គ្រាប់កាំភ្លើងផ្លោងធុន ៨០មិល្លីម៉ែត្រ (80mm) មិនទាន់ផ្ទុះមួយគ្រាប់ ត្រូវជនមិនស្គាល់មុខយកទៅប្លុងចោលចម្ងាយប្រមាណ ៣០ម៉ែត្រពីផ្ទះរបស់មេភូមិ នៅឃុំសេនារាជឧត្តម ស្រុកព្រះស្ដេច ខេត្តព្រៃវែង កាលពីយប់ថ្ងៃទី២ មីនា។ មេភូមិនិងប្រជាពលរដ្ឋកំពុងមានការព្រួយបារម្ភភ័យខ្លាចគ្រាប់នោះផ្ទុះឡើងបង្កគ្រោះថ្នាក់ដល់អាយុជីវិតរបស់អ្នកភូមិ។
មេភូមិនិងប្រជាពលរដ្ឋអំពាវនាវសុំឲ្យអង្គការដោះមីន ស៊ីម៉ាក (CMAC) និងមន្ត្រីពាក់ព័ន្ធខាងដោះមីន និងរាំងស្កាត់គ្រាប់មិនទាន់ផ្ទុះ ជួយដោះស្រាយយកគ្រាប់កាំភ្លើង ៨០មិល្លីម៉ែត្រចេញពីតំបន់មនុស្សរស់នៅជាបន្ទាន់ ព្រោះគ្រាប់នេះបើរក្សាទុកយូរអាចក្មេងៗទៅលេងបណ្ដាលឲ្យផ្ទុះគ្រោះថ្នាក់ដល់អាយុជីវិតរបស់ប្រជាពលរដ្ឋក្បែរនោះ។
មេភូមិស្នាយប្រិម ឃុំសេនារាជឧត្តម លោក ភិត ផាន មានប្រសាសន៍បញ្ជាក់នៅថ្ងៃទី៣ មីនា ថា នៅព្រឹកថ្ងៃទី៣ មីនា ប្រជាពលរដ្ឋបានប្រទះឃើញគ្រាប់កាំភ្លើងធំធុន ៨០មិល្លីម៉ែត្រ មួយគ្រាប់ ដាក់នៅលើដីខាងលិចផ្ទះរបស់លោកចម្ងាយប្រមាណ ៣០ម៉ែត្រ។
លោក ភិន ផាន បញ្ជាក់ថា គ្រាប់នេះត្រូវជនមិនស្គាល់មុខយកមកប្លុងចោលតាមផ្លូវដើររបស់អ្នកភូមិ កាលពីយប់ថ្ងៃទី២ មីនា ឆ្នាំ២០១៤។ ក្រោយពីប្រជាពលរដ្ឋប្រទះឃើញគ្រាប់កាំភ្លើងនោះភ្លាម អ្នកភូមិក្បែរខាង ទាំងក្មេងទាំងចាស់ នាំគ្នាមកមើលជាបន្តបន្ទាប់។
លោកថា គ្រាប់នេះវាអាចនឹងបង្កគ្រោះថ្នាក់ដល់អាយុជីវិតមនុស្សបាន ប្រសិនបើពុំយកចេញទាន់ពេលវេលានោះ៖ «មិនដឹងអ្នកណាដែលជាអ្នកយកមកដាក់កណ្ដាលវាលអ៊ីចឹង ហើយដាក់ហ្នឹងមិនដាក់លាក់ទៀត។ ដាក់បង្ហាញនៅគល់ត្នោតឲ្យគេអ្នកផងទាំងពួងមើល ហើយហ្នឹង បើក្ដៅៗហើយវាផ្ទុះអ្នកបើកឡានក្បែរ អង្គើផ្ទុះហ្នឹង មិនវីវរ។ … ឲ្យអ្នកមានបច្ចេកទេសហ្នឹងលោកក្មួយឲ្យគេមកយកចេញពីកន្លែងអុំណាស់! ព្រោះអីអុំភ័យខ្លាចដែរ អារឿងការងារវាស្ងាត់ៗផ្ទុះទៅ ឲ្យខ្ញុំធ្វើម៉េច?»។
