ក្រុមគ្រួសាររបស់អ្នកជាប់ពន្ធនាគារខេត្តកំពង់ឆ្នាំង ចោទមន្ត្រីអនុរក្សពន្ធនាគារ ថាបានគំរាមយកប្រាក់ និងតម្រូវឲ្យអ្នកជាប់ឃុំបង់ប្រាក់ថ្លៃទឹក ឬថ្លៃភ្លើងប្រចាំខែ។ ប៉ុន្តែប្រធានពន្ធនាគារខេត្តកំពង់ឆ្នាំង ច្រានចោលការចោទប្រកាន់នេះ ដោយអះអាងថា អ្នកជាប់ឃុំខ្លះភូតកុហកឪពុកម្ដាយ ឬបងប្អូន ថាគេដកហូតប្រាក់ តែការពិតជាលេសសុំលុយឪពុកម្ដាយឲ្យបានច្រើន។
ក្រុមគ្រួសារអ្នកជាប់ឃុំឃាំង និងអ្នកឃ្លាំមើលបញ្ហារំលោភសិទ្ធិមនុស្សខេត្តកំពង់ឆ្នាំង ស្នើឲ្យរដ្ឋមន្ត្រីក្រសួងមហាផ្ទៃ ឬអាជ្ញាធរមានសមត្ថកិច្ច ចុះត្រួតពិនិត្យភាពមិនប្រក្រតីនៅក្នុងពន្ធនាគារខេត្ត អំពីការជំរិតទារប្រាក់ពីអ្នកទោស។
បងប្រុសបង្កើតរបស់អ្នកជាប់ឃុំម្នាក់នៅស្រុកកំពង់លែង ដែលថ្លែងក្នុងលក្ខខណ្ឌសុំមិនបញ្ចេញឈ្មោះ ឲ្យដឹងថា ក្នុងមួយសប្ដាហ៍លោកផ្ញើលុយ និងឲ្យលុយទៅប្អូនដោយផ្ទាល់ដៃចន្លោះពី ១០ម៉ឺនរៀលទៅ ១៧ម៉ឺនរៀល ប៉ុន្តែប្អូនប្រាប់ថាមិនដែលបានចាយច្រើននោះទេ ព្រោះអនុរក្សពន្ធនាគារដកយក។ អ្នកជាប់ឃុំដទៃទៀត ក៏ត្អូញត្អែរប្រាប់លោកដែរ ព្រោះមន្ត្រីអនុរក្សតម្រូវឲ្យពួកគេបង់ថ្លៃទឹកថ្លៃភ្លើង៖ « ក្នុងនោះមានអ្នកដទៃប្រាប់តៗគ្នាថា ត្រូវចំណាយលុយជួយចេញទឹកភ្លើងនៅក្នុងហ្នឹងទៀត។ ដូចថា ១០ម៉ឺនអ៊ីចឹងដកពីគ្នា ៥ម៉ឺន។ កាលណាបើឲ្យច្រើនក៏មិនដែលបានចាយច្រើនដែរ បងឯងឲ្យគាត់តែពីរ ឬបីម៉ឺនទៅបានហើយ ព្រោះចូលទៅដល់ខាងក្នុងមានអ្នកនៅខាងក្នុងដកហូតយកលុយ គេមិនឲ្យយើងវិញទេ។ ពេលយើងសម្រាកអត់ដែលបានសម្រាកទេ បានតែកន្លែងអង្គុយទេ ព្រោះគេដាក់ចង្អៀតៗម៉ង ហើយជួនកាលពេលឈឺគ្មានថ្នាំឲ្យលេបទេ ត្រូវចំណាយលុយឲ្យគេទិញនៅក្រៅ »។
