អ្នក​ធ្វើការងារ​ខាង​អប់រំ​​រួម​គ្នា​បង្កើន​ការ​អាន​សៀវភៅ​នៅ​កម្ពុជា

ដោយ ឡេង ម៉ាលី
2017-02-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ពិធី​ចុះ​កិច្ច​ព្រមព្រៀង​រវាង​អង្គការ​ស៊ីប៉ា (SIPAR) និង​ស្ថាប័ន​អប់រំ អិន.ធី.ស៊ី គ្រុប (NTC Group) ដើម្បី​ធ្វើ​យុទ្ធនាការ​បង្កើន​ការ​អាន​សៀវភៅ​នៅ​កម្ពុជា កាល​ពី​ថ្ងៃ​ទី​១៦ ខែ​កុម្ភៈ ឆ្នាំ​២០១៧។ RFA/Leng Maly
ពិធី​ចុះ​កិច្ច​ព្រមព្រៀង​រវាង​អង្គការ​ស៊ីប៉ា (SIPAR) និង​ស្ថាប័ន​អប់រំ អិន.ធី.ស៊ី គ្រុប (NTC Group) ដើម្បី​ធ្វើ​យុទ្ធនាការ​បង្កើន​ការ​អាន​សៀវភៅ​នៅ​កម្ពុជា កាល​ពី​ថ្ងៃ​ទី​១៦ ខែ​កុម្ភៈ ឆ្នាំ​២០១៧។ RFA/Leng Maly
RFA/Leng Maly

អង្គការ​ស៊ីប៉ា (SIPAR) និង​ស្ថាប័ន​អប់រំ អិន.ធី.ស៊ី គ្រុប (NTC Group) ដែល​ជា​ស្ថាប័ន​មិន​មែន​រដ្ឋាភិបាល កាល​ពី​ថ្ងៃ​ទី​១៦ ខែ​កុម្ភៈ ចុះ​កិច្ច​ព្រមព្រៀង​ធ្វើ​យុទ្ធនាការ​បង្កើន​ការ​អាន​សៀវភៅ​នៅ​ក្នុង​ប្រទេស​កម្ពុជា។ ទោះ​ជា​ការ​និយម​អាន​សៀវភៅ​របស់​ពលរដ្ឋ​កម្ពុជា នៅ​មាន​កម្រិត​ទាប ប៉ុន្តែ​ស្ថាប័ន​ទាំង​នេះ​មើល​ឃើញ​ថា ការ​អាន​ហាក់​មាន​កំណើន​ខ្លះ​ដែល​ត្រូវ​រួម​គ្នា​បង្កើន​ការ​អាន​សៀវភៅ។

នាយក​អង្គការ​ស៊ីប៉ា លោក ហុក សុទ្ធិ ដែល​ធ្វើ​ការ​ផ្នែក​លើក​កម្ពស់​ការ​អាន​សៀវភៅ​នៅ​កម្ពុជា ២៥​ឆ្នាំ​មក​ហើយ​នោះ មាន​ប្រសាសន៍​នៅ​ក្នុង​ពិធី​ចាប់​ដៃគូ​ធ្វើ​យុទ្ធនាការ​អំណាន​ជាមួយ​ស្ថាប័ន​អប់រំ អិន.ធី.ស៊ី គ្រុប ថា ពលរដ្ឋ​កម្ពុជា បាន​ប្រឈម​នឹង​ភាព​មិន​ចេះ​អក្សរ ដោយសារ​តែ​ការ​មិន​និយម ឬ​ទម្លាប់​អាន​សៀវភៅ។ អ្នក​ដែល​ចេះ​អាន​ខ្លះ បាន​ភ្លេច​ទៅ​វិញ ព្រោះ​មិន​មាន​សៀវភៅ​អាន ឬ​គ្មាន​បណ្ណាល័យ។

លោក ហុក សុទ្ធិ ថ្លែង​ថា ការ​ចាប់​ផ្ដើម​សហការ​ជាមួយ​ស្ថាប័ន​អប់រំ អិន.ធី.ស៊ី គ្រុប ដែល​ស្ថាប័ន​អប់រំ​ឯកជន​នេះ ព្រោះ​តែ​ឪពុកម្ដាយ​សិស្ស​កំពុង​ផ្ដោត​ការ​ចាប់​អារម្មណ៍​បញ្ជូន​កូន​មក​ទទួល​ការ​អប់រំ​ពី​ស្ថាប័ន​ឯកជន​នេះ​កាន់​តែ​ច្រើន៖ «គឺ​ជា​ការ​ចាប់​ផ្ដើម​មួយ ដែល​យើង​ត្រូវ​ធ្វើ​មិន​មែន​តែ​ត្រឹម​នេះ គឺ​ទៅ​មុខ​ទៀត​ជា​មួយ​សាលា​ដទៃ ពី​ព្រោះ​នេះ​ជា​ចំណុច​មួយ​សំខាន់​ដើម្បី​ធ្វើ​យ៉ាង​ណា​ឲ្យ​ការ​អាន​ហ្នឹង​មាន​ការ​ផ្សព្វផ្សាយ...»

