ម្ចាស់ជំនួយផ្អាកផ្ដល់ជំនួយដើម្បីទប់ស្កាត់អត្រាស្លាប់ដោយគ្រោះថ្នាក់ចរាចរណ៍
2014.10.14
បន្ទាប់ពីម្ចាស់ជំនួយដ៏ធំមួយបានប្រកាសផ្អាកផ្ដល់ជំនួយ ដើម្បីទប់ស្កាត់អត្រានៃការស្លាប់ដោយសារគ្រោះថ្នាក់ចរាចរណ៍ មន្ត្រីបច្ចេកទេសសុវត្ថិភាពផ្លូវថ្នល់បានអះអាងនៅថ្ងៃទី១៣ តុលា ថា ប្រទេសកម្ពុជា នឹងប្រឈមការកើនឡើងនៃចំនួនមនុស្សស្លាប់ដោយសារគ្រោះថ្នាក់ចរាចរណ៍កាន់តែធ្ងន់ធ្ងរថែមទៀត ស្របពេលចំនួនអ្នកប្រើប្រាស់យានយន្តកើនឡើង។
លោក ម៉ៃឃើល ប្លូមប៊ើគ (Michael Bloomberg) ដែលជាមហាសេដ្ឋីផ្ដល់ជំនួយដល់ប្រទេសកំពុងអភិវឌ្ឍ ដើម្បីកាត់បន្ថយអត្រាគ្រោះថ្នាក់ចរាចរណ៍ មិនបានបញ្ចូលឈ្មោះប្រទេសកម្ពុជា ក្នុងការទទួលជំនួយទប់ស្កាត់គ្រោះថ្នាក់ចរាចរណ៍នោះទេ ចាប់ពីដើមឆ្នាំ២០១៥។ គម្រោងទឹកប្រាក់ជំនួយឥតសំណងរបស់លោកមានចំនួន ១២៥លានដុល្លារអាមេរិក នឹងផ្ដល់ទៅប្រទេសកំពុងអភិវឌ្ឍចំនួន៥ ប៉ុន្តែមិនមានប្រទេសកម្ពុជា ឡើយ។ លោក ម៉ៃឃើល មិនបានបញ្ជាក់អំពីមូលហេតុរបស់លោកចំពោះការមិនផ្ដល់ជំនួយដល់កម្ពុជា នោះទេ។
ក្រុមអ្នកធ្វើកិច្ចការកាត់បន្ថយអត្រាគ្រោះថ្នាក់ចរាចរណ៍ បានអះអាងនៅថ្ងៃទី១៣ តុលា ថា អវត្តមាននៃទឹកប្រាក់ជំនួយនេះ នឹងធ្វើឲ្យអត្រាគ្រោះថ្នាក់ចរាចរណ៍នៅប្រទេសកម្ពុជា កើនឡើង។
ប្រធានកម្មវិធីសុវត្ថិភាពចរាចរណ៍របស់អង្គការជនពិការអន្តរជាតិបែលហ្សិក លោក អ៊ា ចរិយា បានឲ្យដឹងថា វាគឺជារឿងសោកស្ដាយបំផុតនៅពេលដែលគ្មានជំនួយគាំទ្របន្តទៀត ក្នុងការកាត់បន្ថយអត្រាគ្រោះថ្នាក់ចរាចរណ៍នៅកម្ពុជា។ ក្រៅពីនេះ អវត្តមាននៃទឹកប្រាក់ជំនួយ នឹងប៉ះពាល់ដល់អង្គការសង្គមស៊ីវិលមួយចំនួន ដែលធ្លាប់បានទទួលជំនួយពីមូលនិធិរបស់ លោក ម៉ៃឃើល ប្លូមប៊ើគ លើកិច្ចការតស៊ូមតិក្នុងការតាក់តែងច្បាប់ចរាចរណ៍ដែរ៖ «សំឡេង»។
លោក អ៊ា ចរិយា បានបញ្ជាក់ទៀតថា ស្របពេលដែលប្រទេសកម្ពុជា បានទទួលជំនួយ ប៉ុន្តែអត្រានៃចំនួនអ្នកស្លាប់ដោយគ្រោះថ្នាក់ចរាចរណ៍ មិនមានសញ្ញាថយចុះឡើយ។
របាយការណ៍របស់ក្រសួងសាធារណការ និងដឹកជញ្ជូន បានបង្ហាញថា កម្ពុជា នឹងមានករណីស្លាប់ដោយសារគ្រោះថ្នាក់ចរាចរណ៍នៅរយៈពេល ៩ខែឆ្នាំ២០១៤ មានមនុស្សជាង ១.៦០០នាក់។ ក្នុងឆ្នាំ២០១៣ មានចំនួនជិត ២ពាន់នាក់។
អគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក លោក ពៅ ម៉ាលី មានប្រសាសន៍ថា ការបាត់បង់មូលនិធិពិតជាប៉ះពាល់ដល់ប្រទេសកម្ពុជា និងចំនួនយុទ្ធនាការលើកកម្ពស់ការយល់ដឹងពីសុវត្ថិភាពចរាចរណ៍នៅតាមភូមឃុំនានា នឹងត្រូវលុបបំបាត់ដែរ។ លោកបញ្ជាក់ទៀតថា ការកាត់បន្ថយអត្រានៃគ្រោះថ្នាក់ចរាចរណ៍ ពាក់ព័ន្ធនឹងកត្តាសំខាន់បី។ ទីមួយ គឺចំនួនអ្នកប្រើប្រាស់យានយន្ត។ ទីពីរ កំណើនប្រជាពលរដ្ឋ និងកត្តាសំខាន់ទីបី គឺការពង្រឹងច្បាប់ចរាចរណ៍ និងការផាកពិន័យ។ ប៉ុន្តែកត្តាសំខាន់បំផុតនោះ គឺការយល់ដឹងរបស់ប្រជាពលរដ្ឋ៖ «សំឡេង»។
របាយការណ៍របស់សាលារាជធានីភ្នំពេញ បច្ចុប្បន្នមានរថយន្ត ៣០ម៉ឺនគ្រឿង ម៉ូតូ ១លានគ្រឿង ប្រជាពលរដ្ឋរស់នៅប្រមាណ ១លាន ៤សែននាក់ និងអ្នកឆ្លងកាត់ប្រមាណជា ២លាននាក់។ រៀងរាល់ឆ្នាំ ប្រទេសកម្ពុជា បានទទួលជំនួយអន្តរជាតិក្នុងការទប់ស្កាត់គ្រោះថ្នាក់ចរាចរណ៍ ៣០ម៉ឺនដុល្លារអាមេរិក។
ការព្យាករដែលសរសេរនៅក្នុងផែនការសកម្មភាពសុវត្ថិភាពផ្លូវថ្នល់ជាតិឆ្នាំ២០១១ ដល់ឆ្នាំ២០២០ របស់រដ្ឋាភិបាលកម្ពុជា នឹងមានមនុស្សស្លាប់ដោយគ្រោះថ្នាក់ចរាចរណ៍កើនឡើងដល់ជាង ៣.២០០នាក់នៅឆ្នាំ២០២០ បើគ្មានអន្តរាគមន៍ពីស្ថាប័នផ្ដល់ជំនួយ៕