ព្រះសង្ឃនិងប្រជាពលរដ្ឋជាពុទ្ធបរិស័ទនៅក្នុងស្រុករំដួល ខេត្តស្វាយរៀង សរុបជាង ១០០អង្គនិងនាក់ បាននាំគ្នាទៅដាក់ញត្តិសុំអន្តរាគមន៍នៅមន្ទីរធម្មការ និងសាសនា ទាក់ទងនឹងការដកតំណែងព្រះសង្ឃជាចៅអធិការវត្តមួយអង្គ ដោយដាក់អ្នកគ្រប់គ្រងថ្មីជំនួស។
ពុទ្ធបរិស័ទ និងព្រះសង្ឃបាននាំគ្នាលើកបដាតវ៉ានៅមុខមន្ទីរធម្មការ និងសាសនា ខេត្តស្វាយរៀង នៅថ្ងៃទី១១ ខែវិច្ឆិកា ឆ្នាំ២០១៤។ ការតវ៉ានេះ ដើម្បីទាមទារមន្ត្រីមន្ទីរធម្មការខេត្ត ដោះស្រាយរឿងអាជ្ញាធរ និងអនុគណសង្ឃស្រុករំដួល ផ្លាស់ប្ដូរព្រះចៅអធិការវត្តជ័យមុន្នី មួយអង្គក្នុងឃុំម៉ឺនជ័យ ស្រុករំដួល ខេត្តស្វាយរៀង កាលពីពីរខែមុន ដាក់ព្រះសង្ឃដែលទើបតែសាងផ្នួសបានប្រហែល ១ឆ្នាំ នោះឲ្យធ្វើជាចៅអធិការថ្មី។
លោក ព្រំ យ៉ន ជាអ្នកមកចូលរួមតវ៉ានៅមុខមន្ទីរធម្មការខេត្តជាមួយពុទ្ធបរិស័ទវត្តជ័យមុន្នី ថ្លែងថា ចំពោះការមកដាក់ញត្តិរកអន្តរាគមន៍ពីមន្ទីរធម្មការនេះ គឺដោយសារតែស្ដាយព្រះចៅអធិការចាស់ព្រះនាម អ៊ីន ពុទ្ធី ជាសង្ឃមានវិន័យធម៌ល្អ និងចេះចាំធម៌ ព្រមទាំងមានស្នាដៃក្នុងការកសាងវត្តផង៖ «សំឡេង»។
លោកថ្លែងបន្តទៀតថា ព្រះសង្ឃដែលមានព្រះនាម គឹម ហុង ដែលតែងតាំងជាព្រះចៅអធិការថ្មីនោះ គឺទើបតែបួសបានប្រហែល ១ឆ្នាំ គឺផ្ទុយនឹងធម៌វិន័យសង្ឃថា យ៉ាងតិចបួសបាន ៥ ឬ ៦ព្រះវស្សា។
លោក ចាន់ សុគាត ប្រធានមន្ទីរធម្មការនិងសាសនា ខេត្តស្វាយរៀង ថ្លែងថា លោកបានទទួលញត្តិពីអ្នកតវ៉ា ហើយក្រុមមន្ត្រីទាំងអស់នឹងប្រជុំគ្នាដើម្បីដោះស្រាយបញ្ហាតាមនីតិវិធីធម្មការ និងសាសនា៖ «សំឡេង»។
ការដកព្រះចៅអធិការវត្តចាស់នោះត្រូវគេមើលឃើញថា ទំនងមកពីព្រះសង្ឃអង្គ នោះបានចូលរួមក្នុងការងារសង្គម និងជួយតវ៉ាជាមួយពលរដ្ឋទាក់ទងការបញ្ចេញមតិ ឬទាមទាររកយុត្តិធម៌ទាក់ទងរឿងទំនាស់ដីធ្លីជាដើម។
លោក នុត បូពិនណារ័ត្ន មន្ត្រីសម្របសម្រួលអង្គការលីកាដូ (Licadho) ប្រចាំនៅខេត្តស្វាយរៀង បានថ្លែងឲ្យដឹងថា ករណីនោះគឺទំនងជាសកម្មភាពរបស់ព្រះសង្ឃចូលរួមការងារសង្គមជាមួយពលរដ្ឋកន្លងមក ទើបធ្វើឲ្យអាជ្ញាធរកត់សម្គាល់ និងដកតំណែងនោះ៖ «សំឡេង»។
ពលរដ្ឋបានថ្លែងឲ្យដឹងដែរថា ប្រសិនបើមន្ត្រីនៃមន្ទីរធម្មការមិនដោះស្រាយឲ្យបានឆាប់ទេនោះ គឺពុទ្ធបរិស័ទដែលនៅជុំវិញវត្តមិនមានជំនឿលើព្រះសង្ឃចៅអធិការដែលតែងតាំងថ្មី ហើយមិនទៅធ្វើបុណ្យវត្តជ័យមុន្នី នោះបន្តទៀតទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។