លោក​ក៏​សង្កេត​ឃើញ​ដែរ​ថា ការ​និយម​អាន​សៀវភៅ​នៅ​ពេល​នេះ​ហាក់​មាន​ចំនួន​កើន​ឡើង ហើយ​ការ​ចាប់​ដៃគូ​ជាមួយ​ស្ថាប័ន​អប់រំ​ឯកជន ក៏​ជា​ទិសដៅ​រួម​មួយ​សម្រាប់​លើក​កម្ពស់​ការ​អាន​របស់​សិស្ស​និស្សិត៖ «»។

អង្គការ​ស៊ីប៉ា ធ្វើ​ការ​ផ្នែក​លើក​កម្ពស់​អំណាន ឬ​ការ​អាន តាម​រយៈ​ការ​បោះពុម្ព​សៀវភៅ និង​បង្កើត​បណ្ណាល័យ ដោយ​សហការ​ជាមួយ​ក្រសួង​ស្ថាប័ន​រដ្ឋ មាន​ក្រសួង​អប់រំ និង​ក្រសួង​មហាផ្ទៃ។ កិច្ច​សហការ​ជាមួយ​ស្ថាប័ន​អប់រំ អិន.ធី.ស៊ី គ្រុប ពេល​នេះ គឺ​មាន​សាលារៀន​ឯកជន​ចំនួន​ប្រាំ គឺ​សាលា​សុវណ្ណភូមិ សាលា​ប៊្រីជតុន សាលា​ញូតុន ធីឡាយ សាលា East-west និង​សាលា​អាមេរិកាំង​ប៉ាស៊ីហ្វិក។

ទន្ទឹម​គ្នា​នេះ នាយក​ប្រតិបត្តិ​ស្ថាប័ន​អប់រំ អិន.ធី.ស៊ី គ្រុប លោក ឃឹម ផុន មាន​ប្រសាសន៍​ថា ការ​លើក​កម្ពស់​អំណាន ឬ​ការ​អាន​នេះ គឺ​ជា​ផ្នែក​មួយ​នៃ​ការ​អប់រំ​របស់​សិស្ស៖ «សម្រាប់​ខាង​ខ្ញុំ ខាង​សាលា ក៏​យើង​គិត​ថា ដរាប​ណា​យើង​មាន​ការ​អាន​ហ្នឹង​កាន់​តែ​ខ្លាំង​ទៅ សិស្ស​របស់​យើង​ក៏​គាត់​អាច​យក​ចំណេះ​ដឹង យក​បទពិសោធន៍​ពី​អ្វី​ដែល​គាត់​អាន​ហ្នឹង​ទៅ​ប្រើប្រាស់​ក្នុង​ការ​សិក្សា​របស់​គាត់​បាន​ដែរ»។

និស្សិត​ផ្នែក​សារព័ត៌មាន និង​ទូរគមនាគមន៍ នៃ​សកលវិទ្យាល័យ​កម្ពុជា មួយ​រូប គឺ​កញ្ញា ជួប ច័ន្ទផូផាណែត យល់​ឃើញ​ថា កត្តា​មួយ​ធ្វើ​ឲ្យ​សិស្ស​និស្សិត​លែង​សូវ​អាន​សៀវភៅ មក​ពី​ការ​ខ្វះខាត​សៀវភៅ​សម្រាប់​អាន​បណ្ណាល័យ​សាធារណៈ​តិច៖ «បណ្ណាល័យ​នៅ​សាលា​ខ្ញុំ​ជួនកាល​ក៏​អត់​មាន​សៀវភៅ​គ្រប់​ដែរ...»

