្ឋាភិបាលបានទុកចិត្ត និងប្រគល់តួនាទីឱ្យរូបលោកធ្វើជាអភិបាលខេត្តសៀមរាប។ លោកសង្ឃឹមថា តាមរយៈកិច្ចសហការជាមួយអភិបាលរងខេត្ត អភិបាលស្រុក និងមន្ទីរពាក់ព័ន្ធនានា ដើម្បីបំពេញការងាររដ្ឋាភិបាល គឺប្រាកដជានឹងមានការគាំទ្រចំពោះការដឹកនាំរបស់លោកកាន់តែខ្លាំងឡើងនៅពេលខាងមុខ៖ «ខិតខំឱ្យអស់កម្លាំងកាយចិត្ត ប្រាជ្ញាស្មារតី និងបំពេញការងារឱ្យបានទទួលជោគជ័យជូនជាតិមាតុភូមិ និងប្រជាជនប្រកបដោយការទទួលខុសត្រូវខ្ពស់។ ខិតខំរក្សាឱ្យបាននូវអព្យាក្រឹតភាពការងាររដ្ឋបាល សំដៅលើកកម្ពស់គុណភាពសេវាជូនប្រជាជនឱ្យកាន់តែល្អប្រសើរ»។
ប្រជាពលរដ្ឋខ្លះបានស្គាល់ថា លោកឧត្តមសេនីយ៍ទោ ឃឹម ប៊ុនសុង គឺមានស្រុកកំណើតនៅឃុំកំពង់ក្ដី ស្រុកជីក្រែង ចម្ងាយប្រមាណជាង ៦០គីឡូម៉ែត្រភាគខាងកើតពីទីក្រុងសៀមរាប។ លក្ខណៈសម្បត្តិរបស់អភិបាលខេត្តសៀមរាប ថ្មីនេះគឺដោយសារតែលោកជានាយទាហានជាង ២០ឆ្នាំក្នុងខេត្តនេះ អាចស្គាល់ភូមិសាស្ត្រជាច្រើនកន្លែងដែលនឹងត្រូវធ្វើគម្រោងអភិវឌ្ឍន៍ និងម្យ៉ាងទៀត រូបលោកគឺជាអ្នកមានស្រុកកំណើតនៅទីនេះ ជាលើកដំបូងដែលបានឡើងធ្វើចៅហ្វាយខេត្ត។ ដូច្នេះ លោកអាចនឹងខិតខំប្រឹងប្រែងធ្វើការជាច្រើនដើម្បីបន្សល់ទុកស្នាដៃ និងកេរ្តិ៍ឈ្មោះល្អជាប្រវត្តិសាស្ត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។