ប្រជាពលរដ្ឋជាសាច់ញាតិជនសង្ស័យនៅស្រុកកំពង់ត្របែក ខេត្តព្រៃវែង ចោទប្រកាន់អាជ្ញាធរប៉ូលិសស្រុកនេះ ថាបានចោទពលរដ្ឋថាជាជនសង្ស័យក្នុងអំពើឃាតកម្ម និងឃុំខ្លួនអយុត្តិធម៌។ ពលរដ្ឋថ្លែងដូចនេះ បន្ទាប់ពីអាជ្ញាធរប៉ូលិសចាប់ប្រជាពលរដ្ឋជាជនសង្ស័យយកទៅឃុំខ្លួន នៅអធិការស្រុកជាច្រើនថ្ងៃមិនទាន់ដោះលែង។ ប៉ុន្តែអភិបាលស្រុកបញ្ជាក់ថា អាជ្ញាធរឃុំខ្លួនជនសង្ស័យនេះ ដោយសង្ស័យថា មានជាប់ពាក់ព័ន្ធករណីអំពើឃាតកម្មប្លន់យកម៉ូតូ កាលពីថ្ងៃទី៨ មេសា កន្លងទៅ។
ប្រជាពលរដ្ឋជាសាច់ញាតិជនសង្ស័យកំពុងមានការព្រួយបារម្ភ ខ្លាចអាជ្ញាធរប៉ូលិសគំរាមកំហែង និងវាយធ្វើបាបលើរូបរាងកាយរបស់ជនសង្ស័យ ពេលឃុំខ្លួននៅអធិការប៉ូលិសស្រុកកំពង់ត្របែក នោះ។
ប្រជាពលរដ្ឋជាក្មួយរបស់ជនសង្ស័យ លោក សុខ សុផល រស់នៅភូមិព្រៃខ្មៅ ឃុំកន្សោមអក ស្រុក កំពង់ត្របែក ថ្លែងនៅថ្ងៃទី១៣ មេសា ថា អាជ្ញាធរចាប់ជនសង្ស័យឈ្មោះ លោក ព្រាប បូ យកទៅឃុំខ្លួន ធ្វើឡើងដោយខ្វះការស៊ើបអង្កេតច្បាស់លាស់។
លោក សុខ សុផល ហៅការចាប់ខ្លួនរបស់អាជ្ញាធរប៉ូលិសនេះ ថារឿងអយុត្តិធម៌ ព្រោះប៉ូលិសចាប់ជនសង្ស័យដោយគ្មានកំហុសអ្វីខុសទាល់តែសោះ៖ «ព្រោះវាអត់មានភស្តុតាងជាក់ស្ដែង អ៊ីចឹងខ្ញុំព្រួយបារម្ភពីសុវត្ថិភាពរបស់គាត់ខ្លាចគេបញ្ជូនគាត់ទៅណោះទៅ ហើយអាយើងគ្មានកំហុសអីសោះខ្លាចគេដាក់ទោសដាក់អីអ៊ីចឹង។ ខ្ញុំព្រួយបារម្ភខ្លាចតែអ៊ីចឹង។ ខ្ញុំដឹងអត្តចរិតរបស់គាត់អីច្បាស់លាស់ សូម្បីតែមាន់គាត់មិនហ៊ានសម្លាប់ផង ហើយគាត់ហូបចុកគាត់មិនដែលហ៊ានទៅរករឿងជាមួយពីណាផង ខ្ញុំនៅជាមួយគាត់ជាង ១០ឆ្នាំហើយ»។
រីឯសាច់ញាតិជនសង្ស័យមកពីឃុំកន្សោមអកម្នាក់ទៀត គឺលោក ពៅ តេង ថ្លែងថា បងជីដូនមួយរបស់លោក ឈ្មោះលោក នៅ វ៉ា ក៏ត្រូវអាជ្ញាធរប៉ូលិសចាប់ទៅឃុំខ្លួនដែរ ដោយចោទប្រកាន់ថា ជាជនសង្ស័យជាប់ពាក់ព័ន្ធលើករណីឃាតកម្មប្លន់ម៉ូតូ នៅស្រុកកំពង់ត្របែក ខេត្តព្រៃវែង កាលពីថ្ងៃទី៨ មេសា កន្លងទៅ។
លោក ពៅ តេង ចាត់ទុក ការចោទប្រកាន់របស់អាជ្ញាធរប៉ូលិសថា ជារឿងមួយអយុត្តិធម៌មកលើប្រជាពលរដ្ឋស្លូតត្រង់គ្មានកំហុស៖ «វាអត់ភស្តុតាងហើយម្យ៉ាងគាត់មិនបានប្រព្រឹត្តហើយគាត់ក៏មិនបានពាក់ព័ន្ធជាមួយអ្នកគ្រោះថ្នាក់ហ្នឹងទេ។ ខ្ញុំគិតថា វាអយុត្តិធម៌ណាស់ចំពោះគាត់ ព្រោះគាត់ជាមនុស្សអត់ដឹងអីសោះ ហើយដល់ហើយគេនាំខ្លួន គាត់ថាស្របតាមច្បាប់តាមអីអ៊ីចឹង។ ព្រោះមនុស្សធ្លាប់រស់នៅក្នុងភូមិ ហើយគាត់មិនដែលទៅបានធ្វើអីខុសលើអ្នកណា ហើយដល់ពេលមកនាំខ្លួនគាត់ទៅអ៊ីចឹងៗ ខ្ញុំអត់សុខចិត្តទេបង!»។
