មន្ត្រីពន្ធនាគារ ៣០នាក់ បដិសេធមិនទទួលការសម្របសម្រួលរបស់អភិបាលរងខេត្តព្រៃវែង លើជម្លោះនៃភាពមិនប្រក្រតីរបស់ប្រធានពន្ធនាគារ និងស្នើសុំឲ្យមានការដោះដូរប្រធានពន្ធនាគារចេញ បន្ទាប់ពីប្រធានរូបនោះបានប្រព្រឹត្តសកម្មភាពខុសឆ្គងមួយចំនួន ដូចជាកាត់ប្រាក់ខែ និងរបបអង្ករឧបត្ថម្ភរបស់បុគ្គលិក និងបង្កើតបក្សពួកជាដើម។
មន្ត្រីពន្ធនាគារម្នាក់ លោក អ៊ុំ សុផល ឲ្យដឹងនៅថ្ងៃទី១៨ ខែកុម្ភៈ ដោយពន្យល់ថា ប្រធានពន្ធនាគារ លោក វ៉ា យ៉ន មិនបានទទួលខុស ឬពិន័យកូនប្រុសរបស់គាត់ឈ្មោះ អ៊ុំ ឧស្សាហ៍ ជាអនុប្រធានការិយាល័យមធ្យោបាយ និងជាអ្នកកាន់បញ្ជីគណនេយ្យបើកប្រាក់បៀវត្សដល់បុគ្គលិកពន្ធនាគារ ដែលមានកំហុសកាត់ប្រាក់ខែ និងលុយរបបអង្ករឧបត្ថម្ភដល់បុគ្គលិក កាលពីដើមឆ្នាំ២០១២ នោះទេ។ ផ្ទុយទៅវិញ ប្រធានរូបនោះបានព្យាយាមស្រាវជ្រាវរកឈ្មោះបុគ្គលិកណាដែលបានដាក់ ពាក្យបណ្ដឹងទៅអគ្គនាយកដ្ឋានពន្ធនាគារនៃក្រសួងមហាផ្ទៃ និងចោទបុគ្គលិកទាំងនោះថា បានរុកកួនច្រណែនឈ្នានីសការងាររបស់គាត់។
លោក អ៊ុំ សុផល៖ «មន្ត្រីទាំងអស់លែងមានទំនុកចិត្តហើយ បើសិនជាគាត់កែ គាត់កែហើយ ព្រោះដោះស្រាយរហូតដល់អធិការកិច្ចរបស់ក្រសួងមហាផ្ទៃ ចុះដោះស្រាយមកធ្វើអធិការកិច្ចក្រោយពីចុះហើយ ទង្វើដែលធ្វើនៅតែដដែល»។
កាលពីដើមឆ្នាំ២០១២ កន្លងមក លោក អ៊ុំ ឧស្សាហ៍ ជាកូនប្រុសបង្កើតលោក វ៉ា យ៉ន បានកាត់លុយបុគ្គលិកពន្ធនាគារចំនួន ៤ម៉ឺនរៀលក្នុងម្នាក់ ជាថ្លៃរបបអង្ករឧបត្ថម្ភ និងប្រាក់ខែចំនួន ២០ភាគរយ ដែលរាជរដ្ឋាភិបាលដំឡើងបន្ថែមប្រចាំឆ្នាំសម្រាប់មន្ត្រីរាជការ រយៈពេល ២ខែ។ ប្រភពពីបុគ្គលិកពន្ធនាគារឲ្យដឹងថា ប្រាក់ ២០ភាគរយនោះ បើគិតជាសាច់ប្រាក់ គឺម្នាក់ៗអាចទទួលបានពី ៦ម៉ឺនរៀល ទៅដល់ ១០ម៉ឺនរៀន ទៅតាមតួនាទីរបស់ពួកគេ។ ការកាត់ប្រាក់បៀវត្ស និងប្រាក់ឧបត្ថម្ភ ត្រូវកូនប្រុសប្រធានពន្ធនាគារបញ្ជាក់ថា ខាងមន្ត្រីនៃអគ្គនាយកពន្ធនាគារជាអ្នកបង្គាប់ឲ្យកាត់យកប្រាក់ ទាំងនោះ។
តែទោះជាយ៉ាងណា បុគ្គលិកពន្ធនាគារម្នាក់ទៀត ឈ្មោះ ភិន សំណាង បញ្ជាក់ថា បុគ្គលិកពន្ធនាគារមិនជឿថា មន្ត្រីនៃអគ្គនាយកពន្ធនាគារនៅក្រសួងមហាផ្ទៃ ជាអ្នកបង្គាប់ឲ្យកាត់ប្រាក់បុគ្គលិកមូលដ្ឋាននោះទេ។ តែជាការកិបកេង និងជាអំពើពុករលួយរបស់ប្រធានពន្ធនាគារ លោក វ៉ា យ៉ន និងកូនប្រុសរបស់គាត់ជាអ្នកកាន់បញ្ជីបើកប្រាក់បៀវត្សនោះតែម្ដង។
លោក ភិន សំណាង បញ្ជាក់ថា មន្ត្រីពន្ធនាគារខេត្តព្រៃវែង បានដាក់លិខិតមួយទៅអគ្គនាយកដ្ឋានពន្ធនាគារ ដោយមានភ្ជាប់នូវស្នាមមេដៃជិត ៣០ ស្នើសុំឲ្យដកលោក វ៉ា យ៉ន និងបក្សពួករបស់គាត់ដែលរួមមានកូនប្រុសឈ្មោះ អ៊ុំ ឧស្សាហ៍ ជាអនុប្រធានការិយាល័យ មធ្យោបាយដែលក្ដោបក្ដាប់លើបញ្ជីគណនេយ្យបើកប្រាក់បៀវត្ស កូនប្រុសម្នាក់ទៀតឈ្មោះ អ៊ុំ រ៉ាយឿង ជាអនុប្រធានពន្ធនាគារ និងអ្នកស្រី រស់ ចិន្តា ជាមន្ត្រីគណនេយ្យចេញ។ ប៉ុន្តែត្រូវអគ្គនាយកពន្ធនាគារនៃក្រសួងមហាផ្ទៃ ចេញលិខិតមួយបង្គាប់ឲ្យអភិបាលរងខេត្តសម្របសម្រួលរឿងនេះ និងសរសេរលិខិតព្រមានជាលាយលក្ខណ៍អក្សរផ្លូវការចំពោះជនដែលបាន កិបកេងលុយរបស់បុគ្គលិក។
លោក ភិន សំណាង៖ «ការគ្រប់គ្រង ការធ្វើការរបស់គាត់ គឺថា គាត់លំអៀងតែម្ខាងៗសម្រាប់កូនចៅបក្ខពួករបស់គាត់ទេ ចំពោះពួកខ្ញុំ គឺគ្មានតម្លាភាព»។
ពាក់ព័ន្ធនឹងការចោទប្រកាន់នេះ វិទ្យុអាស៊ីសេរីមិនអាចសុំការបំភ្លឺពីលោក វ៉ា យ៉ន ប្រធានពន្ធនាគារខេត្តព្រៃវែង បានទេ នៅថ្ងៃទី១៨ ខែកុម្ភៈ។ ប៉ុន្តែបើតាមការអះអាងពីលោក អ៊ុំ ឧស្សាហ៍ ជាកូនប្រុសរបស់លោក វ៉ា យ៉ន និងជាអនុប្រធានការិយាល័យមធ្យោបាយ បដិសេធមិនធ្វើការបកស្រាយជុំវិញការចោទប្រកាន់របស់បុគ្គលិក ពន្ធនាគារទេ ដោយបញ្ជាក់យ៉ាងខ្លីថា ករណីនេះមន្ត្រីថ្នាក់លើបានដោះស្រាយរួចហើយ។
លោក អ៊ុំ ឧស្សាហ៍៖ «ពាក់ព័ន្ធបញ្ហានេះខ្ញុំមិនមានការបកស្រាយយ៉ាងម៉េចទេ ព្រោះថ្នាក់លើខ្ញុំជាអ្នកដោះស្រាយ»។
អគ្គនាយករងនៃអគ្គនាយកដ្ឋានពន្ធនាគារនៃក្រសួងមហាផ្ទៃ លោក លីវ ម៉ូវ ឲ្យដឹងថា ចំពោះការលើកឡើងថា ខាងមន្ត្រីនៃអគ្គនាយកពន្ធនាគារជាអ្នកបង្គាប់ឲ្យកាត់ប្រាក់ខែ ឬប្រាក់ឧបត្ថម្ភរបស់បុគ្គលិកពន្ធនាគារ ក៏មិនមែនជារឿងពិតនោះទេ។ លោកមិនបានដឹងពីភាពមិនប្រក្រតីដែលបានកើតឡើងនៅក្នុងពន្ធនាគារ ខេត្តព្រៃវែងទេ ហើយនៅមិនទាន់ឃើញខាងគណៈកម្មការត្រួតពិនិត្យប្រជុំ និងសម្រេចជុំវិញវិវាទនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។