រីឯប្រជាពលរដ្ឋរស់នៅក្បែរខាងនៃកន្លែងមានគ្រាប់នោះដែរ លោក ប៊ុន ឡាក់ ថ្លែងបញ្ជាក់ថា បន្ទាប់ពីប្រទះឃើញគ្រាប់នោះភ្លាម អ្នកភូមិបានរាយការណ៍ទៅអាជ្ញាធរប៉ូលិសឲ្យចុះមកត្រួតពិនិត្យដើម្បីជូនដំណឹងទៅអាជ្ញាធរពាក់ព័ន្ធចាត់វិធានការយកគ្រាប់នោះចេញដើម្បីកុំឲ្យគ្រោះថ្នាក់ដល់អាយុជីវិតប្រជាពលរដ្ឋក្បែរនោះ ហើយអ្នកភូមិក្បែរនោះកំពុងមានការព្រួយបារម្ភខ្លាចក្មេងៗទៅលេងគ្រាប់មិនទាន់ផ្ទុះនេះបណ្ដាលឲ្យគ្រោះថ្នាក់ដល់អាយុជីវិត។
លោក ប៊ុន ឡាក់៖ «ព្រោះក្មេងវាច្រើន ដល់ហើយនៅកន្លែងប្រជុំជនអ៊ីចឹង ខ្លាចវាលេង វាដុតវាអី។ក្មេងឥឡូវរពឹសចង់ងាប់ ប្រាប់ម៉េចក៏វានៅលួចដុតលួចឮ ខ្ទុះវាសប្បាយ ដល់សេចក្ដីស្លាប់វាអត់ដឹង។ គ្រាន់តែឮថា គ្រាប់ហ្នឹងភ្លាមនាំគ្នាមកមើលរោមទាំងអស់ក្មេង»។
ទាក់ទងនឹងបញ្ហានេះ ប្រធានប៉ុស្តិ៍នគរបាលរដ្ឋបាលឃុំសេនារាជឧត្តម លោក អ៊ុក អូន មានប្រសាសន៍បញ្ជាក់ថា អាជ្ញាធរប៉ូលិសបានចុះទៅត្រួតពិនិត្យដល់ទីកន្លែង ហើយសន្និដ្ឋានថា គ្រាប់នេះជាគ្រាប់ចាស់សល់ពីសម័យសង្គ្រាមកប់ក្នុងដីយូរឆ្នាំ។ ហើយប្រជាពលរដ្ឋប្រទះឃើញមិនហ៊ានរក្សាទុកដោយខ្លាចគ្រោះថ្នាក់ដល់អាយុជីវិត រួចអាចយកមកទម្លាក់ចោលក្បែរផ្លូវដើររបស់អ្នកភូមិ ដើម្បីផ្ដល់ដំណឹងដល់អ្នកបច្ចេកទេសនាំទៅកម្ទេចចោល។
លោក អ៊ុក អូន បញ្ជាក់ថា គ្រាប់នេះអាចនឹងផ្ទុះបានគ្រប់ពេលប្រសិនបើអ្នកភូមិទៅដំ ឬដុតវាលេង។លោកបន្តថា បញ្ហានេះលោកបានទាក់ទងទៅអង្គការស៊ីម៉ាក ឲ្យចុះមកពិនិត្យមើល និងចាត់វិធានការយកគ្រាប់ចេញពីតំបន់នោះ ហើយមន្ត្រីជំនាញ និងចុះមកក្នុងពេលឆាប់ៗ។
លោក អ៊ុក អូន៖ «អ៊ីចឹងខ្ញុំផ្ដាំផ្ញើទៅដល់ប្រជាពលរដ្ឋដែលនៅក្នុងភូមិស្នាយប្រិមហ្នឹង សូមកុំឲ្យគាត់ហ្នឹងទៅក្បែរទៅជិត។ រួចគ្រាប់នេះ បើសិនទៅលេងប៉ះពាល់វាហ្នឹងអាចផ្ទុះ អ៊ីចឹងសំណូមពរប្រជាពលរដ្ឋដែលនៅក្នុងភូមិហ្នឹងកុំឲ្យទៅក្បែរ ព្រោះអីយើងខ្ញុំបានយកបន្លាយកអីទៅស្រះរួចរាល់អស់ហើយ»។
តែយ៉ាងណា អាជ្ញាធរនៅពុំទាន់យកគ្រាប់នោះទៅកម្ចាត់ចោលនៅឡើយទេ ហើយធ្វើឲ្យប្រជាពលរដ្ឋនៅតំបន់នោះមានការព្រួយបារម្ភ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។