វិទ្យុអាស៊ីសេរី មិនអាចទាក់ទងអធិការប៉ូលិសស្រុកកំពង់ត្របែក ដើម្បីសុំការពន្យល់ជុំវិញបញ្ហាការចាប់ឃុំខ្លួនជនសង្ស័យនេះបានទេ នៅថ្ងៃទី១៣ មេសា ដោយលើកទូរស័ព្ទហើយតែត្រូវបានបិទទៅវិញ។
ប៉ុន្តែអភិបាលស្រុកកំពង់ត្របែក លោក ចាន់ រ៉ាន់ មានប្រសាសន៍ថា អាជ្ញាធរប៉ូលិសចាប់ពលរដ្ឋទៅឃុំខ្លួនដោយសង្ស័យថា មានជាប់ពាក់ព័ន្ធលើករណីឃាតកម្មសម្លាប់បុរសម្នាក់ប្លន់យកម៉ូតូ កាលពីយប់ថ្ងៃទី៨ មេសា កន្លងទៅ។
លោកបន្តថា ករណីនេះទៅជាយ៉ាងណានោះ អាជ្ញាធរបានបញ្ជូនជនសង្ស័យទៅដោះស្រាយបន្តនៅតុលាការ៖ «ចាប់ហ្នឹងគឺចាប់តាមចម្លើយឥឡូវយើងប៉ូលិសបានបញ្ជូនជនសង្ស័យហ្នឹងទៅព្រៃវែងហើយព្រឹកមិញ ហើយហ្នឹងយ៉ាងម៉េចយ៉ាងណាទៀត ទុកឲ្យតុលាការលោកសួរចម្លើយទៅ ហើយបើមិនមានជាប់ពាក់ព័ន្ធផ្លូវច្បាប់អាចថា ដោះលែងវិញ អ៊ីចឹងទៅណាស់! ប៉ូលិសចាប់តាមការបំភ្លឺតអ៊ីចឹងទេ ប៉ុន្តែរឿងសម្រេចថា មានទោសយ៉ាងណាគឺរឿងរបស់តុលាការ»។
មន្ត្រីសម្របសម្រួលអង្គការអាដហុក (Adhoc) ប្រចាំខេត្តព្រៃវែង អ្នកស្រី អៀង គឹមលី មានប្រសាសន៍ថា អាជ្ញាធរប៉ូលិសអាចឃុំខ្លួនជនសង្ស័យបានប្រសិនបើរកឃើញថា មានជាប់ពាក់ព័ន្ធនឹងករណីឃាតកម្ម។ ប៉ុន្តែអាជ្ញាធរប៉ូលិសមិនអាចឃុំខ្លួនជនសង្ស័យដោយគ្មានដីកាពីតុលាការលើសពី ៤៨ម៉ោងឡើយ៖ «ទាំងប៉ុស្តិ៍ទាំងអធិការយ៉ាងយូរត្រឹម ៤៨ម៉ោងត្រូវបញ្ជូនឡើងមកតុលាការ មកព្រះរាជអាជ្ញា ឲ្យចេញដីកាឃុំខ្លួនបណ្ដោះអាសន្ន ដើម្បីបើការស៊ើបអង្កេតបន្តទៀតនៅចៅក្រមស៊ើបនៅតុលាការ។ បើសិនជាឃុំខ្លួនលើសអ៊ីចឹងអាហ្នឹងលើសនីតិវិធីគេអាចចាត់ទុកថាខុសច្បាប់ហើយ»។
កាលពីយប់ថ្ងៃទី៨ មេសា កន្លងទៅកើតមានករណីឃាតកម្មសម្លាប់បុរសម្នាក់ប្លន់យកម៉ូតូ នៅភូមិព្រៃខ្មៅ ឃុំកន្សោមអក ស្រុកកំពង់ត្របែក ខេត្តព្រៃវែង។ ក្រោយមកនៅថ្ងៃទី១០ មេសា ប៉ូលិសបានចាប់ជនសង្ស័យចំនួន ៩នាក់ទៅឃុំខ្លួននៅអធិការប៉ូលិសស្រុកកំពង់ត្របែក។ សាច់ញាតិជនសង្ស័យបញ្ជាក់ថា ការឃុំខ្លួនរបស់ប៉ូលិសនេះថា ជារឿងអយុត្តិធម៌ខ្វះការស៊ើបអង្កេតឲ្យបានត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។