ឆ្លើយតបនឹងការចោទប្រកាន់នេះ ប្រធានពន្ធនាគារខេត្តកំពង់ឆ្នាំង លោក ពៅ វុទ្ធី ថាក្នុងពន្ធនាគារមិនតម្រូវឲ្យអ្នកជាប់ឃុំណាម្នាក់បង់ថ្លៃទឹក ឬថ្លៃអគ្គិសនីដូចការចោទប្រកាន់នោះទេ។ ចំណែករឿងដកហូតលុយកាក់ដែលឪពុកម្ដាយ ឬបងប្អូនផ្ញើឲ្យអ្នកជាប់ឃុំនោះក៏គ្មានដែរ ហើយលោកថាបើដឹង ឬមានសេចក្ដីរាយការណ៍ពីអ្នកជាប់ឃុំ ថាមានមន្ត្រីអនុរក្សណាម្នាក់គំរាមដកហូតលុយពីអ្នកជាប់ឃុំ លោកនឹងមានវិធានការ៖ « នៅខាងក្នុងហ្នឹងមានកង់ទីនលក់ ( ហាងអាហារ ) ដល់ហើយការចាយវាយលុយហ្នឹងច្រើន។ ដល់អ៊ីចឹងសុំម៉ែឪ ម៉ែឪឲ្យតិចគាត់ទៅកុហកថាគេធ្វើអ៊ីចឹងទៅណា។ មន្ត្រីគេអត់ដកទេ ពេលដែលគ្រួសារឲ្យថវិកាមកចូលទៅ គេឆែកឆេរ ហើយថវិកាហ្នឹងត្រូវដូរជាកាតសម្រាប់ចាយ អត់មាននរណាដកទេ »។
មន្ត្រីផ្នែកអង្កេតអង្គការលីកាដូ (LICADHO) ខេត្តកំពង់ឆ្នាំង លោក សៅ ភារៈ មានប្រសាសន៍ថា កន្លងទៅមានអ្នកទោសចេញពីពន្ធនាគារមួយចំនួន ប្រាប់លោកពីរឿងរ៉ាវដែលបានកើតឡើងក្នុងពន្ធនាគារ ដូចការចោទប្រកាន់របស់ក្រុមគ្រួសារអ្នកជាប់ឃុំនៅពេលនេះដែរ។ លោកថា បើការបង់ថ្លៃទឹក ឬថ្លៃអគ្គិសនីដែលជាបន្ទុករបស់រដ្ឋ ក្លាយជាបន្ទុកអ្នកជាប់ឃុំវិញនោះ វាអាចមានអំពើពុករលួយ៖ « ការឲ្យបង់លុយថ្លៃទឹកថ្លៃភ្លើងនេះ វាជាការកេងប្រវ័ញ្ចពីអ្នកទោស ឬក្រុមគ្រួសារអ្នកទោស។ ហើយមួយទៀតអាចនឹងមានការកិបកេងថវិការបស់រដ្ឋ ដែលសម្រាប់ចំណាយទៅលើថ្លៃទឹកថ្លៃភ្លើងហ្នឹង។ អ៊ីចឹងរដ្ឋាភិបាលគួរតែពិនិត្យមើលបញ្ហាហ្នឹង »។
ទោះបីជាយ៉ាងណា ប្រធានពន្ធនាគារ លោក ពៅ វុទ្ធី ច្រានចោលទាំងស្រុងចំពោះការចោទថាមានអំពើពុករលួយក្នុងពន្ធនាគារ ប៉ុន្តែលោកទទួលស្គាល់ថា ស្ថានភាពនៅក្នុងពន្ធនាគារចង្អៀតលំបាករស់នៅបន្តិច ព្រោះមានមនុស្សចំនួន ៥៤០នាក់កំពុងជាប់ឃុំ។ លោកថា ស្ថានភាពលំបាកនេះ នឹងត្រូវបានដោះស្រាយ ដោយអាជ្ញាធរកំពុងសិក្សាគម្រោងធ្វើពន្ធនាគារថ្មីលើផ្ទៃដីប្រមាណ ១០ហិកតារ ឋិតនៅចម្ងាយប្រមាណ ១០គីឡូម៉ែត្រពីក្រុងកំពង់ឆ្នាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។