លោក​នាយក​រដ្ឋមន្ត្រី ហ៊ុន សែន ប្ដេជ្ញា​ជំរុញ​និង​លើក​ស្ទួយ​ផលិតកម្ម​ស្រូវ​អង្ករ

ដោយ ថា កិត្យា
2016-01-25
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
លោក​នាយក​រដ្ឋមន្ត្រី ហ៊ុន សែន ថ្លែង​ក្នុង​វេទិកា​ស្រូវ​អង្ករ​កម្ពុជា លើក​ទី​៥ នា​សណ្ឋាគារ សុខា​ភ្នំពេញ នៅ​ព្រឹក​ថ្ងៃ​ទី​២៥ ខែ​មករា ឆ្នាំ​២០១៦។
លោក​នាយក​រដ្ឋមន្ត្រី ហ៊ុន សែន ថ្លែង​ក្នុង​វេទិកា​ស្រូវ​អង្ករ​កម្ពុជា លើក​ទី​៥ នា​សណ្ឋាគារ សុខា​ភ្នំពេញ នៅ​ព្រឹក​ថ្ងៃ​ទី​២៥ ខែ​មករា ឆ្នាំ​២០១៦។
RFA/Tha Kitya

លោក​នាយក​រដ្ឋមន្ត្រី ហ៊ុន សែន ប្ដេជ្ញា​ជំរុញ និង​លើក​ស្ទួយ​ផលិតកម្ម​ស្រូវ​អង្ករ ហើយ​លោក​សន្យា​ថា នឹង​ជួយ​ដោះស្រាយ​ឧបសគ្គ​នានា​ដែល​រាំង​ស្ទះ​ដល់​ការ​នាំ​ចេញ​អង្ករ​ទៅ​ក្រៅ​ប្រទេស។ កសិករ​ស្វាគមន៍​ចំពោះ​ការ​ប្ដេជ្ញា​ចិត្ត​របស់​លោក​នាយក​រដ្ឋមន្ត្រី​បែប​នេះ ប៉ុន្តែ​បារម្ភ​ថា ការ​សន្យា​របស់ លោក ហ៊ុន សែន មិន​សូវ​មាន​ប្រសិទ្ធភាព។

លោក​នាយក​រដ្ឋមន្ត្រី ហ៊ុន សែន ចាត់​ទុក​វិស័យ​កសិកម្ម​ជា​វិស័យ​អាទិភាព​មួយ​សម្រាប់​អភិវឌ្ឍ​សេដ្ឋកិច្ច និង​កាត់​បន្ថយ​ភាព​ក្រីក្រ​របស់​ប្រជាជន។

ថ្លែង​ក្នុង​វេទិកា​ស្រូវ​អង្ករ​កម្ពុជា លើក​ទី​៥ នា​សណ្ឋាគារ សុខា​ភ្នំពេញ នៅ​ព្រឹក​ថ្ងៃ​ទី​២៥ ខែ​មករា លោក ហ៊ុន សែន លើក​ឡើង​ថា លោក​នឹង​បន្ត​ជួយ​អភិវឌ្ឍ​វិស័យ​ស្រូវ​អង្ករ​ទាំង​បរិមាណ និង​គុណភាព ដូចជា ផ្តល់​ឥណទាន​ដែល​មាន​ការ​ប្រាក់​អនុគ្រោះ​តាម​រយៈ​ធនាគារ​អភិវឌ្ឍន៍​ជនបទ ពង្រីក​ប្រព័ន្ធ​ធារាសាស្ត្រ ស្វែងរក​ពូជ​ស្រូវ​ល្អៗ បង្កើន​ឃ្លាំង​ស្តុក​ស្រូវ និង​ម៉ាស៊ីន​សម្ងួត​ស្រូវ។ លើស​ពី​នេះ លោក​សន្យា​ថា នឹង​ជួយ​សម្រួល​ដល់​ការ​ដឹក​ជញ្ជូន និង​ទីផ្សារ ព្រម​ទាំង​អនុគ្រោះ​ពន្ធ​លើ​តម្លៃ​បន្ថែម នៃ​ការ​នាំ​ចូល​គ្រឿងយន្ត និង​ឧបករណ៍​កសិកម្ម ជាដើម។

លោក ហ៊ុន សែន៖ «ការ​សម្រួល​ដល់​ការ​នាំ​ចេញ​តាម​រយៈ​ការ​សុំ​វិញ្ញាបនបត្រ​សម្គាល់​ប្រភព​ដើម​ទំនិញ តាម​ប្រព័ន្ធ​អនឡាញ (Online) និង​ចុះ​បញ្ជី និង​បញ្ចុះ​តម្លៃ​អគ្គិសនី​ដែល​យើង​អនុវត្ត​នា​ពេល​ខាង​មុខ​នេះ។ លើស​ពី​នេះ​ទៀត យើង​ក៏​ត្រូវ​យក​ចិត្ត​ទុក​ដាក់​ផង ក្នុង​ការ​ស្ដារ និង​អភិវឌ្ឍ​ផ្លូវ​ទឹក និង​ផ្លូវ​ដឹក ដើម្បី​បន្ថយ​ថ្លៃ​ដើម និង​បង្កើន​សមត្ថភាព​ប្រកួត​ប្រជែង​របស់​ទំនិញ​របស់​យើង​នៅ​ក្នុង​ទីផ្សារ​អន្តរជាតិ»

