អាជ្ញាធរស្រុកកូនមុំ ខេត្តរតនគិរី បានណែនាំឲ្យប្រជាពលរដ្ឋប្រមាណ ៣០គ្រួសារ ចាកចេញចម្ងាយជាង ៥០០ម៉ែត្រ ជុំវិញកន្លែងដុតបំផ្លាញគ្រាប់បែកមិនទាន់ផ្ទុះ ដែលបន្សល់ទុកពីសម័យសង្គ្រាម។
អង្គភាពកម្ចាត់គ្រាប់មីនស៊ីម៉ាក់ (CMAC) នៅថ្ងៃទី២៦ ខែកុម្ភៈ បានរៀបចំបំផ្លាញគ្រាប់បែកប្រភេទបេ៥២ (B52) មួយគ្រាប់ ដែលកប់ក្នុងដី ហើយត្រូវបានអ្នកបញ្ជាគ្រឿងចក្រកាយដីរកឃើញនៅជើងភ្នំកូនមុំ ជាប់ផ្លូវជាតិលេខ៧៨អា ក្នុងឃុំត្រពាំងច្រែស កាលពីដើមខែកុម្ភៈ។
អធិការប៉ូលិសស្រុកកូនមុំ លោក ភោគ បូរិទ្ធ មានប្រសាសន៍បញ្ជាក់ថា គ្រាប់បេ៥២ នេះមានទំហំមុខកាត់ប្រមាណ ២០ ទៅ ៣០សង់ទីម៉ែត្រ បណ្តោយប្រវែងប្រហែលជាង ១ម៉ែត្រ កប់ជ្រៅទៅក្នុងដីប្រមាណ ១ម៉ែត្រកន្លះ បន្សល់តាំងពីសម័យសង្គ្រាមឆ្នាំ១៩៧០៖ «ពេលបំផ្ទុះហ្នឹង វាអាចប៉ះពាល់ចម្ងាយស្មើនឹង ៥០០ម៉ែត្រជុំវិញ។ ប្រជាពលរដ្ឋនៅភូមិចាម សុទ្ធតែប៉ះហើយ ប៉ុន្តែយើងបានទៅប្រាប់គាត់ឲ្យគាត់ងាកចាកចេញមួយរយៈខ្លីបំផុត ដើម្បីបំផ្ទុះ។ តាំងពីសត្វពាហនៈ តាំងពីមនុស្សឆ្លងកាត់»។
មន្ត្រីប៉ូលិសដដែលឲ្យដឹងថា ប្រជាពលរដ្ឋអាចវិលទៅលំនៅឋានវិញ ក្រោយពីការបំផ្ទុះគ្រាប់រួចរាល់នៅវេលារសៀលថ្ងៃទី២៦ ខែកុម្ភៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។