លោក រ៉ុង ឈុន ស្នើក្រសួងស៊ើបអង្កេតអំពើពុករលួយនៅការិយាល័យអប់រំស្រុកភ្នំក្រវាញ
2014.08.26
សមាគមគ្រូបង្រៀនកម្ពុជាឯករាជ្យ ស្នើដល់ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បើកការស៊ើបអង្កេតចំពោះអំពើពុករលួយនៅក្នុងការិយាល័យអប់រំ ស្រុកភ្នំក្រវាញ ខេត្តពោធិ៍សាត់ ដែលមានទឹកប្រាក់ប្រមាណ ២ម៉ឺនដុល្លារសហរដ្ឋអាមេរិក។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍ថា កាលពីថ្ងៃទី២៥ ខែសីហា បានផ្ញើលិខិតជូនរដ្ឋមន្ត្រីក្រសួងអប់រំ ដើម្បីស្នើចាត់វិធានការលើករណីអំពើពុករលួយ ដែលគ្រូបង្រៀននៅខេត្តពោធិ៍សាត់ ប្ដឹងចោទអនុប្រធានការិយាល័យអប់រំ និងមន្ត្រីគណនេយ្យអប់រំ ស្រុកភ្នំក្រវាញ ថាបានបំប៉ោងថ្នាក់បង្រៀនពីរពេល និងថ្នាក់បង្រៀនគួប នៅតាមសាលាទាំង៤៧ ក្នុងស្រុកនេះ។
លោក រ៉ុង ឈុន បញ្ជាក់ថា រហូតមកដល់ថ្ងៃទី២៦ ខែសីហា មិនទាន់មានការឆ្លើយតបពីមន្ត្រីក្រសួងអប់រំ ជុំវិញសំណើចាត់វិធានការអំពើពុករលួយនេះនៅឡើយទេ៖ «ស៊ើបអង្កេតករណីអំពើពុករលួយនៅក្នុងការិយាល័យអប់រំស្រុកភ្នំក្រវាញ នេះ ហើយត្រូវតែនាំជនដែលប្រព្រឹត្តអំពើពុករលួយហ្នឹង យកមកផ្ដន្ទាទោសទៅតាមផ្លូវច្បាប់»។
ទោះយ៉ាងណា លោក រ៉ុង ឈុន មានជំនឿថា លោករដ្ឋមន្ត្រីក្រសួងអប់រំ ហង់ ជួនណារ៉ុន នឹងបញ្ជូនមន្ត្រីចុះស៊ើបអង្កេត និងឈានដល់ចាត់វិធានការតាមផ្លូវច្បាប់ ចំពោះអំពើពុករលួយដែលកើតមាននៅក្នុងការិយាល័យអប់រំ ស្រុកភ្នំក្រវាញ ខេត្តពោធិ៍សាត់ សម្រាប់ឆ្នាំសិក្សា២០១៣-២០១៤ នេះ ដោយការទទួលខុសត្រូវខ្ពស់៕