ក្នុងគោលបំណងលើកកម្ពស់ការចូលរួមរបស់ប្រជាពលរដ្ឋ ក្នុងដំណើរការអភិវឌ្ឍលទ្ធិប្រជាធិបតេយ្យថ្នាក់ក្រោមជាតិ អង្គការក្រៅរដ្ឋាភិបាលមួយឈ្មោះ "អង្គការអនាគតកុមារ" បានរៀបចំវេទិកាផ្សព្វផ្សាយ និងពិគ្រោះយោបល់មួយនៅឯឃុំមួយស្ថិតក្នុងស្រុកក្រគរ ខេត្តពោធិ៍សាត់។
តើអ្វីទៅជាតម្រូវការអាទិភាព និងជាបញ្ហាដែលកើតមានក្នុងឃុំនេះ?
បញ្ហាក្មេងទំនើងប្រើប្រាស់គ្រឿងញៀន និងបញ្ហាបទល្មើសនេសាទ គឺជាប្រធានបទសំខាន់ក្នុងវេទិកាផ្សព្វផ្សាយ និងពិគ្រោះយោបល់ដែលរៀបចំឡើងដោយអង្គការអនាគតកុមារ នៅឯឃុំអន្លង់ត្នោត ស្រុកក្រគរ ខេត្តពោធិ៍សាត់។
ស្ត្រីអ្នកភូមិឈ្មោះ ព្រំ ញ៉ា ជាប្រជាពលរដ្ឋនៅភូមិប៉ប៉ិត។ គាត់បានឲ្យដឹងនៅព្រឹកថ្ងៃទី២៩ ខែមេសា ថា ក្ដីកង្វល់ចម្បងរបស់អ្នកភូមិ គឺបញ្ហាក្មេងទំនើង និងក្រុមអ្នកប្រើប្រាស់គ្រឿងញៀន ដែលបានបង្កបញ្ហាស្មុគស្មាញជាច្រើនចំពោះអ្នកភូមិ។
ស្ត្រីរូបនេះបន្តថា ក្រុមក្មេងទំនើងបានធ្វើសកម្មភាពអុកឡុកពេលមានពិធីមង្គលការ ឬពិធីបុណ្យផ្សេងៗជាញឹកញាប់ តែអាជ្ញាធរហាក់មិនចង់ធ្វើការបង្ក្រាប ឬជួនកាលគ្រាន់តែឃាត់មិនឲ្យមានជម្លោះ តែមិនបានដាក់ទណ្ឌកម្មតាមផ្លូវច្បាប់ឡើយ ដោយក្រុមក្មេងទំនើងនេះមានខ្នងបង្អែកជាអាជ្ញាធរភូមិ៖ «តើក្រុមប្រឹក្សាឃុំយើងមានវិធានការយ៉ាងណាខ្លះ ដើម្បីទប់ស្កាត់ក្មេងទំនើងនេះ។ ទី២ បញ្ហាល្បែងស៊ីសងដូចជាកន្ទុយលេខ ល្បែងហ្គេម បោះបង់ចោលការសិក្សាច្រើន។ តើក្រុមប្រឹក្សាឃុំមានវិធានការយ៉ាងណា ដើម្បីបំបាត់បញ្ហាទាំងនេះ»។
ឆ្លើយតបចំពោះក្ដីកង្វល់របស់អ្នកភូមិ នាយប៉ុស្តិ៍នគរបាលរដ្ឋបាលឃុំអន្លង់ត្នោត លោក ហ៊ុន ហៀង ទទួលស្គាល់ថា ពិតជាមានបញ្ហានេះកើតមានមែន។ យ៉ាងនេះក្ដី លោកបដិសេធចំពោះការចោទប្រកាន់របស់ប្រជាពលរដ្ឋ។ លោកថា អាជ្ញាធរប៉ូលិសបានធ្វើការបង្ក្រាបដោយចាប់ឃាត់ខ្លួន និងអប់រំក្រុមក្មេងទំនើងជាច្រើនករណី។ លោកសំណូមពរឲ្យប្រជាពលរដ្ឋសហការជាមួយប៉ូលិស ដោយរាយការណ៍ជាបន្ទាន់នៅពេលមានហេតុការណ៍អ្វីមួយកើតឡើង៖ «សមត្ថកិច្ចរាល់ថ្ងៃ កំពុងបង្ការ និងបង្ក្រាបដោយបានចាប់ឲ្យពួកគេរួមទាំងម៉ែឪពួកគេ ធ្វើកិច្ចសន្យា។ ក្រុមក្មេងទំនើងទាំងនេះកើតចេញពីការស៊ីផឹក យើងកំពុងធ្វើការអប់រំផ្សព្វផ្សាយ និងចាត់វិធានការគ្រប់យ៉ាងដើម្បីបំបាត់»។
ករណីបទល្មើសនេសាទ ក៏ជាកង្វល់សម្រាប់អ្នកភូមិផងដែរ។ អាជ្ញាធរភូមិម្នាក់ដែលសុំមិនបញ្ចេញឈ្មោះ បានសរសេរជាសំណួរតាមលិខិតសួរថា ជនប្រព្រឹត្តល្មើសនេសាទក្នុងភូមិលោកមិនត្រឹមតែមិនខ្លាចច្បាប់នោះទេ តែថែមទាំងចំអកឲ្យអាជ្ញាធរភូមិទៀត។ តើថ្នាក់លើមានវិធានការយ៉ាងណាចំពោះជនបែបនេះ?៖ «សំណូមពររបស់ភូមិជ្រលង ពាក់ព័ន្ធនឹងបទល្មើសនេសាទដែលកើតមានតាំងពី១៩៩៣ រហូតដល់ឆ្នាំ២០១៣ នេះ។ បទល្មើសនេសាទកាន់តែកើនឡើង។ បុគ្គលមួយចំនួនប្រមាថមេភូមិ ប្រមាថសមត្ថកិច្ចថែមទៀត»។
ឆ្លើយតបចំពោះក្ដីកង្វល់របស់អាជ្ញាធរភូមិរូបនេះ មេឃុំអន្លង់ត្នោត អ្នកស្រី ទូច ណូ សំណូមពរឲ្យអាជ្ញាធរភូមិធ្វើបញ្ជីឈ្មោះក្រុមជនល្មើស ផ្ញើមកឲ្យអាជ្ញាធរប៉ូលិសជាបន្ទាន់ ដើម្បីមានវិធានការបង្ក្រាប។
ឃុំអន្លង់ត្នោត មានភូមិចំនួន១២ និងមានផ្ទៃដីសរុប ៩.២០០ហិកតារ ឬស្មើ ៩២គីឡូម៉ែត្រការ៉េ។ ចែកចេញជាផ្ទៃដីបង្កបង្កើនផល ១.៨៤៤ហិកតារ។ ផ្ទៃដីលំនៅឋាន ៥៥៦ហិកតារ។ ដីព្រៃ ៣.២៧០ហិកតារ និងមានប្រជាពលរដ្ឋរស់នៅ ២.១៥១គ្រួសារ ហើយ ៨៥% នៃប្រជាពលរដ្ឋក្នុងឃុំជាកសិករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។