អាជ្ញាធរ និងប្រជាពលរដ្ឋមួយចំនួនរស់នៅឃុំឆ្នុកទ្រូ ខេត្តកំពង់ឆ្នាំង រិះគន់ជំទប់ទី១របស់គណបក្សប្រជាជនកម្ពុជា ចំពោះការយកផែដែលជាជំនួយរបស់ធនាគារអភិវឌ្ឍន៍អាស៊ី (ADB) ទៅជួលផ្ដាច់មុខឲ្យដេប៉ូលក់ឈើ។ ពួកគាត់អះអាងថា ការជួលបែបនេះអាចធ្វើឲ្យផែឆាប់ខូច និងប៉ះពាល់ដល់ការជួលឲ្យពលរដ្ឋនៅទូទាំងឃុំ នៅពេលមានពិធីមង្គលការ ឬបុណ្យទានផ្សេងៗ។
ផែចំនួនពីរគ្រឿងសម្រាប់ប្រើប្រាស់ក្នុងឃុំ ឬជួលដល់ប្រជាពលរដ្ឋក្នុងតម្លៃទាប នៅពេលដែលមានពិធីបុណ្យទានផ្សេងៗ ប៉ុន្តែផែមួយគ្រឿងត្រូវបានជំទប់ទី១ ឃុំឆ្នុកទ្រូ ឈ្មោះ សុក សៀម យកទៅជួលឲ្យដេប៉ូលក់ឈើមួយកន្លែងអស់រយៈពេលជិតមួយខែមកហើយ។ បញ្ហានេះ បានធ្វើឲ្យប្រជាពលរដ្ឋខកចិត្ដ និងបារម្ភខ្លាចគេជួលឲ្យទៅឈ្មួញរកស៊ីក្នុងរយៈពេលយូរអង្វែង។
ប្រជាពលរដ្ឋម្នាក់ដែលថ្លែងក្នុងលក្ខខណ្ឌសុំមិនបញ្ចេញឈ្មោះ ឲ្យដឹងនៅថ្ងៃទី១៦ ខែកក្កដា ថា ក្រោយពីការជួលនេះ មានពលរដ្ឋក្នុងឃុំជាច្រើននាក់សម្ដែងការមិនពេញចិត្ត ដោយពួកគាត់ចង់ឲ្យអាជ្ញាធរ យកផែនោះមកទុកសម្រាប់ជួលដល់ប្រជាពលរដ្ឋវិញ បើទោះបីជារដូវនេះមិនសូវមានពិធីមង្គលការ ឬពិធីបុណ្យទានច្រើនដូចនៅក្នុងរដូវប្រាំង។
លោករំលឹកថា កាលពីរដូវប្រាំង ផែទាំងពីរត្រូវបានអ្នកភូមិ ដែលមានរវល់ការកូនចៅ ឬកម្មវិធីផ្សេងៗក្នុងមូលដ្ឋាន បានមកជួលជាញឹកញាប់ ដោយក្នុង១ខែមានរហូតទៅដល់ជាង ២០ដងក៏មាន៖ «ខ្ញុំវិញអត់ពេញចិត្តតែម្ដង ព្រោះផែហ្នឹងវាសម្រាប់ជួលឲ្យប្រជាពលរដ្ឋមានលក្ខណៈទូទៅ ហើយយើងយកទៅដាក់ផ្ដាច់មុខក្រុមហ៊ុនឯកជនអ៊ីចឹងវាអត់សម។ ផែហ្នឹងបើនិយាយទៅគេជួលធ្វើបុណ្យ ឬការរហូត។ បាទ! បើមួយវាតូច បើប្រាំងមិញ ការបុណ្យអ៊ីចឹងទៅគេជួលម្ដងពីរអ៊ីចឹង ជួលកាលថែមទាំងផែវៀតណាម មួយទៀតផង»។
ឆ្លើយតបបញ្ហានេះ លោក សុក សៀម ថ្លែងបញ្ជាក់ថា លោកពិតជាបានជួលផែមួយគ្រឿងទៅឲ្យដេប៉ូលក់ឈើក្នុងតម្លៃ ៣០ម៉ឺនរៀលក្នុង១ខែមែន ប៉ុន្តែមិនមែនជាការជួលផ្ដាច់មុខនោះទេ ហើយក្នុងរយៈពេលជាង ១០ថ្ងៃទៀត លោកនឹងទៅយកផែនោះមកទុកសម្រាប់ជួលឲ្យប្រជាពលរដ្ឋតាមធម្មតាវិញ៖ «គេសន្យាជាមួយខ្ញុំប្រហែលជា ១០ថ្ងៃទៀត អ៊ីចឹងទៅប្អូនណា គេប្រគល់ផែមកឲ្យយើងវិញហើយ។ អ៊ីចឹងបានរបស់នេះដូចខ្ញុំជម្រាបក្មួយខាងដើមមិញហើយ របស់ហ្នឹងមិនមែនយើងជួលអីទៅរាប់ឆ្នាំដាច់មុខ ហើយចេះតែអង្គុយចាំយកលុយដូចអ្នកចោទប្រកាន់នោះ វាមិនមែនអ៊ីចឹងទេ»។
លោកបញ្ជាក់ថា ផែនៅក្នុងឃុំមានពីរ គឺមួយគ្រឿងនៅមេឃុំជាអ្នកកាន់កាប់ និងមួយគ្រឿងទៀតនៅលោកជាអ្នកកាន់កាប់ ហើយផែទាំងនេះទុកសម្រាប់ជួលឲ្យប្រជាពលរដ្ឋក្នុងមួយដងតម្លៃ ១០ម៉ឺនរៀលសម្រាប់ផែ១គ្រឿង។ ចំណែកថវិកាដែលបានមកពីការជួល ត្រូវបែងចែកជាបីផ្នែក គឺទី១ បង់ចូលសាលាឃុំ។ ទី២ ទុកសម្រាប់ជួសជុលផែនោះវិញ និងមួយផ្នែកបានទៅលើអ្នកថែរក្សា ឬកាន់កាប់ផែនោះផ្ទាល់។
ធនាគារអភិវឌ្ឍន៍អាស៊ី កាលពីឆ្នាំ២០០៩ និងឆ្នាំ២០១២ បានផ្ដល់ទឹកប្រាក់សរុបជាង ៦ម៉ឺនដុល្លារអាមេរិក សម្រាប់គម្រោងបង្កើតផែចំនួនពីរ ដែលមានទំហំទទឹងប្រហែលជា ៨ម៉ែត្រ និងបណ្ដោយ ១៨ម៉ែត្រ។ ផែនេះបានជួយសម្រួលដល់ការរៀបចំពិធីមង្គលការ ឬពិធីបុណ្យទានផ្សេងៗជាច្រើន សម្រាប់ប្រជាពលរដ្ឋរស់នៅលើផ្ទៃបឹងទន្លេសាប នៃឃុំឆ្នុកទ្រូ ទាំងមូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។