សង្គមស៊ីវិលធ្វើការពាក់ព័ន្ធស្ត្រីកម្ពុជា លើកឡើងថា បច្ចុប្បន្ននេះ ស្ត្រីពុំទាន់មានឱកាសការងារទាំងក្នុងវិស័យនយោបាយ និងស្ថាប័នរដ្ឋ បានស្មើភាពគ្នាដូចបុរសទេ។ ក្រសួងកិច្ចការនារី ទទួលស្គាល់ថា ស្ត្រីពិតជាមិនទាន់មានឱកាសចូលរួមក្នុងកិច្ចការនយោបាយ ឬការងារតាមស្ថាប័នរដ្ឋដូចបុរសទេ។
នាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា ហៅកាត់ហ្គេតស៊ី (GADC) អ្នកស្រី រស់ សុភាព បានលើកអនុសាសន៍ដាក់ជូនរដ្ឋាភិបាលតាមរយៈក្រសួងកិច្ចការនារី ឲ្យជួយលើកស្ទួយស្ត្រីមានឱកាសស្មើភាពជាមួយបុរស ទាំងក្នុងឆាកនយោបាយ និងបម្រើការងារក្នុងស្ថាប័នរដ្ឋនានា ឲ្យបានច្រើននាថ្ងៃខាងមុខ។
អ្នកស្រី រស់ សុភាព ថ្លែងដូច្នេះនៅក្នុងវេទិកាថ្នាក់ជាតិស្តីអំពី «ការចែករំលែកបទពិសោធន៍ល្អៗក្នុងការអនុវត្តអនុសញ្ញា ស៊ី-ដ (CEDAW) រៀបចំដោយអង្គការហ្គេតស៊ី។ សិក្ខាសាលានេះ មានរយៈពេល ២ថ្ងៃ ចាប់ពីថ្ងៃទី១០ ដល់ថ្ងៃទី១១ ខែមិថុនា នៅសណ្ឋាគារសាន់វ៉េ ក្រុងភ្នំពេញ។
អ្នកស្រី រស់ សុភាព បញ្ជាក់ថា តាមរយៈសិក្ខាសាលា ២ថ្ងៃនេះ អ្នកចូលរួមបានបង្កើតឲ្យមានក្រុមពិភាក្សាដោយមានតំណាងមកពីមន្ទីរកិច្ចការនារី និងស្ត្រីជាមន្ត្រីឃុំសង្កាត់ មកពីតាមខេត្តមួយចំនួន។ កិច្ចពិភាក្សានេះ ក្រុមស្ត្រីក៏បានលើកពីកង្វល់ ឬតម្រូវការស្ត្រី ដាក់ជូនទៅក្រសួងកិច្ចការនារី ស្នើដាក់បញ្ចូលទៅក្នុងសេចក្ដីព្រាងនារីរតនៈទី៤ របស់ក្រសួងកិច្ចការនារី នាអាណត្តិទី៥នេះ។
អ្នកស្រី រស់ សុភាព៖ «មានកត្តាមួយចំនួនដែលធ្វើឲ្យមានកកង្វល់ដូចជា តួនាទីស្រីក្នុងកិច្ចការសាធារណៈឃើញថា មានចំនួនថយចុះនៅពេលដែលបោះឆ្នោតម្តងៗ។ កន្លែងខ្លះឡើងដែរតែឡើងតិច។ ដូចជាពេលថ្មីៗនេះ ខាងក្រុមប្រឹក្សាខេត្តស្រុកខណ្ឌ គឺបានឡើងតែ ១ភាគរយប៉ុណ្ណោះ គឺពី ១២ភាគរយ ទៅ ១៣ភាគរយ គឺតិចមែនទែន។ ដល់បោះឆ្នោតជាតិយើងឃើញថា ទៅជាធ្លាប់ចំនួនស្ត្រីទៅវិញ។ អ៊ីចឹងការខិតខំប្រឹងប្រែងរបស់យើងហ្នឹងផ្លូវនៅវែងឆ្ងាយសម្រាប់ធ្វើការងារជាមួយគ្នាបន្តទៀត»។