បើ​ទោះ​បី​ជា​រដ្ឋាភិបាល បាន​ប្ដេជ្ញា និង​ថែម​ទាំង​ដាក់​ចេញ​នូវ​គោល​នយោបាយ​ជំរុញ​ផលិតកម្ម​ស្រូវ និង​ការ​នាំ​ចេញ​អង្ករ​ក្តី ប៉ុន្តែ​ប្រជា​កសិករ​មួយ​ចំនួន​អះអាង​ថា មក​ទល់​ពេល​នេះ ពួក​គាត់​នៅ​តែ​ធ្វើ​ស្រែ​ប្រវាស់​មេឃ ដែល​មិន​មាន​លទ្ធភាព​ធ្វើ​ស្រូវ​ក្នុង​មួយ​ឆ្នាំ​បាន​ពីរ​ទៅ​បី​ដង ដូច​ប្រជា​កសិករ​ប្រទេស​ដទៃ​ឡើយ។ កសិករ​នៃ​ប្រទេស​ជិត​ខាង អាច​មាន​លទ្ធភាព​យក​លុយ​ផ្ញើ​ធនាគារ ប៉ុន្តែ​កសិករ​ខ្មែរ បាន​ត្រឹម​តែ​លក់​កសិផល​យក​លុយ​ទៅ​សង​ធនាគារ​ប៉ុណ្ណោះ។

ប្រជា​សហគមន៍​កសិកម្ម​សង្ហា​ផល មក​ពី​ខេត្ត​បាត់ដំបង លោក ហុល ខ្លឹម មាន​ប្រសាសន៍​ថា កន្លង​មក រដ្ឋាភិបាល​បាន​ជួយ​កសិករ​ដោយ​ប្រយោល ដែល​ហាក់​មិន​សូវ​បាន​ផល​ដល់​ដៃ​ប្រជា​កសិករ​ឡើយ។ លោក​រំពឹង​ថា រដ្ឋាភិបាល​នឹង​ជំរុញ​ធ្វើ​យ៉ាង​ណា ជួយ​ឲ្យ​ដល់​មូលដ្ឋាន​ផ្ទាល់​តែ​ម្តង ដោយ​លោក​ចង់​សំដៅ​ថា ជំនួយ​របស់​រដ្ឋាភិបាល​កន្លង​មក ត្រូវ​ជាប់​គាំង​នៅ​អាជ្ញាធរ​ថ្នាក់​ក្រោម៖ «បើ​ជួយ​ពង្រឹង​ផ្នែក​ការងារ​កសិកម្ម​ដាំ​ដុះ សូម​ឲ្យ​វិនិយោគ​ដោយ​ផ្ទាល់ៗ បាន​ន័យ​ថា បើ​សហគមន៍​ខ្វះ​អី ខ្វះ​ទុន​ផលិត​អ៊ីចឹង សូម​ឲ្យ​ទុន​នេះ​ត្រូវ​ដល់​សហគមន៍ កុំ​ឲ្យ​តាម​មន្ទីរ​ដែល​តែង​តែ​ថា​ជួយៗ ប៉ុន្តែ​អត់​ដល់​សហគមន៍។ អ៊ីចឹង​សហគមន៍​នៅ​ខ្សោយ​ដដែល។ កាល​ណា​ខាង​ក្រោម​ខ្សោយ​ហើយ ខាង​លើ​ក៏​មិន​ពូកែ​ដែរ»

រដ្ឋាភិបាល ធ្លាប់​ដាក់​គោលដៅ​ក្នុង​ការ​នាំ​ចេញ​ស្រូវ​អង្ករ​ឲ្យ​បាន ១​លាន​តោន​ក្នុង​ឆ្នាំ​២០១៥ ប៉ុន្តែ​គោល​នយោបាយ​នេះ រដ្ឋាភិបាល​បាន​បរាជ័យ ហើយ​ជាក់ស្ដែង កម្ពុជា នាំ​អង្ករ​ចេញ​បាន​សម្រេច​តែ ៥៣​ម៉ឺន​តោន​ប៉ុណ្ណោះ។

ទាក់ទិន​បញ្ហា​នេះ​ដែរ លោក​បណ្ឌិត មាស នី អ្នក​ស្រាវជ្រាវ​វិទ្យាសាស្ត្រ​សង្គម មាន​ប្រសាសន៍​ថា ជា​ញឹកញាប់ លោក​នាយក​រដ្ឋមន្ត្រី ហ៊ុន សែន តែង​តែ​ប្រកាស​ប្ដេជ្ញា​តែ​ម្នាក់​ឯង ប៉ុន្តែ​ក្រសួង និង​មន្ទីរ​ពាក់ព័ន្ធ​នៅ​ខាង​ក្រោម មិន​ដំណើរ​ការ​ឡើយ។ លោក​សង្កេត​ឃើញ​ថា ការ​អភិវឌ្ឍ​វិស័យ​កសិកម្ម​នៅ​ប្រទេស​ជិត​ខាង គឺ​មាន​លក្ខណៈ​ពិសេស ដែល​រដ្ឋាភិបាល​កម្ពុជា គួរ​តែ​ស្រង់​បទពិសោធន៍។

