មន្ត្រីសង្គមស៊ីវិល និងមន្ត្រីរាជការខេត្តព្រះសីហនុ ថ្លែងថា ក្រុមហ៊ុន រ៉ូយ៉ាល់ គ្រុប (Royal Group) របស់លោកឧកញ៉ា គិត ម៉េង នៅបន្តសកម្មភាពសាងសង់ផែថ្មមានទីតាំងនៅភូមិ៦ សង្កាត់៤ ក្រុងព្រះសីហនុ ដដែល ទោះបីប្រធានគណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា បានចេញលិខិតណែនាំកាលពីថ្ងៃទី២០ ខែមករា ឲ្យក្រុមហ៊ុននេះបញ្ឈប់ការសាងសង់ និងត្រូវរៀបចំទីតាំងឆ្នេរអូរត្រេះ ឲ្យមានសភាពដូចដើមវិញបែបណាក្តី។
ចំណែកតំណាងក្រុមហ៊ុន រ៉ូយ៉ាល់ គ្រុប និយាយថា ក្រុមហ៊ុនត្រៀមសហការជាមួយអាជ្ញាធរខេត្តព្រះសីហនុ និងរាជរដ្ឋាភិបាលជានិច្ច។ បញ្ហានេះ អភិបាលខេត្តព្រះសីហនុ ឲ្យដឹងថា នឹងបើកកិច្ចប្រជុំរវាងមន្ត្រីជំនាញនៅតាមស្ថាប័នពាក់ព័ន្ធក្រោមឱវាទខេត្ត ជាមួយតំណាងក្រុមហ៊ុន ដើម្បីចុះបញ្ឈប់សកម្មភាពសាងសង់ក្នុងពេលឆាប់ៗ។
មន្ត្រីសង្គមស៊ីវិល និងប្រជាពលរដ្ឋខេត្តជាប់សមុទ្រមួយនេះ ចាត់ទុកសកម្មភាពបន្តសាងសង់ផែថ្មដោយក្រុមហ៊ុន រ៉ូយ៉ាល់ គ្រុប ថាកំពុងផ្គើនទៅនឹងលិខិតចុះថ្ងៃទី២០ ខែមករា របស់រាជរដ្ឋាភិបាល ដែលបញ្ឈប់មិនឲ្យក្រុមហ៊ុននេះបន្តសង់ផែថ្មនៅលើឆ្នេរអូរត្រេះ។
មន្ត្រីសម្របសម្រួលនៃសមាគមអាដហុក (ADHOC) ខេត្តព្រះសីហនុ អ្នកស្រី ជៀប សុធារី បានស្នើដល់អភិបាលខេត្តព្រះសីហនុ លោក យន្ត មីន ត្រូវចុះអនុវត្តបញ្ឈប់សកម្មភាពសង់ផែថ្មរបស់ក្រុមហ៊ុន រ៉ូយ៉ាល់ គ្រុប ចេញពីឆ្នេរអូរត្រេះ ឲ្យមានប្រសិទ្ធភាព។ ជាងនេះ លោកថា អភិបាលខេត្តព្រះសីហនុ អាចប្រើប្រព័ន្ធតុលាការដើម្បីបញ្ឈប់សកម្មភាពសង់ផែកប៉ាល់ ឬផែទូករបស់ក្រុមហ៊ុន រ៉ូយ៉ាល់ គ្រុប ចេញពីតំបន់ឆ្នេរអូរត្រេះ ទើបមានប្រសិទ្ធភាព៖ «អាជ្ញាធរខេត្តគួរតែប្ដឹងទៅកាន់តុលាការ ពីព្រោះនីតិវិធីច្បាប់ដើម្បីបញ្ឈប់សកម្មភាពសាងសង់ណាមួយដែលល្មើសច្បាប់ អាជ្ញាធរខេត្តមានសិទ្ធិប្ដឹងទៅកាន់តុលាការ ព្រោះមានតែស្ថាប័នតុលាការទេដែលអាចមានសិទ្ធិអំណាចដឹកនាំផ្អាកការសាងសង់ផែនេះបានឆាប់»។
