កន្លងមក ក្នុងប្រទេសកម្ពុជា អោយតែមានឱកាសពិសេសៗ ម្ហូបអាហារ ត្រី សាច់ បន្លែ ផ្លែឈើ មធ្យោបាយធ្វើដំណើរនានា តែងឡើងថ្លៃជានិច្ច។ ដោយហេតុនេះ អង្គការនានា និងប្រជាពលរដ្ឋទូទៅ ជាពិសេស គឺប្រជាពលរដ្ឋដែលបានធ្វើចំណាកស្រុក មានក្តីព្រួយបារម្ភចំពោះសោហ៊ុយឡានធ្វើដំណើរទៅបោះឆ្នោតនៅស្រុកកំណើត ដែលពួកគាត់រំពឹងថានឹងអាចឡើងថ្លៃដូចលើកមុនៗទៀតនៅពេលថ្ងៃបោះឆ្នោតខាងមុខនេះ។
ប្រជាពលរដ្ឋម្នាក់មានស្រុកកំណើតនៅស្រុកល្វាឯម ខេត្តកណ្ដាល កញ្ញា ស៊ីណា ដែលបច្ចុប្បន្ននេះ កំពុងរស់នៅ និងធ្វើការជាអ្នករត់តុនៅក្នុងភោជនីយដ្ឋានមួយជិតស្តុបបូកគោ រាជធានីភ្នំពេញ។ កញ្ញាបានបង្ហាញក្តីកង្វល់ថា ឡានតាក់ស៊ីមុខជានឹងឡើងថ្លៃជាមិនខាននៅក្នុងរយៈពេលប៉ុន្មានថ្ងៃមុនការបោះឆ្នោតមកដល់ នាថ្ងៃទី២៨ កក្កដា ចុងសប្ដាហ៍នេះ ព្រោះថា នៅមុនមួយថ្ងៃ ឬពីរថ្ងៃមុនការបោះឆ្នោតមកដល់ ប្រជាពលរដ្ឋ ជាពិសេសកម្មករ កម្មការិនី នឹងនាំគ្នាធ្វើដំណើរទៅបោះឆ្នោត។ កញ្ញា ស៊ីណា ក៏បានសំណូមពរថា បើឡានតាក់ស៊ីមិនអាចបញ្ចុះតម្លៃបាន សុំអោយនៅតែដដែលបានហើយ កុំអោយឡើងថ្លៃអោយសោះ។
ចំណែកឯបុរសម្នាក់ជាអ្នកស្រុកកំពត ហើយបច្ចុប្បន្នប្រកបរបរនៅរាជធានីភ្នំពេញ ជាអ្នកលក់ ឬផ្សព្វផ្សាយផលិតផលអោយក្រុមហ៊ុនមួយ បានបង្ហាញទស្សនៈ និងឆន្ទៈយ៉ាងមុតមាំថា បើទោះបីជាឡានតាក់ស៊ីមានការដំឡើងថ្លៃឡានយ៉ាងណាក៏ដោយចុះ ក៏គាត់ត្រូវតែចំណាយថវិកាធ្វើដំណើរទៅបោះឆ្នោត ព្រោះថា ការបោះឆ្នោតនេះជាកាតព្វកិច្ចសំខាន់ណាស់ក្នុងនាមជាពលរដ្ឋខ្មែរមួយរូប ហើយយើងត្រូវរង់ចាំរយៈពេល ៥ឆ្នាំឯណោះ ទើបអាចបញ្ចេញសិទ្ធិនេះបាន។
ដោយហេតុថា យើងជាពលរដ្ឋកម្ពុជា ម្នាក់ ទោះជាយើងមានជីវភាពមិនសមរម្យក្ដី ប៉ុន្តែយើងមានឆន្ទៈចង់ប្រើប្រាស់សិទ្ធិជាពលរដ្ឋរបស់ខ្លួន ដើម្បីទៅបោះឆ្នោតអោយខាងតែបាន។
ឆ្លើយតបជុំវិញបញ្ហានេះដែរ អ្នកប្រកបរបររត់តាក់ស៊ីម្នាក់ រយៈពេល ៨ឆ្នាំហើយ នៅចំណតផ្សារដើមគ រាជធានីភ្នំពេញ លោក ឌី បានលើកឡើងពីបញ្ហាដែលឡានតាក់ស៊ីឡើងថ្លៃ ថា មិនមែនចេះតែឡើងៗទៅតាមចិត្តគាត់ចង់នោះទេ គឺដោយសារតែត្រូវចំណាយថវិកាបង់បេនមានតម្លៃថ្លៃជាងធម្មតា។
ផ្ទុយទៅវិញ អ្នកប្រកបរបរបើកឡានតាក់ស៊ីម្នាក់ទៀត ដែលប្រកបរបរនេះអស់រយៈពេល ៦ឆ្នាំឯណេះវិញ លោក វិបុល បានលើកឡើងដោយឆន្ទៈប្ដេជ្ញាថា បើទោះបីជាបេនឡើងថ្លៃ ក៏គាត់មិនឡើងថ្លៃឈ្នួលអ្នកដំណើរដែរ ព្រោះគាត់ចង់អោយប្រជាពលរដ្ឋបានទៅបោះឆ្នោតគ្រប់ៗគ្នា។
