ទាក់ទងនឹងសកម្មភាពអាជ្ញាធរថៃ ចាប់បញ្ជូនពលករខ្មែរធ្វើការខុសច្បាប់នៅក្នុងប្រទេសរបស់ខ្លួន ឲ្យវិលត្រឡប់មកប្រទេសកម្ពុជា វិញ យ៉ាងគំហុកនៅក្នុងរយៈពេលប៉ុន្មានថ្ងៃចុងក្រោយនេះ ពីខេត្តពោធិ៍សាត់ មានពលករជាង ៣ពាន់នាក់ហើយបានមកដល់ស្រុកកំណើតវិញ។ ប៉ុន្តែខាងអាជ្ញាធរនិងសមត្ថកិច្ចអះអាងថា ពលករទាំងនេះមិនត្រូវបានគេដឹកបញ្ជូនចេញតាមច្រកថ្មដា នៃស្រុកវាលវែង ខេត្តពោធិ៍សាត់ នោះទេ។
ពោធិ៍សាត់ គឺជាខេត្តមួយជាប់ព្រំដែន និងមានច្រកចេញចូលជាប់ជាមួយនឹងខេត្តត្រាត ប្រទេសថៃ នៅចំណុចឃុំថ្មដា នៃស្រុកវាលវែង។ អាជ្ញាធរស្រុកអះអាងនៅថ្ងៃទី១៥ ខែមិថុនា ថា ក្នុងសកម្មភាពចាប់បញ្ជូនពលរដ្ឋខ្មែរប៉ុន្មានថ្ងៃមកនេះនៅច្រកចេញចូលឃុំថ្មដា គឺពុំមានពលករខ្មែរណាម្នាក់ត្រូវបានកម្លាំងសន្តិសុខថៃ ចាប់បញ្ជូនចេញតាមច្រកទ្វារនេះឡើយ ប៉ុន្តែវត្តមានពលករនៅខេត្តពោធិ៍សាត់ ដែលទើបចេញពីប្រទេសថៃ មកនោះ គឺចេញពីច្រកផ្សេងៗនៃខេត្តជាប់ព្រំប្រទល់ប្រទេសថៃ។
អភិបាលស្រុកវាលវែង លោក ឆេ ឈីវ មានប្រសាសន៍ថា មូលហេតុសំខាន់ដែលមិនអាចបញ្ជូនពលករខ្មែរ ឬចេញចូលតាមច្រកថ្មដា បានដោយងាយ គឺបណ្ដាលមកពីស្ថានភាពផ្លូវឡើងចុះភ្នំខ្ពស់ ជាពិសេសនៅក្នុងរដូវធ្លាក់ភ្លៀងដែលជាហេតុធ្វើឲ្យការចេញចូលកាន់តែលំបាក។
លោកថា នៅស្រុកវាលវែង មានគ្រួសារពលករប្រមាណជា ៣០គ្រួសារដែលវិលមកវិញ ហើយ លោកកំពុងឲ្យមេឃុំតាមដានអំពីស្ថានភាព និងស្រង់ស្ថិតិពិតប្រាកដដើម្បីរាយការណ៍ជូនអាជ្ញាធរខេត្ត៖ «យើងមិនទាន់ក្ដាប់បានថាគេបញ្ជូន ឬគាត់មកខ្លួនគាត់ទេណា គ្រាន់ថា បានមកដល់វិញខ្លះ ហើយយើងកំពុងតែសួរ។ អូ! ជូនដំណើរអីបើគាត់ចេញតាមឯណោះ ពេលគាត់ទៅយើងនៅស្រុកនេះអត់ដឹងទេ ដឹងតែឃុំស្រាវជ្រាវ ដល់ពេលនេះយើងមើលតាមប្រព័ន្ធព័ត៌មានទៅស្រាប់ឃើញគាត់មកដល់នេះវិញ»។
