ក្រុមចោរប្លន់ទាំងបីនាក់ ត្រូវសមត្ថកិច្ចប៉ូលិសស្រុកចាប់ខ្លួនបានភ្លាម ខណៈក្រុមចោរបាញ់រះទៅពលរដ្ឋ និងសមត្ថកិច្ចប៉ូលិស រហូតអស់គ្រាប់។
អធិការប៉ូលិសស្រុកអូរយ៉ាដាវ លោក ម៉ា វិចិត្រ មានប្រសាសន៍បញ្ជាក់ថា ក្រុមចោរប្លន់ទាំង ៣នាក់ មកពីស្រុកកំចាយមារ ខេត្តព្រៃវែង ពួកគេបានរៀបចំគម្រោងប្លន់ឈ្មួញទិញដំឡូង ដើម្បីយកប្រាក់។ លោកថា ក្រុមចោរប្លន់នេះ គឺជាមុខសញ្ញាដែលសមត្ថកិច្ចកំណត់ ដើម្បីរកចាប់ខ្លួនក្នុងអំពើប្លន់បានសម្រេច៖ «ជនបីនាក់ហ្នឹង ឲ្យម្នាក់ចូលដៃទទេ ដល់ទីពីរបានប្រើប្រាស់អាវុធ ជនទីបី អ្នកមើលផ្លូវ ចូលទៅបាញ់ ហើយរុករើក្នុងផ្ទះ ហើយម្ចាស់ផ្ទះគាត់ភ័យពេកគាត់បានបោះកាបូបលុយចំនួន ៣ពាន់ ៥០០ដុល្លារ ចូលព្រៃចន្ទី វារកក្នុងផ្ទះរកអត់ឃើញ ដល់អ៊ីចឹងមកវិញវាអត់មានអ្វីវាវាយផ្ដួលម៉ូតូកម្ទេចចានឆ្នាំង ហើយវាបាញ់ ៤គ្រាប់ចំកង់ឡានដឹកដំឡូង នៅក្នុងផ្ទះមានសំបកគ្រាប់នៅហ្នឹង»។
ក្រុមចោរទាំងបីនាក់មានឈ្មោះ សៀន ភឿន អាយុ ២៧ឆ្នាំ ឈ្មោះ លី គឹមហុង អាយុ ២៤ឆ្នាំ និងឈ្មោះ សៀន ជាង អាយុ ៣៥ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។