អាជ្ញាធរខេត្តព្រះសីហនុ បានទុកពេល ២ថ្ងៃ តម្រូវឲ្យប្រជាសហគមន៍ឆ្នេរអូរឈើទាល អតីតក្រុមហ៊ុនអារីស្តុន ចំនួន ៣២តូប ឲ្យរុះរើស្តង់ ឬតូបលក់ដូរដែលអាជ្ញាធរចាត់ទុកថា ពួកគាត់មកបោះតង់ទន្ទ្រានលើដីឆ្នេរអូរឈើទាល មានទីតាំងនៅទល់មុខក្រុមហ៊ុនសុខា ស្ថិតក្នុងសង្កាត់លេខ៤ អតីតក្រុមហ៊ុនអារីស្តុន។ ប៉ុន្តែក្រុមប្រជាពលរដ្ឋនៅសហគមន៍នេះ មិនព្រមចាកចេញតាមលិខិតជូនដំណឹងរបស់អាជ្ញាធរក្រុងព្រះសីហនុទេ ដោយស្នើរង់ចាំដំណោះស្រាយពីមន្ត្រីស្ថាប័នរដ្ឋសភា និងលោកនាយករដ្ឋមន្ត្រី ហ៊ុន សែន ឲ្យជួយដោះស្រាយសិន។
អភិបាលក្រុងព្រះសីហនុ លោក ជិន សារិន បានចេញសេចក្តីជូនដំណឹងដល់ប្រជាពលរដ្ឋ ៣២គ្រួសារ ដែលបានបោះតង់ទន្ទ្រានលើដីឆ្នេរអូរឈើទាល អតីតក្រុមហ៊ុនអារីស្តុន ដោយទុករយៈពេល ២ថ្ងៃ ចាប់ពីថ្ងៃទី១ ដល់ថ្ងៃទី២ ខែកក្កដា ត្រូវរុះរើស្តង់ ឬតូបលក់ដូរចេញពីទីតាំងនេះជាបន្ទាន់ បើមិនដូច្នេះទេ អាជ្ញាធរនឹងដាក់កម្លាំងចម្រុះចុះរុះរើ ហើយមិនទទួលខុសត្រូវរាល់ការបាត់បង់សម្ភារៈផ្សេងៗនោះទេ។
ទាក់ទិនបញ្ហានេះ កន្លងមកអាជ្ញាធរខេត្តព្រះសីហនុ បានណែនាំប្រជាពលរដ្ឋទាំង ៣២គ្រួសារ ឲ្យទទួលយកថវិកាចំនួន ៣.៥០០ដុល្លារសហរដ្ឋអាមេរិក ដែលអាជ្ញាធរខេត្តផ្ដល់ជូនជាថ្នូរនឹងការចាកចេញពីតំបន់នោះ។ ប៉ុន្តែត្រូវប្រជាពលរដ្ឋបដិសេធ ដោយអះអាងថា ទីតាំងលក់ដូរនៅតំបន់អារីស្តុននោះ គឺពួកគាត់ធ្លាប់មកលក់ដូរតាំងពីឆ្នាំ២០០៧ មក ហើយត្រូវក្រុមហ៊ុនសុខា និងអាជ្ញាធរខេត្តនេះ ប្រើកម្លាំងបង្ខំបណ្ដេញឲ្យចាកចេញទាំងមិនទាន់មានសំណង និងបំផ្លាញសម្ភារៈលក់ដូរអស់រាប់ម៉ឺនដុល្លារកន្លងមក។
តំណាងសហគមន៍ឆ្នេរអូរឈើទាល លោកស្រី ភឿក សុខេន ឲ្យដឹងថា ពួកគាត់ទាំង ៣២តូប មិនចាកចេញពីទីតាំងលក់ដូរ និងមិនទទួលយកថវិកាដែលអាជ្ញាធរខេត្តផ្តល់ជូន ៣.៥០០ដុល្លារនោះទេ ព្រោះមានចំនួនតិចពេក។ លោកស្រីស្នើដល់រដ្ឋសភា ពិសេសលោកនាយករដ្ឋមន្ត្រី ហ៊ុន សែន ឲ្យជួយអន្តរាគមន៍លើករណីនេះ៖ «រឿងនេះវាអយុត្តិធម៌ចំពោះពលរដ្ឋបំផុត គឺនៅពេលដែលអាជ្ញាធរ និងក្រុមហ៊ុនមកឈូសកម្ទេចតូប និងសម្ភារៈលក់ដូររបស់ប្រជាពលរដ្ឋពួកគាត់អស់រាប់ម៉ឺនដុល្លារ កាលពីឆ្នាំ២០០៦។ ក្រុមហ៊ុន ឬអាជ្ញាធរខេត្តព្រះសីហនុ មិនដែលបានហៅពលរដ្ឋទៅដោះស្រាយសំណងទេជាង ១០ឆ្នាំមកនេះ ទើបតែពេលនេះទេ បានចេញមុខមកដោះស្រាយជាមួយពលរដ្ឋដោយផ្តល់លុយត្រឹម ៣.៥០០ដុល្លារក្នុងមួយគ្រួសារៗ ប៉ុន្តែពលរដ្ឋពួកខ្ញុំមិនទទួលយកសំណងនេះទេ ព្រោះតិចពេក»។
ក្រុមអាជីវករផ្សេងទៀតក៏បានសំណូមពរដល់ប្រមុខដឹកនាំរដ្ឋាភិបាល ជួយពួកគាត់បានលក់ដូរនៅលើទីឆ្នេរអូរឈើទាល ឬអតីតក្រុមហ៊ុនអារីស្តុន ដែលបច្ចុប្បន្នត្រូវក្រុមហ៊ុនសុខា ធ្វើរបងថ្មហ៊ុមព័ទ្ធបិទឆ្នេរនេះ បានលក់ដូរដោយគ្មានការបង្ខំឲ្យចាកចេញ៖ «ខ្ញុំចង់បានតូបលក់ដូរឡើងវិញ និងស្នើឲ្យក្រុមហ៊ុនបើករបងហ៊ុមព័ទ្ធឆ្នេរឲ្យពលរដ្ឋដើរឆ្លងកាត់ និងប្រកបមុខរបរដូចដើមវិញ»។
ទាក់ទិនបញ្ហានេះ លោក ជិន សារិន អភិបាលក្រុងព្រះសីហនុ មានប្រសាសន៍ថា ក្នុងចំណោមពលរដ្ឋទាំង ៣២គ្រួសារ មានពលរដ្ឋចំនួន ៦គ្រួសារបានព្រមទទួលយកថវិកាដែលអាជ្ញាធរផ្តល់ជូន និងបានរុះរើស្តង់លក់ដូរចេញពីចំណីដីឆ្នេរអូរឈើទាល នៅរសៀលថ្ងៃទី២ ខែកក្កដា។ យ៉ាងណាលោកមិនទាន់កំណត់ថ្ងៃដាក់កម្លាំងចម្រុះចុះរុះរើស្តង់លក់ដូររបស់ពលរដ្ឋ ដែលសេសសល់នៅតំបន់ឆ្នេរអូរឈើនេះទេ ប៉ុន្តែបានបញ្ជាក់ថា នឹងមិនអនុញ្ញាតឲ្យមានស្តង់លក់ដូរអនាធិបតេយ្យក្នុងតំបន់នោះទៀតទេ៖ «មានពលរដ្ឋ ៦គ្រួសារក្នុងចំណោម ៣២គ្រួសារ បានទទួលសំណង ៣.៥០០ដុល្លារ និងបានរុះរើតូបលក់ដូរចេញពីឆ្នេរ មុខអតីតក្រុមហ៊ុនអារីស្តុននេះហើយ ហើយអ្នកនៅសេសសល់ជាសិទ្ធិសម្រេចរបស់ពួកគាត់។ ប៉ុន្តែអាជ្ញាធរនឹងមិនទុកឲ្យតូបលក់ដូរនេះសង់នៅលើដីចំណីឆ្នេរ តំបន់នេះទៀតទេ នៅថ្ងៃខាងមុខ»។
បញ្ហានេះដែរ លោក អេង ឆៃអ៊ាង ប្រធានគណៈកម្មការទី១ នៃរដ្ឋសភា ទទួលបន្ទុកអង្កេតសិទ្ធិមនុស្ស និងពាក្យបណ្ដឹងមានប្រសាសន៍ថា ករណីនេះ តំណាងពលរដ្ឋទាំង ៣២គ្រួសារបានដាក់ឯកសារមកកាន់ស្ថាប័នខ្លួនជួយដោះស្រាយជាបន្តបន្ទាប់ ហើយស្ថាប័ននេះ ក៏បានចេញលិខិតជូនអាជ្ញាធរខេត្តព្រះសីហនុ ស្នើឲ្យផ្អាកការរុះរើតូបលក់ដូររបស់ក្រុមអាជីវករទាំងនោះ និងរង់ចាំដោះស្រាយដោយសន្តិវិធី។