ចំណែកស្នងការនគរបាលខេត្តពោធិ៍សាត់ លោក សារុន ចន្ធី ថ្លែងបញ្ជាក់ថា នៅទូទាំងខេត្តគិតមកត្រឹមថ្ងៃទី១៥ ខែមិថុនា នេះ ចំនួនពលករដែលបានបញ្ជូនចេញពីប្រទេសថៃ បានកើនឡើងដល់ ៣.០១២នាក់ហើយ ដែលចំនួនកើនឡើងច្រើនក្នុងរយៈពេលពីរបីថ្ងៃជាប់ៗគ្នានេះ។
លោកថា គណៈអភិបាលខេត្តបានបញ្ជូនអភិបាលរងខេត្តម្នាក់ និងកម្លាំងសមត្ថកិច្ចដើម្បីពិនិត្យមើលផ្ទាល់លើបញ្ហានេះនៅច្រកព្រំដែនប៉ោយប៉ែត ខេត្តបន្ទាយមានជ័យ៖ «នៅក្នុងហ្នឹងក្រុងពោធិ៍សាត់ មាន ៩៥នាក់ នៅស្រុកកណ្ដៀង មាន ៨២០នាក់ នៅស្រុកបាកាន មាន ១.៥៩៨ ហើយនៅស្រុកភ្នំក្រវាញ ២៦៩នាក់ វាលវែង ២៩នាក់។ អានេះគឺមកតាមច្រកប៉ោយប៉ែត ច្រកថ្មដា យើងតាំងពីដើមទីយើងតាមដានដែរ មិនមានទេ មិនមានបញ្ជូនអីតាមច្រកហ្នឹងទេ»។
កម្មករសំណង់ម្នាក់នៅស្រុកបាកាន លោក ឱ ចាន់ ដែលទើបចាប់បញ្ជូនពីប្រទេសថៃ តាមច្រកព្រំដែនប៉ោយប៉ែត ខេត្តបន្ទាយមានជ័យ កាលពីថ្ងៃទី១៣ ខែមិថុនា មានប្រសាសន៍ថា មុននឹងគេបញ្ជូនលោកមកស្រុកខ្មែរវិញ ថៅកែបានបើកប្រាក់ខែបន្តិចបន្តួចគ្រាន់ចាយ ប៉ុន្តែមកដល់ផ្ទះគ្មានសល់ប្រាក់មួយរៀលឡើយ ហើយលោកក៏គ្មានបំណងចេញទៅធ្វើការនៅស្រុកប្រទេសថៃ ទៀតដែរ ដោយខ្លាចស្ថានភាពតានតឹងរបស់ថៃ៖ «ឡានគេ ហ្វ្រី (អត់គិតលុយ) បើឡានគេយកលុយអត់មានលុយដល់ផ្ទះរលីងហើយ។ គេបិទផ្លូវជាយដែនអស់ហើយ ខ្ញុំខ្លាចទៅចេះតែមកៗ ឮគេបះបោរថាទាហានគេបាញ់ពេក»។
មន្ត្រីសម្របសម្រួលនៃអង្គការសិទ្ធិមនុស្សលីកាដូ (Licadho) ប្រចាំខេត្តពោធិ៍សាត់ លោក អេង ឈុនហាន ថ្លែងថា ខាងលោកមិនទាន់ទទួលព័ត៌មានច្បាស់លាស់ទាក់ទងនឹងបញ្ហានេះនៅឡើយទេ ប៉ុន្តែលោកបារម្ភថា ក្រុមពលករទាំងនោះអាចនឹងប្រឈមបញ្ហាជីវភាពធ្ងន់ធ្ងរ ដោយអ្នកខ្លះមានបំណុលនៅតាមមីក្រូហិរញ្ញវត្ថុនានា ដោយពឹងផ្អែកលើការងារនៅប្រទេសថៃ តែបែរជាជួបបញ្ហាបែបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។