ទាក់ទិនការសាងសង់ផែថ្មរបស់ក្រុមហ៊ុន រ៉ូយ៉ាល់ គ្រុប នេះដែរ ប្រជាពលរដ្ឋ និងមន្ត្រីរាជការខេត្តព្រះសីហនុ ក៏បានរិះគន់ថ្នាក់ដឹកនាំរដ្ឋាភិបាលកម្ពុជា និងអាជ្ញាធរខេត្តព្រះសីហនុ ដែលបណ្តោយឲ្យមានសកម្មភាពសង់ផែថ្មរបស់ក្រុមហ៊ុនឯកជនចេញជារូបរាង និងបំផ្លាញដល់បរិស្ថានតំបន់ឆ្នេរអូរត្រេះ ទើបមានកិច្ចអន្តរាគមន៍ពេលនេះ។
ប្រធានអង្គការស្រាវជ្រាវជាតិកម្ពុជា ហៅកាត់ថា ស៊ីអ៊ិនរ៉ូ (CNRO) សាខាខេត្តព្រះសីហនុ លោក សុខ សុខុម ដែលបានចុះពិនិត្យផ្ទាល់ដល់ទីតាំងឆ្នេរអូរត្រេះ នៅព្រឹកថ្ងៃទី២១ ខែមករា បានអះអាងថា ក្រុមហ៊ុន រ៉ូយ៉ាល់ គ្រុប មិនទាន់បញ្ឈប់ការសាងសង់ផែថ្មរបស់ខ្លួននៅឡើយ ទោះបីមានលិខិតចុះថ្ងៃទី២០ ខែមករា របស់រាជរដ្ឋាភិបាល ឲ្យបញ្ឈប់សកម្មភាពសាងសង់បែបណាក្តី៖ «អាជ្ញាធរខេត្តព្រះសីហនុ មានបទបញ្ជាក្នុងដៃត្រឹមត្រូវហើយ ហេតុអ្វីបានជាបណ្តោយឲ្យក្រុមហ៊ុន រ៉ូយ៉ាល់ គ្រុប នៅបន្តសាងសង់ផែថ្មីនៅលើឆ្នេរអូរត្រេះ ដដែល។ ដូច្នេះ ទង្វើនេះបញ្ជាក់ឲ្យឃើញថា កាន់តែផ្គើនទៅនឹងសេចក្តីសម្រេចរបស់រាជរដ្ឋាភិបាលខ្លាំងថែមទៀត។ ក្នុងនាមមន្ត្រីសង្គមស៊ីវិល ចង់មើលឃើញការអនុវត្តច្បាប់ឲ្យមានប្រសិទ្ធភាពទាំងអ្នកមានទាំងអ្នកក្រ មិនមែនច្បាប់អនុវត្តតែទៅលើអ្នកក្រ រីឯអ្នកមានចេះតែសាងសង់បំពានលើដីសាធារណៈរបស់រដ្ឋបាននោះទេ។ សូមឲ្យការអនុវត្តច្បាប់ឲ្យបានស្មើភាពទាំងអ្នកមាន និងអ្នកក្រ ឲ្យបានស្មើភាពគ្នាចំពោះមុខច្បាប់»។
ចំណែកមន្ត្រីសម្របសម្រួលនៃអង្គការលីកាដូ (LICADHO) ខេត្តព្រះសីហនុ លោក ប៊ួន ណារិទ្ធិ បានស្នើដល់ លោក យន្ត មីន អភិបាលខេត្តព្រះសីហនុ ត្រូវកោះអញ្ជើញមន្ត្រីជំនាញនៅតាមស្ថាប័នពាក់ព័ន្ធ ចុះបញ្ឈប់សកម្មភាពសង់ផែថ្មរបស់ក្រុមហ៊ុន រ៉ូយ៉ាល់ គ្រុប ចេញពីឆ្នេរអូរត្រេះ ឲ្យមានប្រសិទ្ធភាព៖ «ប្រជាជនខេត្តព្រះសីហនុ កំពុងទន្ទឹងរង់ចាំមើលសកម្មភាពរបស់អាជ្ញាធរខេត្តព្រះសីហនុ ហ៊ានចេញមុខអនុវត្តតាមលិខិតរបស់រាជរដ្ឋាភិបាល ក្នុងការបញ្ឈប់ការរុះរើផែថ្មក្រុមហ៊ុន រ៉ូយ៉ាល់ គ្រុប បានដែរឬទេ»។