កញ្ញា​បន្ត​ថា ការ​ខ្វះ​ខាត​នេះ ធ្វើ​ឲ្យ​សិស្ស​និស្សិត​និយម​មើល​ទូរស័ព្ទ​ស្មាត​ហ្វូន (Smart Phone) ជំនួស​សៀវភៅ។ កញ្ញា​ចង់​ឲ្យ​សាលា​ឯកជន និង​រដ្ឋ​បើក​បណ្ណាល័យ​ទូលាយ​សម្រាប់​សិស្ស​អាន និង​ស្រាវជ្រាវ។

ដោយ​ឡែក​នាយក​កម្មវិធី​អំណាន នៃ​អង្គការ រូម ធូ រីដ (Room To Read) លោក ហោ សុខៈ មាន​ប្រសាសន៍​ថា ការ​ពិនិត្យ​លើ​សាលារៀន​រដ្ឋ​ចំនួន​ជាង ៣០០​សាលា ដែល​អង្គការ​លោក​សហការ​បង្កើត​បណ្ណាល័យ បាន​រក​ឃើញ​ថា សិស្ស​ដែល​ចូល​ចិត្ត​អាន ហើយ​ខ្ចី​សៀវភៅ​ទៅ​អាន គឺ​ចាប់​ពី​ថ្នាក់​ទី​១ ដល់​ថ្នាក់​ទី​៤។ ប៉ុន្តែ​អត្រា​នេះ​បាន​ធ្លាក់​ចុះ​វិញ​នៅ​ថ្នាក់​ទី​៦៖ «»។

ទាក់ទង​ការ​លើក​កម្ពស់​អំណាន ឬ​ការ​អាន​នេះ ក្រសួង​អប់រំ​យុវជន និង​កីឡា មាន​កម្មវិធី​ពង្រឹង​ការ​បង្រៀន និង​រៀន​ដែរ។

ប្រធាន​នាយកដ្ឋាន​បឋមសិក្សា​នៃ​ក្រសួង​អប់រំ​យុវជន និង​កីឡា លោក ចាន់ សុភា ថ្លែង​ថា ក្នុង​កម្មវិធី​លើក​កម្ពស់​អំណាន ឬ​ការ​អាន​នេះ ក្រសួង​បាន​បង្កើត និង​កែ​លម្អ​បណ្ណាល័យ​នៅ​តាម​សាលារៀន​ជាង ៧១០០ (៧.១៤៤) ក្នុង​នោះ​មាន​សាលា​រៀន​ជាង ៣.០០០​សាលា ដែល​មាន​បណ្ណាល័យ​ពេញលេញ។ ក្រសួង​ក៏​មាន​ពង្រឹង​សមត្ថភាព​បណ្ណារក្ស គ្រូ​បង្រៀន​ថ្នាក់​បឋម ហើយ​មាន​កម្មវិធី​ធ្វើតេស្ត​ការ​អាន​របស់​សិស្ស​ថ្នាក់​ដំបូង៖ «»។

លោក​មាន​ប្រសាសន៍​ថា បញ្ហា​ខ្វះ​សៀវភៅ​ គឺ​អាស្រ័យ​លើ​សាលា​នីមួយៗ ដែល​មាន​កញ្ចប់​ថវិកា​ដំណើរ​ការ​សាលា​រៀងៗ​ខ្លួន។ ប៉ុន្តែ​សាលា​ខ្លះ​តូច​កញ្ចប់​ថវិកា​តិច ការ​ទិញ​សៀវភៅ​ក៏​បាន​តិច​ដែរ។ ក្រៅ​ពី​នេះ សាលា​ខ្លះ​ក៏​ទទួល​បាន​សៀវភៅ​ពី​អង្គការ​ដៃគូ​សហការ ដែល​ធ្វើ​ការ​លើក​កម្ពស់​អំណាន ឬ​ការ​អាន មាន​ជា​អាទិ អង្គការ​ស៊ីប៉ា អង្គការ រូម ធូ រីដ ជា​ដើម។ ទោះ​ជា​យ៉ាង​ណា​ក្ដី ស្ថាប័ន​ពាក់ព័ន្ធ​ទាំង​រដ្ឋ និង​ឯកជន យល់​ស្រប​ថា ការ​បង្កើត​បណ្ណាល័យ ជា​មធ្យោបាយ​ប្រសើរ​បំផុត​មួយ​សម្រាប់​លើក​កម្ពស់​ការ​អាន​សម្រាប់​ពលរដ្ឋ​កម្ពុជា។ ក្រៅ​ពី​ការ​បង្កើត​បណ្ណាល័យ​នៅ​តាម​សាលារៀន រហូត​មក​ដល់​ពេល​នេះ អង្គការ​ស៊ីប៉ា ក៏​បាន​បង្កើត​បណ្ណាល័យ​នៅ​តាម​ពន្ធនាគារ មន្ទីរ​ពេទ្យ រោងចក្រ និង​បណ្ណាល័យ​ចល័ត​ទៅ​តាម​ទី​ជនបទ​ដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល