ប្រជាពលរដ្ឋពីរនាក់ជាម្តាយ និងកូន រស់នៅឃុំស្រែសង្គម ស្រុកកោះញែក ខេត្តមណ្ឌលគិរី ចោទប្រកាន់មន្ត្រីប៉ូលិសស្រុកពីរនាក់ ថាបានគំរាមទារប្រាក់ និងបង្ខំឲ្យពួកគាត់ធ្វើលិខិតបដិសេធថា ប្រាក់នោះគឺពួកគេស្ម័គ្រចិត្តផ្តល់ឲ្យប៉ូលិសដោយគ្មានការបង្ខិតបង្ខំ។ មន្ត្រីសិទ្ធិមនុស្សខេត្តមណ្ឌលគិរី អំពាវនាវសុំអង្គភាពប្រឆាំងអំពើពុករលួយ ស៊ើបអង្កេតករណីនេះ។
ការចោទប្រកាន់នេះ ធ្វើឡើងតាមរយៈពាក្យប្ដឹងរបស់ពលរដ្ឋទាំងពីរនាក់ម្តាយកូន នៅថ្ងៃទី៦ ខែសីហា សុំឲ្យមន្ត្រីឃ្លាំមើលសិទ្ធិមនុស្សនៃសមាគមអាដហុក (Adhoc) ខេត្តមណ្ឌលគិរី ជួយអន្តរាគមន៍ស្វែងរកយុត្តិធម៌ដល់ពួកគាត់។
ដើមចោទទាំងពីរនាក់ គឺម្តាយមានឈ្មោះ សយ សុខាន់ រស់នៅភូមិរង្សី និងកូនឈ្មោះ ហួត សំ ជាមន្ត្រីអនុរក្សដែនជម្រកសត្វព្រៃលំផាត់។ ចំណែកមន្ត្រីប៉ូលិសស្រុកដែលរងការចោទប្រកាន់ គឺលោក សៅ សុខ និងលោក អេង ធូរ។
ផ្តល់បទសម្ភាសន៍ដល់វិទ្យុអាស៊ីសេរី នៅថ្ងៃទី៤ ខែសីហា លោក ហួត សំ រៀបរាប់ថា កាលពីថ្ងៃទី២០ ខែកក្កដា លោក និងមន្ត្រីអនុរក្សពីរនាក់ទៀត បានចុះល្បាតព្រៃនៅចំណុចភូមិទោន។ ក្នុងការល្បាតនោះ ក្រុមអនុរក្សប្រទះឃើញកាំភ្លើងមួយដើម ដែលអ្នកប្រមាញ់សត្វព្រៃបោះចោល ហើយរត់គេចខ្លួន ខណៈក្រុមល្បាតបានប្រទះឃើញគេកំពុងប្រមាញ់សត្វក្នុងព្រៃ។ រហូតមកទល់នឹងថ្ងៃទី២ ខែសីហា ក្រុមល្បាតបានវិលត្រឡប់មកផ្ទះវិញ ដោយនាំមកជាមួយនូវកាំភ្លើងដែលរកឃើញក្នុងព្រៃ។ លោកបន្តថា មកដល់ផ្ទះនៅរសៀលម៉ោង ៥ ក៏មានជម្លោះជាមួយប្រពន្ធ ហើយលោកធ្វើឲ្យផ្ទុះអាវុធបីគ្រាប់ឡើងលើ ដើម្បីគំរាមប្រពន្ធ។ លុះព្រឹកឡើង ទើបឃើញប៉ូលិសស្រុកមកអញ្ជើញលោកឲ្យចូលទៅបំភ្លឺរឿងនេះ និងគំរាមឲ្យម្តាយលោករកប្រាក់មកលោះខ្លួន បើមិនដូច្នេះទេ ប៉ូលិសនឹងឃាត់ខ្លួនលោកពាក់ព័ន្ធផ្ទុះអាវុធនេះ៖ «គេមកប្រាប់និយាយជាមួយម៉ែខ្ញុំហ្នឹង តម្លៃលោះខ្លួនខ្ញុំហ្នឹង ៤ពាន់ដុល្លារ បានឲ្យចេញពីកន្លែងអធិការ។ ម៉ាក់គាត់សុំចុះរហូតដល់ ២.៥០០ដុល្លារ បានខ្ញុំបានចេញពីកន្លែងអធិការ។ បើនិយាយទៅមិនសុខចិត្តដែរ ប៉ុន្តែខ្ញុំខ្លាចគេបញ្ជូនឡើងលើទៀត»។
