ព្រះសង្ឃ និងសកម្មជនបរិស្ថាន បរាជ័យចំពោះគម្រោងធ្វើកូដកម្មដោយគង់បង្អត់ចង្ហាន់នៅខាងមុខស្ថានទូតចិន ប្រចាំនៅកម្ពុជា នៅព្រឹកថ្ងៃទី១៣ កញ្ញា នេះ ដើម្បីប្រឆាំងនឹងក្រុមហ៊ុនចិន ស៊ីណូហាយដ្រូ (SinoHydro) ដែលគ្រប់គ្រងគម្រោងសាងសង់ទំនប់វារីអគ្គិសនីស្ទឹងឆាយអារ៉ែង នៅខេត្តកោះកុង។
ការបរាជ័យនេះ ដោយសារក្រុមអាជ្ញាធរខណ្ឌចំការមន និងកងសន្តិសុខ ប្រើហិង្សាបណ្ដេញព្រះសង្ឃឲ្យទៅតវ៉ានៅទីលានប្រជាធិបតេយ្យវិញ។
ព្រះសង្ឃ និងសកម្មជនបរិស្ថាន នៅតែបង្ហាញឆន្ទៈការពារបរិស្ថាននៅតំបន់ស្ទឹងអារ៉ែង ស្រុកថ្មបាំង ខេត្តកោះកុង ដោយមិនចង់ឲ្យមានការសាងសង់ទំនប់វារីអគ្គិសនីនៅតំបន់នោះ និងចង់បង្ហាញសារនេះទៅមន្ត្រីស្ថានទូតចិន បើទោះបីមានការរាំងពីអាជ្ញាធរយ៉ាងណាក្តី។
សមាជិកម្នាក់នៃចលនាកូនខ្មែរអ្នកស្នេហាជាតិ គឺព្រះតេជព្រះគុណ លី ច័ន្ទនេន គង់នៅវត្តស្ទឹងមានជ័យ មានថេរដីកាពេលអាជ្ញាធរបណ្ដេញចេញនោះ ដោយថ្កោលទោសអាជ្ញាធរ ព្រមទាំងបញ្ជាក់ពីគោលបំណងនៃការធ្វើកូដកម្មនេះ គឺមិនធ្វើឲ្យប៉ះពាល់សណ្ដាប់ធ្នាប់សាធារណៈឡើយ៖ «ថ្ងៃនេះយើងធ្វើកូដកម្មបង្អត់អាហារ ដើម្បីប្រឆាំងក្រុមហ៊ុនស៊ីណូហាយដ្រូរបស់ចិន ដែលមករៀបចំធ្វើនៅស្រុកខ្មែរ ដើម្បីកាប់ព្រៃឈើរបស់ខ្មែរយករ៉ែមាស រ៉ែត្បូងរបស់យើងដែរ»។
ប៉ុន្តែ សកម្មភាពនេះនៅតែរារាំងដោយកងកម្លាំងចម្រុះអាជ្ញាធរខណ្ឌចំការមន និងក្រុមសន្តិសុខជាច្រើនរយនាក់ បណ្ដេញព្រះសង្ឃចំនួន ៦អង្គ និងអ្នកការពារបរិស្ថានម្នាក់ អោយចេញពីខាងមុខស្ថានទូតចិន និងរារាំងមិនអោយក្រុមនោះធ្វើការតវ៉ាដោយសន្តិវិធីបានឡើយ នៅព្រឹកថ្ងៃទី១៣ ខែកញ្ញា។ មុនមានការបណ្ដេញនោះ ក្រុមព្រះសង្ឃបានលើកបង្ហាញរូបគំនូរព្រះពុទ្ធអង្គ និងស្រែកទាមទារអោយក្រុមហ៊ុនចិន បញ្ឈប់គម្រោងវារីអគ្គិសនីនៅស្ទឹងអារ៉ែង។ ពួកគេក៏បានត្រៀមសម្ភារៈមួយចំនួន សម្រាប់អង្គុយ ឬគង់ធ្វើកូដកម្មដោយបង្អត់អាហារនៅខាងមុខស្ថានទូតចិន។ ប៉ុន្តែ ត្រូវក្រុមអាជ្ញាធរបណ្ដេញភ្លាមៗ អោយចេញពីខាងមុខស្ថានទូត។ បន្ទាប់មក ក្រុមដដែលនេះក៏បានទៅស្រែកទាមទារនៅខាងមុខមណ្ឌលកម្សាន្ត ផាកវ៉េ (Park way) ដែលនៅមិនឆ្ងាយប៉ុន្មានពីស្ថានទូតចិន។