លោកថា អាជ្ញាធរមុននឹងរុះរើតូបលក់ដូរ ឬបណ្ដេញពលរដ្ឋទាំង ៣២គ្រួសារ ចេញពីទីតាំងចុងឆ្នេរអូរឈើទាល ដើម្បីផ្គាប់ចិត្តក្រុមហ៊ុនសុខា គួរត្រូវរកទីតាំងលក់ដូរជូនពលរដ្ឋជាមុនសិន។
ចំណែកលោក ឃុន សាវឿន មន្ត្រីអង្កេតអង្គការលីកាដូ (Licadho) ខេត្តព្រះសីហនុ ក៏ស្នើដល់អាជ្ញាធរខេត្តនេះ ត្រូវស្វែងរកដំណោះស្រាយរវាងពលរដ្ឋសហគមន៍ឆ្នេរអូរឈើទាល ដោយសន្តិវិធី ជាជាងប្រើកម្លាំងបង្ក្រាប ឬរុះរើតូបលក់ដូរក្រុមអាជីវករទាំងបង្ខំ ឬប្រើហិង្សា៖ «ទាំងអស់នេះ រដ្ឋាភិបាល ឬអាជ្ញាធរ បើបានវិនិយោគដីតំបន់នោះទៅឲ្យក្រុមហ៊ុន ក៏គួរមានចំណែក ឬផ្តល់សំណងឲ្យបានសមរម្យដល់ប្រជាពលរដ្ឋរបស់ខ្លួនឲ្យបានត្រឹមត្រូវ ដែលរស់នៅតំបន់នោះ។ ហើយពលរដ្ឋទទួលបានសំណងសមរម្យ ពួកគាត់ពិតជាព្រមទទួលយក ហើយពួកគេមិនចង់ដើរស្រែកកណ្ដាលថ្ងៃត្រង់ដូចការទាមទារកន្លងមកនោះទេ ប៉ុន្តែពលរដ្ឋអត់ជម្រើស»។
យ៉ាងណាក៏ដោយ លោកស្រី ភឿក សុខេន តំណាងពលរដ្ឋនៅសហគមន៍ឆ្នេរអូរឈើទាល ឲ្យដឹងថា អាជ្ញាធរខេត្តព្រះសីហនុ មានគំនិតប្រើកម្លាំងចុះរុះរើតូបលក់ដូរពួកគាត់ជាបន្តបន្ទាប់ ដើម្បីផ្គាប់ចិត្តក្រុមហ៊ុនសុខា។ លោកស្រីបន្តថា ពួកគាត់ធ្លាប់លក់ដូរនៅចុងឆ្នេរអូរឈើទាលនេះ តាំងពីឆ្នាំ២០០៧ មក ហើយក៏ធ្លាប់មានចំណារពីប្រធានរដ្ឋសភា លោក ហេង សំរិន ឲ្យអាជ្ញាធរផ្អាករុះរើតង់ ឬតូបលក់ដូររបស់ពលរដ្ឋពួកគាត់ទាំង ៣២គ្រួសារនេះដែរ ដោយរង់ចាំដោះស្រាយនៅពេលក្រោយ ប៉ុន្តែអាជ្ញាធរខេត្តព្រះសីហនុ មិនអនុវត្តតាមទេ។
ត្រង់ចំណុចនេះ ប្រជាពលរដ្ឋសហគមន៍ឆ្នេរអូរឈើទាល ឲ្យដឹងថា បើគ្មានដំណោះស្រាយពីស្ថាប័នពាក់ព័ន្ធលើបញ្ហាវិវាទតូបលក់ដូរជាមួយក្រុមហ៊ុនសុខា ទេ ពួកគាត់មានគម្រោងលើកគ្នាទៅសុំកិច្ចអន្តរាគមន៍ដល់មុខផ្ទះលោកនាយករដ្ឋមន្ត្រី ហ៊ុន សែន នៅរាជធានីភ្នំពេញ ជាបន្តទៀតនៅថ្ងៃខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។