ចំណែកម្តាយរបស់ លោក ហួត សំ គឺអ្នកស្រី សយ សុខាន់ កត់សម្គាល់ថា ប៉ូលិសប៉ុនប៉ងដាក់ខ្នោះដៃកូនគាត់ និងគំរាមឲ្យបង់ប្រាក់ ៤ពាន់ដុល្លារជាថ្នូរបញ្ចប់រឿងក្តីមួយនេះ។ ដោយសារគ្មានប្រាក់ អ្នកស្រីបានអង្វរមន្ត្រីប៉ូលិសសុំបង់ប្រាក់ ២.៥០០ដុល្លារ ទើបប៉ូលិសយល់ព្រម។ អ្នកស្រីបន្តថា ជារឿងអយុត្តិធម៌ដែលធ្វើឲ្យអ្នកស្រីសម្រេចចិត្តប្ដឹងមកមន្ត្រីសិទ្ធិមនុស្សពីរឿងនេះ គឺមួយថ្ងៃបន្ទាប់ពីប៉ូលិសដោះលែងកូនគាត់ឲ្យមានសេរីភាពវិញ ស្រាប់តែប៉ូលិសកោះហៅគាត់ និងកូនមកគំរាមឲ្យធ្វើលិខិតបដិសេធថា បានប្រគល់ប្រាក់ដោយស្ម័គ្រចិត្ត និងគ្មានការគំរាមកំហែងពីប៉ូលិស។ ការគំរាមនេះ ធ្វើឲ្យអ្នកស្រី និងកូន បង្ខំចិត្តផ្ដិតមេដៃលើលិខិតបដិសេធនោះទៅឲ្យប៉ូលិស៖ «ប៉ូលិសហ្នឹងប្រព្រឹត្តអំពើពុករលួយឲ្យអង្គការហ្នឹងជួយអន្តរាគមន៍អ៊ីចឹងទៅ ថ្ងៃមុខថ្ងៃក្រោយកុំឲ្យរឹបអូសប្រជាជន ធ្វើបាបប្រជាជនទៀត»។
ទាក់ទិនការចោទប្រកាន់នេះ វិទ្យុអាស៊ីសេរី បានទូរស័ព្ទសុំការបញ្ជាក់ពីអធិការប៉ូលិសស្រុកកោះញែក លោក កាន់ ពេញ និងស្នងការប៉ូលិសខេត្តរតនគិរី លោក ញ៉ែម វ៉ាន្នី នៅថ្ងៃទី៦ ខែសីហា ប៉ុន្តែទូរស័ព្ទលោកទាំងពីរនាក់មិនអាចភ្ជាប់បាន។
ទោះជាយ៉ាងនេះក្តី មន្ត្រីផ្នែកអង្កេតនៃសមាគមអាដហុក ខេត្តមណ្ឌលគិរី លោក អ៊ាង ម៉េងលី ទទួលស្គាល់ថា សមាគមលោកបានទទួលពាក្យបណ្ដឹងពីករណីនេះ ប៉ុន្តែលោកមិនទាន់ចុះអង្កេតដល់មូលដ្ឋាននៅឡើយ។ លោកថា ប្រសិនរកឃើញមានអង្គហេតុគំរាមទារប្រាក់ដូចការចោទមែន គឺជារឿងអយុត្តិធម៌សម្រាប់ប្រជាពលរដ្ឋជាដើមបណ្ដឹង៖ «បើយើងរកឃើញថា រឿងហ្នឹងពិតប្រាកដដូចដែលគាត់លើកឡើង យើងនឹងអន្តរាគមន៍ទៅតុលាការ ដើម្បីតុលាការចាត់ការតាមផ្លូវច្បាប់»។
យ៉ាងណាក៏ដោយ ដើមចោទជាម្តាយ និងកូន បានចាត់ទុកទង្វើរបស់មន្ត្រីប៉ូលិសថា ជាអំពើពុករលួយ និងទាមទារឲ្យមានការដាក់ពិន័យ និងផ្ដន្ទាទោសតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។