អធិការស្រុកបរិបូរណ៍ខេត្តកំពង់ឆ្នាំងរងការចោទថាប្រព្រឹត្តអំពើពុករលួយ
2017.02.21
អធិការនគរបាលស្រុកបរិបូរណ៍ ខេត្តកំពង់ឆ្នាំង រងការចោទថា បានប្រព្រឹត្តអំពើពុករលួយ និងរត់ការដំឡើងឋានន្តរស័ក្ដិផ្ទាល់ខ្លួន ដើម្បីមានឱកាសបន្តកាន់តំណែងជាអធិការស្រុកបន្តទៅទៀត នៅគ្រាដែលអធិការរូបនេះត្រូវថ្នាក់លើឲ្យរៀបចំបែបបទចូលនិវត្តន៍ហើយនោះ។ ប៉ុន្តែអធិការស្រុកបរិបូរណ៍ លោក ជាង សុវណ្ណារិទ្ធ បដិសេធចំពោះការចោទប្រកាន់នេះ។
សារអ៊ីមែលលើកទីពីរ ដែលបុគ្គលម្នាក់សុំលាក់អត្តសញ្ញាណ ហើយអះអាងថាជាកូនចៅរបស់លោក ជាង សុវណ្ណារិទ្ធ ផ្ញើមកកាន់អាស៊ីសេរី កាលពីថ្ងៃទី១៩ ខែកុម្ភៈ បានបើកកកាយរឿងអាស្រូវពុករលួយ និងទង្វើខុសឆ្គងរបស់មេខ្លួនជាបន្តបន្ទាប់។
នៅក្នុងសារនេះ បានចោទលោកអធិការ ថាកំពុងរត់ការដំឡើងឋានន្តរស័ក្ដិពីវរសេនីយ៍ទោ ឬស័ក្ដិបួនកន្លះ ទៅស័ក្ដិប្រាំ។ បើតាមច្បាប់ នគរបាលដែលមានស័ក្ដិប្រាំ អាចពន្យារពេលបានប្រាំឆ្នាំទៀត មុននឹងដាក់ឲ្យចូលនិវត្តន៍។ ក្រៅពីរឿងរត់ការដំឡើងស័ក្ដិ លោក ជាង សុវណ្ណារិទ្ធ ក៏បានយកម៉ូតូរបស់ជនរងគ្រោះដែលគ្រោះថ្នាក់ចរាចរណ៍ និងកុំព្យូទ័ររបស់អង្គភាព ទៅឲ្យកូនស្រីប្រើប្រាស់ដែរ។
ឆ្លើយតបនឹងការចោទប្រកាន់នេះ អធិការនគរបាលស្រុកបរិបូរណ៍ លោក ជាង សុវណ្ណារិទ្ធ ថាលោកពិតជាយកម៉ូតូជនរងគ្រោះម៉ាកហុងដាស៊េរី ២០០៧ ទៅជិះធ្វើការងារមែន តែមិនមែនសម្រាប់កូនស្រីជិះនោះទេ ហើយបើម្ចាស់ម៉ូតូសម្របសម្រួលគ្នាត្រូវពេលណា លោកនឹងប្រគល់ឲ្យគេវិញ។ ចំណែករឿងកុំព្យូទ័រវិញ គឺលោកជំទាវ ស៊ឹង ស៊ីយុត ប្រគល់ឲ្យលោកទុកគ្រាន់ប្រើប្រាស់ផ្ទាល់ខ្លួនប៉ុណ្ណោះ៖ «កូនខ្ញុំជិះអា ០៩ របស់ខ្ញុំទិញតើ! មានពាក់ព័ន្ធអីបង! ខ្ញុំជិះរបស់ខ្ញុំ គ្រាន់តែធ្វើការងារតើ! ជិះធ្វើការងារមួយរយៈ ហើយមិនមែនតែមួយណា កូនចៅខ្ញុំដែលអត់ៗម៉ូតូ គាត់ជិះដែរតើ។ អ្នកណាគេចោទប្រកាន់បង! ក្រោយៗសុំហត្ថលេខាគេមើលបងដូចជាចង់ដឹងអ្នកចោទប្រកាន់ហ្នឹងណាស់រាល់ថ្ងៃ»។