ទាក់ទិនបញ្ហានេះ អ្នកស្រី ហ៊ូ សាមិត្ត រដ្ឋលេខាធិការក្រសួងកិច្ចការនារី ដែលចូលរួមបើកសិក្ខាសាលាថ្នាក់ជាតិទទួលស្គាល់ថា ឱកាសការងាររបស់ស្ត្រីក្នុងឆាកនយោបាយ និងស្ថាប័នរដ្ឋមិនទាន់ស្មើភាពជាមួយបុរសពិតមែន។ អ្នកស្រីបន្តថា ចំនួនមិនស្មើភាពគ្នានេះ អាចបណ្ដាលមកពីស្ត្រីខ្វះធនធានមនុស្ស ឬទាក់ទងប្រជាប្រិយភាពរបស់ស្ត្រីខ្លួនឯងជាដើម។
យ៉ាងនេះក្តី អ្នកស្រី ហ៊ូ សាមិត្ត ថ្លែងថា រាជរដ្ឋាភិបាលអាណត្តិទី៥ កំពុងបន្តលើកកម្ពស់ស្ត្រីមានឱកាសចូលរួមក្នុងវិស័យនយោបាយ និងស្ថាប័នរដ្ឋឲ្យបានច្រើនថែមទៀតនៅថ្ងៃខាងមុខ៖ «ថ្មីត្បិតតែមានការកើនឡើងស្ត្រីជារដ្ឋមន្ត្រី រដ្ឋលេខាធិការ អនុរដ្ឋលេខាធិការ អភិបាលរងនៃគណៈអភិបាលរាជធានី ខេត្តក្រុង ស្រុកខណ្ឌ។ ក្រុមប្រឹក្សាឃុំសង្កាត់ ក្រុមប្រឹក្សារាជធានី ខេត្តក្រុង ស្រុកខណ្ឌ ព្រមទាំងស្ត្រីជាថ្នាក់ដឹកនាំភូមិក៏ដោយ ក៏នៅតែមានបញ្ហាប្រឈម ដោយសារសមត្ថភាព និងប្រជាប្រិយភាពស្ត្រីខ្លួនឯងនៅមានកម្រិត និងខ្វះការគាំទ្រពីគ្រួសារសហគមន៍ ព្រមទាំងគណបក្សនយោបាយ និងអង្គការសង្គមស៊ីវិលជាដើម»។
តាមរយៈសិក្ខាសាលាថ្នាក់ជាតិរៀបចំដោយអង្គការ ហ្គេតស៊ី ពេលនេះ អ្នកស្រី រស់ សុភាព បញ្ជាក់ថា នឹងអាចបញ្ជ្រាបទស្សនៈយេនឌ័រ នៃអនុសញ្ញាស្ដីពីលុបបំបាត់រាល់ទម្រង់នៃការរើសអើងប្រឆាំងនារីភេទ (CEDAW) និងគោលនយោបាយសមភាពយេនឌ័រ របស់រាជរដ្ឋាភិបាលនីតិកាលទី៥ ដើម្បីបន្តលើកកម្ពស់តួនាទីស្ត្រីក្នុងវិស័យសេដ្ឋកិច្ច និងនយោបាយជាដើម។
អនុសញ្ញាស៊ី-ដ គឺជាអនុសញ្ញាអន្តរជាតិដែលអនុម័តនៅឆ្នាំ១៩៧៩ ដោយមហាសន្និបាតអង្គការសហប្រជាជាតិ។ ស៊ី-ដ គឺជាអនុសញ្ញាស្ដីពីការលុបបំបាត់ការរើសអើងគ្រប់ទម្រង់ប្រឆាំងនឹងស្ត្រី។
ប្រទេសកម្ពុជា ក៏ជាម្ចាស់ហត្ថលេខី និងបានផ្ដល់សច្ចាប័នទៅលើអនុសញ្ញានេះរួចហើយដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។