ការលើកឡើងនេះ ស្របពេលដែលអាជីវករម្នាក់ដែលប្រកបមុខរបរលក់កាសែត សៀវភៅ កាហ្វេ នៅត្រង់ម្តុំបេនឡានផ្សារដើមគ នេះ ឌឺដងអោយថា និយាយអោយពិត។
ជាមួយគ្នានេះដែរ លោក វិបុល ដែលជាអ្នករត់តាក់ស៊ីបានសំណូមពរបន្ថែមថា ជាការល្អប្រសើរណាស់ក្នុងនាមយើងជាពលរដ្ឋខ្មែរដូចគ្នា គួរណាស់កុំដំឡើងថ្លៃបេនឡាន។
ពាក់ព័ន្ធជុំវិញបញ្ហាខាងលើនេះដែរ អ្នកលក់សំបុត្រឡានក្រុងនៅឯចំណតឡានក្រុងរិទ្ធមុន្នី បានអោយដឹងថា ក្រុមហ៊ុននេះនឹងមិនដំឡើងថ្លៃឡានក្រុងទេ ហើយជារៀងរាល់ពេលបោះឆ្នោតអាណត្តិមុនៗ ក្រុមហ៊ុននេះក៏មិនដែលឡើងថ្លៃដែរ។
ចំណែកឯក្រុមហ៊ុនឡានក្រុងមួយទៀត គឺក្រុមហ៊ុន កាពីតូល វិញ បានអោយដឹងដែរថា ក្រុមហ៊ុននេះមិនដែលដំឡើងថ្លៃឡានទេក្នុងពេលបោះឆ្នោត។
លោក ហាន់ សុភាព អ្នកគ្រប់គ្រងក្រុមហ៊ុនឡានក្រុងកាពីតូល សាខាអូរឫស្សី បានបន្ថែមដើម្បីបកស្រាយចម្ងល់របស់ប្រជាពលរដ្ឋទូទៅដែលឆ្ងល់ថា ហេតុអ្វីបានជាតម្លៃឡានចេះតែឡើងថ្លៃក្នុងឱកាសពិសេសៗ ដោយពន្យល់ថា មូលហេតុមួយចំនួនដែលធ្វើឡានក្រុងត្រូវតែឡើងថ្លៃ។
ឆ្លើយតបបញ្ហានេះ លោក ចាន់ វិបុល ប្រធានអគ្គនាយកដ្ឋានដឹកជញ្ជូននៃក្រសួងសាធារណការ និងដឹកជញ្ជូន បានអះអាងថា លោកមិនបានដឹងទេ។
រីឯខាងអង្គការសង្គមស៊ីវិល លោក សុខ ពិទូ នាយកប្រតិបត្តិអង្គការក្រុមប្រឹក្សាយុវជនកម្ពុជា បានអោយដឹងដែរថា ការសំណូមពរហើយ សំណូមពរទៀតពីសំណាក់ប្រជាពលរដ្ឋ ហាក់ដូចជាគ្មានប្រសិទ្ធភាពឡើយ ទោះបីជាអាជ្ញាធរបានចេញសេចក្ដីប្រកាសក៏ដោយ។
លោកបន្ថែមទៀតថា បើអ្នករកស៊ីរត់ឡានគ្មានការអនុវត្ត និងអន្តរាគមន៍ពីសំណាក់ស្ថាប័នដែលពាក់ព័ន្ធដោះស្រាយបញ្ហានេះទេ រថយន្តឈ្នួលនៅតែដំឡើងថ្លៃដដែល។
ទោះជាយ៉ាងណា អ្នកជំនាញសេដ្ឋកិច្ចបង្ហើបឲ្យដឹងថា ថ្លៃឈ្នួលឡានតែងឡើងថ្លៃបានពេលប្រទេសកម្ពុជា មានពិធីបុណ្យទានធំៗនោះ គឺដោយសារតែមានអ្នកជិះច្រើនកុះករ ហើយជាធម្មតា ចំពោះទីផ្សារសេរី កាលណាសេចក្ដីត្រូវការច្រើនលើសពីសេវាផ្គត់ផ្គង់ហើយ តម្លៃពិតជាឡើងថ្លៃខ្ពស់ដូច្នេះហើយ។ ហើយបើមិនចង់ឲ្យឡានឈ្នួលដំឡើងថ្លៃបាន លុះត្រាតែរដ្ឋាភិបាលមានគោលការណ៍ជួយផ្គត់ផ្គង់សេវាដឹកជញ្ជូនឯកជន ឬជួយផ្គត់ផ្គង់អ្វីម្យ៉ាងដូចជាជួយបញ្ចុះថ្លៃសាំង ឬជួយបង់ថ្លៃសេវាពាក់ព័ន្ធផ្សេងទៀតទើបអាចទៅរួច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។