ប្រជាពលរដ្ឋដែលជាម្ចាស់យានយន្ត និងទោចក្រយានយន្តមួយចំនួន ដែលធ្វើដំណើរតាមផ្លូវជាតិលេខ៥ នៅខេត្តបាត់ដំបង រិះគន់ចំពោះសកម្មភាពត្រួតពិនិត្យរបស់មន្ត្រីពន្ធដារខេត្ត ថាបានរឹតបន្តឹងពន្ធយានយន្តហួសហេតុ។ ការថ្លែងដូចនេះ កើតមានបន្ទាប់ពីមន្ត្រីពន្ធដារ ចុះផាកពិន័យតាមផ្លូវថ្នល់នៅថ្ងៃទី៥ ខែកុម្ភៈ ឆ្នាំ២០១៥។
ម្ចាស់យានយន្តដែលធ្វើដំណើរតាមដងផ្លូវជាតិលេខ៥ នៅខេត្តបាត់ដំបង នោះ សម្ដែងការមិនពេញចិត្តទៅនឹងទង្វើរបស់សមត្ថកិច្ចពន្ធដារនេះ ថាជាសកម្មភាពមួយផាកពិន័យប្រជាពលរដ្ឋតាមអំពើចិត្ត ដោយគ្មានហេតុផល។
ក្រុមម្ចាស់យានយន្តថ្លែងប្រាប់បន្ទាប់ពីឈប់រថយន្តនៅចំណុចភូមិពពាលខែ ឃុំជ្រៃ ស្រុកថ្មគោល ខេត្តបាត់ដំបង នៅព្រឹកថ្ងៃទី៥ កុម្ភៈ ថា មន្ត្រីពន្ធដារផាកពិន័យនេះធ្វើឡើងហួសហេតុ គឺសមត្ថកិច្ចទារប្រាក់ពីម្ចាស់យានយន្តពី ១ម៉ឺន ទៅជាង មួយលានរៀល (១.២០០.០០០រៀល) ក្នុងរថយន្តមួយគ្រឿង បើទោះជារថយន្តមានច្បាប់គ្រប់គ្រាន់ហើយក៏ដោយ៖ «ខ្ញុំអត់មានខុសទេ ហើយខ្ញុំបើកឡានតាមផ្លូវមកដូចធម្មតា តែគេយកពីខ្ញុំអស់មួយម៉ឺនរៀលហើយ ដោយចោទថា ខ្ញុំបើកបរមិនពាក់ខ្សែក្រវាត់។ ប័ណ្ណបើកបរក៏មាន ប័ណ្ណបង់ពន្ធក៏មាន ដល់ពេលខ្ញុំសុំគេទៅ តែសមត្ថកិច្ចអត់ឲ្យឡានខ្ញុំទៅ ហើយគេឲ្យខ្ញុំទៅបង់ជាង ១លានរៀល»។
ឆ្លើយតបនឹងបញ្ហានេះ អនុប្រធានការិយាល័យរដ្ឋបាលពន្ធដារខេត្តបាត់ដំបង លោក មួន មូវ មានប្រសាសន៍បញ្ជាក់ថា ការចុះត្រួតពិនិត្យរថយន្តតាមដងផ្លូវនេះ ដើម្បីរឹតបន្តឹងដល់ម្ចាស់យានយន្ត និងទោចក្រយានយន្តដែលពុំទាន់បង់ពន្ធប្រចាំឆ្នាំ២០១៤ បំពេញកាតព្វកិច្ចបង់ពន្ធជូនរដ្ឋតាមច្បាប់ឲ្យបានគ្រប់គ្នា គឺពុំបានផាកពិន័យប្រជាពលរដ្ឋតាមអំពើចិត្តឡើយ៖ «ឡានដែលមានឯកសារ គឺពួកគាត់មិនកាក់គាត់ទេ ដោយឡែករថយន្តដែលចតខាងមុននេះ គឺគាត់អត់មានឯកសារអ្វីទាំងអស់ក្នុងការបង់ពន្ធឆ្នាំ២០១៤ នេះ។ អ៊ីចឹងការឆែកនេះ យើងអត់មានយកលុយយកកាក់អីពីបងប្អូនទេ គឺអ្វីដែលសំខាន់ ខ្ញុំត្រួតពិនិត្យលើមធ្យោបាយពន្ធរបស់ប៉ុណ្ណោះ»។
ទោះយ៉ាងនេះក្ដី មន្ត្រីស៊ើបអង្កេតអង្គការលីកាដូ (Licadho) ខេត្តបាត់ដំបង លោក ហេង សាយហុង មានប្រសាសន៍ថា សមត្ថកិច្ចរឹតបន្តឹងលើពន្ធយានយន្តតាមផ្លូវច្បាប់ គឺរឿងត្រឹមត្រូវ។ តែយ៉ាងណា លោកថា សកម្មភាពត្រួតពិនិត្យយានយន្តតាមដងផ្លូវនៅក្នុងខេត្តបាត់ដំបង កន្លងទៅ មន្ត្រីពាក់ព័ន្ធច្រើនអនុវត្តសួរដេញដោលហួសហេតុ ដើម្បីរកចំណុចដាក់បន្ទុកដល់ម្ចាស់យានយន្ត៖ «អារឿងសមត្ថកិច្ចចុះពិនិត្យរថយន្ត គឺមិនដែលពិនិត្យតែមួយមុខទេ គឺតែងតែសួររកគ្រប់យ៉ាងអស់ពីរឿងមួយទៅមួយ មិនចេះចប់មិនចេះហើយ ធ្វើយ៉ាងណាឲ្យមានកំហុសឲ្យទាល់តែបាន»។
មន្ត្រីពន្ធដារខេត្តបាត់ដំបង សហការជាមួយមន្ត្រីកងប្រដាប់អាវុធ រួមមានប៉ូលិសចរាចរណ៍ និងមន្ត្រីកងរាជអាវុធហត្ថប្រមាណជិត ២០នាក់ ចុះត្រួតពិនិត្យយានយន្ត និងទោចក្រយានយន្តតាមដងផ្លូវជាតិលេខ៥ នៅចំណុចភូមិពពាលខែ ឃុំជ្រៃ ស្រុកថ្មគោល ខេត្តបាត់ដំបង។ ការត្រួតពិនិត្យនេះយើងសង្កេតឃើញប្រជាពលរដ្ឋអ្នកធ្វើដំណើរ រអ៊ូរទាំចំពោះសកម្មភាពរបស់អាជ្ញាធរនេះស្ទើរគ្រប់គ្នា ហើយសមត្ថកិច្ចមិនអនុញ្ញាតឲ្យអ្នកធ្វើដំណើរណាថតយករូបភាពនោះឡើយ។ ចំពោះអ្នកថតក៏ត្រូវសមត្ថកិច្ចទាមទារឲ្យលុបចេញវិញភ្លាមៗដែរ។ ចំណែកឯអ្នកសារព័ត៌មាន ក៏ត្រូវសមត្ថកិច្ចនៅកន្លែងនោះបក់ដៃហៅទៅសួរនាំអំពីការចុះយកព័ត៌មាននៅកន្លែងពួកគាត់ធ្វើសកម្មភាព ដែលធ្វើឲ្យស្ទះចរាចរណ៍ប្រមាណជាង ៣ម៉ោងនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។