អភិបាលរងខណ្ឌចំការមន លោក ជ គឹមស៊ ដែលដឹកនាំក្រុមសមត្ថកិច្ចចុះហាមឃាត់នោះ បាននិមន្តព្រះសង្ឃឲ្យទៅតវ៉ានៅទីលានប្រជាធិបតេយ្យ ដើម្បីកុំឲ្យខូចសណ្ដាប់ធ្នាប់សាធារណៈ។
ចំណែកក្រុមព្រះសង្ឃ ក៏តវ៉ាដោយបញ្ជាក់ពីហេតុផលមួយចំនួនទាក់ទងនឹងបម្រាមរបស់សាលារាជធានីភ្នំពេញ ប៉ុន្តែហេតុផលនេះ អាជ្ញាធរមិនទទួលយកឡើយ ហើយក៏ប្រកាសប្រើវិធានការរដ្ឋបាលបណ្ដេញចេញតែម្តង៖ «ករុណាសូមព្រះវរណាព្រះអង្គម្តងហើយម្តងទៀត បើព្រះអង្គមិននិមន្ត ករុណានឹងចាត់វិធានការរដ្ឋបាលហើយ កុំបន្ទោសថាអាជ្ញាធរខ្វះគុណធម៌ជាមួយព្រះសង្ឃ...»។
វិធានការរដ្ឋបាលនោះមានចាប់យកទូរស័ព្ទអ្នករាយការណ៍ព័ត៌មានបោកចោល និងចាប់យកមេក្រូពីក្រុមព្រះសង្ឃមិនមានសង្ឃដីកាស្រែកតវ៉ា និងបានប្រើកម្លាំងសន្តិសុខរុញច្រានបណ្ដើរក្រុមតវ៉ានោះ ដើររហូតដល់ទីលានប្រជាធិបតេយ្យជិតវត្តភ្នំ។
ព្រះតេជព្រះគុណ លី ច័ន្ទនេន បានហៅការបណ្ដេញមិនឲ្យមានការតស៊ូមតិនេះ ជាការប្រើអំពើហិង្សាបំបិទសិទ្ធិសេរីភាពរបស់ប្រជាពលរដ្ឋ ក្នុងការសម្ដែងមតិការពារធនធានធម្មជាតិ កុំឲ្យវិនាសបាត់បង់៖ «យើងយល់ឃើញថា រដ្ឋាភិបាលមួយនេះជារដ្ឋាភិបាលខ្ញុំកញ្ជះរបស់ចិនកុម្មុយនិស្តយ៉ាងដាច់ថ្លៃ ហើយបានប្រើប្រាស់កងកម្លាំងសន្តិសុខ ដើម្បីបង្ក្រាបពួកយើង កញ្ឆក់បដា កញ្ឆក់ក្បាលមីក្រូរបស់ពួកយើង»។
សាលារាជធានីភ្នំពេញ កាលពីថ្ងៃសុក្រ ទី១២ ខែកញ្ញា បានសម្រេចបដិសេធសំណើរបស់ក្រុមព្រះសង្ឃ ដែលសុំធ្វើកូដកម្មបង្អត់អាហារនៅខាងមុខស្ថានទូតសាធារណរដ្ឋប្រជាមានិតចិន រយៈពេលពេញមួយថ្ងៃទី១៣ កញ្ញា ដោយចាប់ផ្ដើមពីម៉ោង ៩ព្រឹក បញ្ចប់ទៅវិញនៅម៉ោង ៥ល្ងាច។ កូដកម្មនេះមានបំណងស្នើអោយក្រុមហ៊ុនចិន ស៊ីណូហាយដ្រូ បញ្ឈប់គម្រោងវារីអគ្គិសនីស្ទឹងអារ៉ែង ក្នុងស្រុកថ្មបាំង ខេត្តកោះកុង។
ទន្ទឹមគ្នានេះ អាជ្ញាធរក៏បានដាក់កម្លាំងយាមឃ្លាំមើលវត្តពីរ ដែលមានសកម្មភាពអ្នកតវ៉ាជាព្រះសង្ឃចេញតស៊ូមតិ ពាក់ព័ន្ធនឹងរឿងរ៉ាវមិនប្រក្រតីមួយចំនួនក្នុងសង្គម មានដូចជា វត្តស្ទឹងមានជ័យ និងវត្តសាមគ្គីរង្សី ជាដើម៕
វីដេអូ៖ អាជ្ញាធររារាំងព្រះសង្ឃបង្អត់អាហារនៅទូតចិន
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។