ការបង្ហើបឲ្យដឹងនេះ ស្របពេលដែលសារព័ត៌មានក្នុងស្រុកជាច្រើនបានចុះផ្សាយព័ត៌មានថា លោក ឈូក បណ្ឌិត ត្រូវបានសមត្ថកិច្ចចាប់ខ្លួននៅខេត្តមណ្ឌលគិរី នោះ។
សមត្ថកិច្ចខេត្តមណ្ឌលគិរី បញ្ជាក់ថា មិនមានការចាប់ខ្លួនលោក ឈូក បណ្ឌិត ឡើយរហូតមកដល់ព្រលប់ថ្ងៃទី៣ ខែកក្កដា ឆ្នាំ២០១៣។ ស្របគ្នានោះ មន្ត្រីសង្គមស៊ីវិល បង្ហើបថា មានសមត្ថកិច្ចក្រសួងមហាផ្ទៃ ចំនួន ៤នាក់ កំពុងស្នាក់នៅក្នុងខេត្តមណ្ឌលគិរី ដើម្បីតាមចាប់ខ្លួនអតីតអភិបាលក្រុងបាវិត រូបនេះ។
មន្ត្រីសម្របសម្រួលអង្គការការពារសិទ្ធិមនុស្សអាដហុក (Adhoc) ប្រចាំខេត្តមណ្ឌលគិរី លោក សុខ រដ្ឋា ឲ្យដឹងថា លោកបានទទួលដំណឹងក្រៅផ្លូវការមួយពីមន្ត្រីនគរបាលក្រសួងមហាផ្ទៃ បញ្ជាក់ថា សមត្ថកិច្ចនគរបាលចំនួន ៤នាក់ ត្រូវបានបញ្ជាឲ្យចុះចាប់ខ្លួនលោក ឈូក បណ្ឌិត នៅខេត្តមណ្ឌលគិរី។ លោកបន្តថា ផ្អែកតាមប្រភពប្រាប់ថា លោក ឈូក បណ្ឌិត បានមកស្នាក់នៅក្នុងខេត្តមណ្ឌលគិរី តាំងពីថ្ងៃទី២៩ ខែមិថុនា មកម្ល៉េះ គឺរយៈពេលបីថ្ងៃបន្ទាប់ពីតុលាការខេត្តស្វាយរៀង ចេញដីកាតាមចាប់ខ្លួន។
ទោះយ៉ាងណាក្តី ព្រះរាជអាជ្ញាខេត្តមណ្ឌលគិរី លោក ឃុត សុភៀង មានប្រសាសន៍ដោយខ្លីថា មិនមានការចាប់ខ្លួន ឬក៏មានព័ត៌មានថា លោក ឈូក បណ្ឌិត ស្នាក់នៅខេត្តមណ្ឌលគិរី នោះទេ។ ចំណែកឯមន្ត្រីនគរបាលប្រចាំការនៅស្នងការខេត្តមណ្ឌលគិរី និងមន្ត្រីអាវុធហត្ថខេត្តមណ្ឌលគិរី សុទ្ធតែប្រាប់ថា មិនទាន់ទទួលបានដំណឹងពីទីកន្លែងរស់នៅរបស់លោក ឈូក បណ្ឌិត ទេ ហើយក៏មិនទាន់ឃើញមានមន្ត្រីនគរបាលពីក្រសួងមហាផ្ទៃ មកសុំសហការដើម្បីចាត់ការរឿងនេះដែរ។
យ៉ាងណាក៏ដោយ ប្រភពពីមន្ត្រីនគរបាលខ្លះដែលសុំមិនបញ្ចេញឈ្មោះ ព្រលយពាក្យថា លោក ឈូក បណ្ឌិត ពិតជាកំពុងស្នាក់នៅក្នុងភូមិគ្រឹះមួយក្នុងខេត្តមណ្ឌលគិរី។ ម្ចាស់ភូមិគ្រឹះនោះមិនមែនជាមន្ត្រីដែលធ្វើការក្នុងខេត្តនេះទេ តែជាបុគ្គលមានប្រាក់ និងមានអំណាចម្នាក់ រស់នៅភ្នំពេញ ហើយមានផ្ទះនៅខេត្តនេះដែលមិនមានសមត្ថកិច្ចខេត្តណាអាចហ៊ានប៉ះពាល់ឡើយ។
កាលពីថ្ងៃទី២៥ ខែមិថុនា តុលាការខេត្តស្វាយរៀង បានប្រកាសសាលក្រមផ្ដន្ទាទោសលោក ឈូក បណ្ឌិត កំបាំងមុខឲ្យជាប់ពន្ធនាគាររយៈពេល ១ឆ្នាំកន្លះ និងពិន័យជាប្រាក់ជាច្រើនលានរៀល ក្នុងសំណុំរឿងបាញ់កម្មករឲ្យរបួស កាលពីដើមឆ្នាំ២០១២។ ក្រោយពីប្រកាសសាលក្រមមួយថ្ងៃ គឺនៅថ្ងៃទី២៦ មិថុនា ព្រះរាជអាជ្ញាអមសាលាដំបូងខេត្តស្វាយរៀង លោក ហ៊ីង ប៊ុនជា បានចេញដីកាឲ្យប៉ូលិសតាមចាប់ខ្លួនលោក ឈូក បណ្ឌិត យកមកអនុវត្តទោសក្នុងពន្ធនាគារ។
តាមនីតិវិធីច្បាប់ បើសិនជាសមត្ថកិច្ចចាប់ខ្លួនលោក ឈូក បណ្ឌិត បានមែននោះ សមត្ថកិច្ចត្រូវនាំទៅកាន់តុលាការខេត្តស្វាយរៀង ដើម្បីប្រគល់ភារកិច្ចឲ្យព្រះរាជអាជ្ញាចាត់ការដាក់គុកតាមអំណាចសាលក្រម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។