លោក​បណ្ឌិត មាស នី៖ «នៅ​ប្រទេស​ថៃ គេ​ប្រើ​គោល​នយោបាយ​តំបន់​មួយ​ផលិតផល​មួយ គឺ​ក្រសួង​កសិកម្ម រៀបចំ​ដី ក្រសួង​ឧស្សាហកម្ម រៀបចំ​វេច​ខ្ចប់ ក្រសួង​ពាណិជ្ជកម្ម ត្រូវ​រក​ទីផ្សារ ហើយ​ក្រសួង​ហិរញ្ញវត្ថុ ត្រូវ​គិតគូរ​អំពី​ការ​ផ្តល់​ទុន​កម្ចី។ អ៊ីចឹង​យើង​ឃើញ​ថា ជំនួយ​គាំទ្រ​ទាំងអស់​វា​ទៅ​ទាំង​ព្រម។ ដូច្នេះ​កសិករ​របស់​គេ​មាន​អារម្មណ៍​កក់ក្តៅ​ពី​ប្រព័ន្ធ​គ្រប់គ្រង ប៉ុន្តែ​ខ្មែរ​មិន​អ៊ីចឹង​ទេ»

ប្រជាពលរដ្ឋ និង​អង្គការ​សង្គម​ស៊ីវិល លើក​ឡើង​ថា ដើម្បី​លើក​ស្ទួយ​វិស័យ​កសិកម្ម​នោះ រដ្ឋាភិបាល​កម្ពុជា គប្បី​ពន្លឿន​ដំណោះស្រាយ​បញ្ហា​ប្រឈម​នានា ដែល​ទាក់ទង​ដល់​គ្រប់​ផ្នែក​នៃ​សង្វាក់​ផលិតកម្ម ចាប់​តាំង​ពី​ការ​ដាំ​ដុះ ការ​កែច្នៃ រហូត​ដល់​ការ​នាំ​ចេញ ពោល​គឺ​កុំ​ឲ្យ​គោល​នយោបាយ​មាន​តែ​នៅ​លើ​ក្រដាស៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

, ដឹកនាំ របៀបចេះតែស្រែក ដូចហ៊ុន សែន កូនក្មេង ក៏ចេះដែរ !
, ពិបាកណាស់ មនុស្សល្ងង់ខាងសេដ្ឋកិច្ច ពូកែបានតែរករឿង មួលបង្កាច់គេ ចាប់ដាក់គុកតែប៉ុណ្ណោះ !

Jan 26, 2016 05:14 AM

អ្នក​អាន​អនាមិក

ស្តាប់ទៅទំនងដែរ នេះបើស្តាប់ តែបើមើលវិញ អត់ទំនងទេបាទ ក្នុង​លោកនេះមនុស្សអាចបង្កើតមនុស្ស បងើ្កតអាប៉ូឡូ បង្កើតមស្សី​ល​បាន តែស្រូវអង្ករនេះ កុំថាត្រឹមបណ្ឌិត ដល់ថ្នាក់ ឪបណ្តិតទៅទៀត​ក៏​មិនអាចបង្កើតស្រូវអង្ករបានដែរ កុំអួតឲ្យសោះ និងវិលមកស្រុក​ខ្មែរវិញ បើអ្នកដឹកនាំបែបរាល់ថ្ងៃនេះ កុំថាដល់ទៅស្រូវអង្ករនាំចេញ សូម្បីតែជញ្ជ្រាំងក៏អត់មាននាំចេញបានដែរ បុរាណពោលថាធ្វើ​ស្រែ​និង​ទឹកធ្វើសឹកនិងបាយ ហើយទឹកនេះក៏លោកឯងអត់បង្កើតបានដែរ និងបើកាប់ព្រៃដូរលុយល្បៀបពួកលោករាល់ថ្ងៃនេះ កុំថាដល់ទៅទឹក​ធ្វើស្រែសូម្បីតែទឹកនោមក៏អត់ដែរបាទ ពិតជារីកចម្រើនបោក​រាស្រ្ត​បូកអំណាចមែនអ្នកដឹកនាំខ្ញុំុ។

Jan 25, 2016 09:09 PM

អ្នក​អាន​អនាមិក

Listen to what he said. He only facilitate rice exportation but he never know how to increase the production. Farmer families owed money to the bank under hi macro economic=>end up selling land to "Oknhas". What's a "moha lot phlos moha oscha" he is.Some families eat "domlong,kdouch chumnuos bay" how can they have rice to sell for exportation ?

Jan 25, 2016 09:33 AM

គេហទំព័រ​ទាំងមូល