ចំពោះរឿងរត់ការដំឡើងឋានន្តរស័ក្ដិវិញ លោក ជាង សុវណ្ណារិទ្ធ បដិសេធថា លោកពុំមានលុយកាក់ទៅពឹងពាក់អ្នកនៅភ្នំពេញ ដើម្បីទទួលបានការដំឡើងស័ក្ដិប្រាំនោះទេ។ ប៉ុន្តែថ្មីៗនេះ លោកពិតជាទទួលដំណឹងថា លោកនឹងត្រូវដំឡើងទៅជាវរសេនីយ៍ឯក ឬស័ក្ដិប្រាំមែន។ លោកថា លោក ស ខេង ក៏ធ្លាប់ប្រកាសថា តំណែងអធិការស្រុកនឹងត្រូវដំឡើងទៅវរសេនីយ៍ឯកទាំងអស់៖ «ខ្ញុំអត់បានរត់ការទៅណាទេបងអើយ! ខ្ញុំមានលុយណារត់ការបង។ ប៉ុន្តែស័ក្ដិហ្នឹងប្រហែលវាត្រូវឡើងហើយ ព្រោះក្រឡាហោម (លោក ស ខេង) ថាឲ្យអធិការឡើងស័ក្ដិប្រាំ។ បើសិនសម្ដេចឲ្យឡើងពាក់ស័ក្ដិប្រាំដូចសម្ដេចមានអនុសាសន៍អ៊ីចឹង អាហ្នឹងអាចថាខ្ញុំធ្វើបានតទៅទៀត បើសិនជាអត់ទេ រ៉ឺត្រែត (ចូលនិវត្តន៍) ឆ្នាំណារឿងរបស់សម្ដេចចុះហត្ថលេខាឲ្យខ្ញុំចូលនិវត្តន៍តើ»។
ទាក់ទងបញ្ហានេះដែរ ស្នងការនគរបាលខេត្តកំពង់ឆ្នាំង លោក ឡុច សុវណ្ណរ៉ា ធ្លាប់បញ្ជាក់ថា លោកបានទទួលលិខិតសម្រេចរបស់អគ្គនាយកដ្ឋានបុគ្គលិកកាលពីថ្ងៃទី៩ ខែកុម្ភៈ ហើយបានចាត់ចែងឲ្យមន្ត្រីផ្នែកបុគ្គលិកធ្វើលិខិតទៅសាមីខ្លួនដែលមានឈ្មោះត្រូវរៀបចំសំណុំបែបបទចូលនិវត្តន៍ហើយ។ លោកបដិសេធថា មិនបានឃុបឃិត ឬចង់រក្សាមន្ត្រីណាម្នាក់មិនឲ្យចូលនិវត្តន៍តាមច្បាប់កំណត់ទេ។
លិខិតមួយច្បាប់ចុះថ្ងៃទី២៧ ខែមករា ឆ្នាំ២០១៧ របស់អគ្គនាយកដ្ឋានបុគ្គលិកនៃអគ្គស្នងការដ្ឋាននគរបាលជាតិ តម្រូវឲ្យមន្ត្រីនគរបាលនៅខេត្តកំពង់ឆ្នាំង ចំនួន ១២រូប ដែលមានអាយុ ៥៥ឆ្នាំ ឬកើតនៅឆ្នាំ១៩៦២ ដើម្បីរៀបចំសំណុំបែបបទចូលនិវត្តន៍។ លិខិតដដែលបង្ហាញថា អធិការស្រុកបរិបូរណ៍ លោក ជាង សុវណ្ណារិទ្ធិ មានឈ្មោះត្រូវចូលនិវត្តន៍នៅលេខរៀងលើគេក្នុងចំណោមមន្ត្រី ១២រូប៕