អាជ្ញាធរ និងប្រជាពលរដ្ឋរស់នៅក្នុងស្រុកពញាឮ ខេត្តកណ្ដាល ដែលបច្ចុប្បន្នកាត់បញ្ចូលមកខណ្ឌសែនសុខ រាជធានីភ្នំពេញ បានចោទថា ក្រុមហ៊ុនលី យ៉ុងផាត់ រាយបង្គោលភ្លើងពីភ្នំគិរីរម្យ កាត់ភូមិឃុំពួកគាត់ ទៅក្រុមហ៊ុននោះ ខ្វះបច្ចេកទេស បង្កការភ័យខ្លាចរលំបាក់លើ។
ពលរដ្ឋភូមិសំរោងត្បូង ឃុំសំរោង ស្រុកពញាឮ លោក សៀន សាង ថ្លែងនៅព្រឹកថ្ងៃទី៣០ ខែមេសា ថា ប្រជាពលរដ្ឋ ៣នាក់បានស្លាប់កាលពីរសៀលថ្ងៃទី២៨ ខែមេសា ដោយមិនដឹងថាមកពីឆក់ខ្សែភ្លើង ឬមកពីរន្ទះបាញ់ត្រូវ ខណៈកំពុងអុំទូកចាប់ត្រីក្នុងបឹងសំរោង។ លោកថា នៅថ្ងៃទី២៨ ខែមេសា នោះ មានខ្យល់បោកខ្លាំងរលំបង្គោលភ្លើងចូលទឹកស្រះសំរោង ក្រោយមកក្រុមបុរសវ័យក្មេង ៣នាក់ បានស្លាប់។ ភ្លាមៗនោះ សមត្ថកិច្ចសន្និដ្ឋានខុសគ្នា ខ្លះថាអ្នកទាំងនោះស្លាប់ដោយខ្សែភ្លើងឆក់ ខ្លះថារន្ទះបាញ់៖ «បាក់ធ្លាក់មកលើទឹក អាខ្លះវាទ្រេត ៥ដើម បាក់ទៅក្នុងទឹក លើគោកហ្នឹង ១៨ដើម»។
មេភូមិសំរោងត្បូង លោក អួង អន ថ្លែងថា ការសន្និដ្ឋានពិតប្រាកដ គឺបុរសទាំង ៣នាក់ស្លាប់ដោយរន្ទះបាញ់។ ប៉ុន្តែ អ្វីដែលអាជ្ញាធរនៅមូលដ្ឋានបារម្ភខ្លាំងនោះ គឺបង្គោលភ្លើងដាំនៅក្នុងមូលដ្ឋាននេះតាមដងផ្លូវលេខ៥១ គឺបានរលំបាក់ចំនួន ២៣ដើម។ លោកថា ក្នុងចំណោមបង្គោលភ្លើងរលំបាក់នោះ មានរលំចូលស្រះទឹក ដែលមានបុរស ៣នាក់ស្លាប់ និង ២នាក់រងរបួស ហើយបង្គោលនោះក៏រលំលើផ្ទះប្រជាពលរដ្ឋច្រើនខ្នង បណ្ដាលឲ្យប៉ះពាល់សម្ភារៈ និងខូចខាតផ្ទះ។ ក្រុមហ៊ុនលី យ៉ុងផាត់ មិនទាន់សងសំណងមកប្រជាពលរដ្ឋវិញសោះ។
លោកបន្តថា បង្គោលភ្លើងនោះមានតែស៊ីម៉ងត៍ដែលមានបង្កប់ដែកសរសៃតូចៗធ្វើជាឆ្អឹងសសរ ទើបពេលមានខ្យល់កន្ត្រាក់បក់មក បានធ្វើឲ្យបង្គោលនោះរលំបាក់ពាសពេញភូមិ ខ្លះបាក់ជិតដល់គល់ ខ្លះបាក់កម្ពស់ ១ម៉ែត្រពីដីដែលដាំ៖ «ផ្ទះមួយនោះ វាខូចផ្ទះមួយជ្រុង ហើយនិងបែកសម្ភារៈនៅក្នុងផ្ទះ ដូចជា ទូរទស្សន៍ តុ ទូអីគាត់អីចឹង ខូចខាតរបស់ទ្រព្យទេ ហើយផ្ទះ ៣ទៀត បានខ្សែសង្កត់ពីលើ ហើយបាក់មេដំបូលផ្ទះពីលើចំនួន ៣ផ្ទះ។ បើតាមការសន្និដ្ឋានរបស់ខ្ញុំ បើតាមពិនិត្យបង្គោលភ្លើងដែលរលំហ្នឹង គឺថាបង្គោលភ្លើងហ្នឹងវាដូចជាខ្វះបច្ចេកទេស ព្រោះមិនរលំប៉ើងដីទេ នេះគឺបាក់តែម្តង បាក់អីចឹងវាបណ្ដាលមកអំពីបង្គោលភ្លើងនោះវាដាក់ដែកតូចពេក ស្នូលដែកខាងក្នុងដាក់ដែក ៣លី ដែកលួស អីចឹងវាអត់សមនឹងបង្គោលទេ អីចឹងហើយបានវារលំនឹង វាបាក់ដោយសារតែដែកខាងក្នុងនោះវាតូច»។
វិទ្យុអាស៊ីសេរី មិនអាចទាក់ទងតំណាងក្រុមហ៊ុនលី យ៉ុងផាត់ ជម្រាបសួរព័ត៌មានបានភ្លាមៗទេ នៅថ្ងៃទី៣០ ខែមេសា។
តំណាងក្រុមហ៊ុនផលិតបង្គោលអគ្គិសនីឈ្មោះសេវិនអេហ្វធីឌី (7FTD) លោក ឈាង បូណេត ថ្លែងថា ការផលិតបង្គោលអគ្គិសនីរបស់ក្រុមហ៊ុននេះ គឺធ្វើយ៉ាងណាឲ្យបង្គោលនោះអាចទប់កម្លាំងខ្យល់បានទាំងស្រុង។ ក្រុមហ៊ុននេះក៏មិនដែលបានលក់បង្គោលអគ្គិសនីទៅឲ្យក្រុមហ៊ុនលី យ៉ុងផាត់ ដែរ។ លោកបន្តថា ការផលិតបង្គោលសម្រាប់ដាំឲ្យខ្សែអគ្គិសនីពាក់លើនោះ ត្រូវធានាអាចដាំបានតាមតំបន់ដែលនឹងជួបខ្យល់ច្រើន ឬតំបន់ចង្អៀតមិនមានខ្យល់ជាដើម ទើបអ្នកដំណើរ និងអ្នករស់នៅក្បែរមិនភ័យព្រួយអំពីការរលំបាក់ត្រូវលើជាដើម៖ «បើក្រុមហ៊ុនខ្ញុំអត់អាចប្រើតូចជាងប្រាំពីរចុចមួយមិល្លីម៉ែត្រទេសរសៃដែកបណ្តោយហ្នឹង ប៉ុន្តែក្រុមហ៊ុនផ្សេងគេអាចប្រើ ៤លី ៣លី អីចឹងនោះតាមការគិតរបស់ខាងគេ យើងមិនហ៊ានថាគេនោះអន់ ឬយ៉ាងម៉េចទេ»។
ចៅសង្កាត់រងទី២ សង្កាត់សំរោង ខណ្ឌសែនសុខ (អតីតឃុំសំរោង ស្រុកពញាឮ) លោក ឡេង សាវុន ថ្លែងថា ក្រោយកើតហេតុ អាជ្ញាធរមូលដ្ឋាន និងមន្ត្រីសាលាក្រុងបានចុះមើល ហើយសាលាសង្កាត់មានគម្រោងប្ដឹងទៅអាជ្ញាធរអគ្គិសនីឲ្យជួយត្រួតពិនិត្យក្រុមហ៊ុនដាក់បង្គោលភ្លើងទៅឲ្យក្រុមហ៊ុនលី យ៉ុងផាត់ ប្រើនោះ សងសំណងមកប្រជាពលរដ្ឋដែលបង្គោលភ្លើងបានរលំ ធ្វើឲ្យប៉ះពាល់ផ្ទះ និងសម្ភារៈអ្នកស្រុក និងសុំឲ្យបង្គោលភ្លើងដែលដាំថ្មីតាមផ្លូវដដែល ពីគិរីរម្យ ទៅកាន់ក្រុមហ៊ុនលី យ៉ុងផាត់ នៅឯស្ពានព្រែកព្នៅ នោះ ត្រូវមានគុណភាពរឹងមាំ ដែលមិនបង្កការភ័យខ្លាចរលំបាក់លើអ្នកដំណើរ និងអ្នករស់នៅក្បែរបង្គោលអគ្គិសនីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។