អភិបាលខេត្តព្រះសីហនុ លោក យន្ត មីន ផ្តល់បទសម្ភាសន៍ដល់អ្នកយកព័ត៌មានវិទ្យុ និងទូរទស្សន៍អាស៊ីសេរី នៅព្រឹកថ្ងៃទី២១ ខែមករា ថា អាជ្ញាធរត្រៀមប្រជុំមន្ត្រីជំនាញនៅតាមស្ថាប័នពាក់ព័ន្ធនានាក្នុងខេត្តនេះ ដើម្បីចុះបញ្ឈប់សកម្មភាពសាងសង់ឲ្យស្របតាមលិខិតរបស់រាជរដ្ឋាភិបាល។
ទាក់ទិនបញ្ហានេះ តំណាងក្រុមហ៊ុន រ៉ូយ៉ាល់ គ្រុប គឺលោកឧកញ៉ា ឈុន ប៊ុនថា បានផ្តល់បទសម្ភាសន៍ដល់វិទ្យុអាស៊ីសេរី នៅថ្ងៃទី២១ ខែមករា ដោយមិនធ្វើអត្ថាធិប្បាយច្រើនទេជុំវិញការចេញលិខិតរបស់រាជរដ្ឋាភិបាលឲ្យបញ្ឈប់ការសាងសង់ផែនៅលើឆ្នេរអូរត្រេះ ដោយនិយាយថា ក្រុមហ៊ុន រ៉ូយ៉ាល់ គ្រុប ត្រៀមសហការជាមួយអាជ្ញាធរខេត្ត និងរាជរដ្ឋាភិបាលជានិច្ច៖ «រឿងនេះវាអាស្រ័យថ្នាក់លើជាអ្នកសម្រេចទេ។ ថ្នាក់លើចេញលិខិតមកវាអាស្រ័យលើលោកអភិបាលខេត្តជាអ្នកអនុវត្ត គឺខាងក្រុមហ៊ុនមិនមានអ្វីមកជំទាស់នោះទេ»។
ក្នុងលិខិតចុះថ្ងៃទី២០ ខែមករា របស់ លោក អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ផ្ញើជូន លោក យន្ត មីន អភិបាលខេត្តព្រះសីហនុ គឺមិនអនុញ្ញាតឲ្យក្រុមហ៊ុន រ៉ូយ៉ាល់ គ្រុប ដែលស្នើសុំសង់ផែទូក ឬកប៉ាល់សម្រាប់បម្រើឲ្យការអភិវឌ្ឍកោះរ៉ុងនៅលើទីតាំងឆ្នេរអូរត្រេះ បានទេ។ បន្ថែមលើនេះ លិខិតរាជរដ្ឋាភិបាល ក៏បានតម្រូវឲ្យ លោក យន្ត មីន ត្រូវណែនាំឲ្យក្រុមហ៊ុន រ៉ូយ៉ាល់ គ្រុប បញ្ឈប់ការសាងសង់ផែថ្មនៅលើឆ្នេរអូរត្រេះ ជាបន្ទាន់ និងត្រូវរៀបចំទីតាំងឆ្នេរអូរត្រេះ ឲ្យមានសភាពដូចដើមវិញ។
លោក អ៊ឹម ឈុនលឹម សង្កត់ធ្ងន់ថា ទីតាំងតំបន់ឆ្នេរអូរត្រេះ គឺមិនអនុញ្ញាតឲ្យមានសំណង់រឹងមាំសង់នៅលើឆ្នេរនេះទេ ព្រោះរាជរដ្ឋាភិបាលមានគោលការណ៍ឲ្យរៀបចំឆ្នេរអូរត្រេះ ជាឆ្នេរគំរូសម្រាប់បម្រើដល់វិស័យទេសចរណ៍ និងបរិស្ថានតំបន់ឆ្នេរ ដោយត្រូវបង្កករាល់ការសាងសង់លើដីចំណីសមុទ្រនៅតំបន់នោះ ព្រមទាំងត្រូវសិក្សារកវិធានការ ដើម្បីរុះរើសំណង់អនាធិបតេយ្យចេញពីទីតាំងដីចំណីឆ្នេរអូរត្រេះ ថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។