អាណាព្យាបាលសិស្សបានត្អូញត្អែរថា នាយកសាលាអាងខ្នងក្រាស់ បានយកអំណាចសម្លុតគំរាមពួកគាត់មិនឲ្យនាំរឿងបង្គាប់សិស្សបង់ប្រាក់នោះ និយាយចេញទៅខាងក្រៅ។
អាណាព្យាបាលសិស្សសុំមិនបញ្ចេញឈ្មោះម្នាក់ រស់នៅភូមិព្រៃខ្លា ឃុំព្រែកកណ្ដៀង ស្រុកពាមរ មានប្រសាសន៍ទាំងក្ដីបារម្ភក្នុងខ្លួន នៅថ្ងៃទី៩ វិច្ឆិកា ថា ខ្លួនជាប្រជាពលរដ្ឋក្រីក្រ រកព្រឹកខ្វះល្ងាច។ បើទោះណាក្រគ្មានប្រាក់ក្ដី ដើម្បីឲ្យកូនបានរៀនចេះដឹងនឹងគេ ក៏បានដាច់ចិត្តទៅអង្វរនាយកសាលា ដើម្បីឲ្យកូនបានទៅចូលរៀនថ្នាក់ទី៧ ក្នុងឆ្នាំថ្មីនេះ។ ប៉ុន្តែ នាយកសាលានៅតែរឹងរូសបង្គាប់ឲ្យខ្លួនបង់ប្រាក់ផ្ទេរឈ្មោះឲ្យកូនដដែល៖ «ដល់ខ្ញុំទៅ គាត់ថាបាន ប៉ុន្តែកោសកាតឲ្យគាត់ខ្លះទៅ ថាអ៊ីចឹង ហើយថាហ៊ឺកោសកាតហ្នឹងប៉ុន្មាន? ពួកហ្នឹងគេឲ្យម្ភៃម៉ឺនផង តែលោកគ្រូយកតែ ១៥ម៉ឺន តែគាត់ថាតែប៉ុណ្ណឹង។ ចងការប្រាក់ពីប្រជាជនគ្នាឯងហ្នឹង យកលុយទៅបង់ឲ្យនាយកសាលាហ្នឹង។ អ៊ីចឹងបងបង់បានប៉ុន្មានហើយ? ខ្ញុំបាន ១៥ម៉ឺន»។
រីឯអាណាព្យាបាលសិស្សម្នាក់ទៀត រស់នៅភូមិព្រៃខ្លា ឃុំព្រែកកណ្ដៀង បានថ្លែងស្រដៀងគ្នានេះដែរថា នាយកសាលាបានតម្រូវឲ្យសិស្សថ្នាក់ទី៦ ផ្ទេរចេញទៅរៀនថ្នាក់ទី៧ បង់ប្រាក់គ្រប់គ្នា។ ប្រសិនបើសិស្សណាពុំបានបង់ប្រាក់ ១៥ម៉ឺនរៀលទៅឲ្យនាយកសាលាទេនោះ នឹងពុំអាចផ្ទេរឈ្មោះបន្តការសិក្សារបស់ខ្លួនទៅថ្នាក់ទី៧ បានឡើយ៖ «អង្កាល់ពីដំបូងមក ខ្ញុំថាឈប់ទៅកូនអើយ ម៉ែគ្មានលុយបង់ទេ រួចហើយកូនខ្ញុំថា ឈប់អីម៉ែ រៀនកំពុងតែចូល ម៉ែឯងទៅចងគេយកទៅបង់គ្រូទៅ កូនបានទៅនឹងគេ។ រួចហើយខ្ញុំហ្នឹងក៏ប្រឹងស្វះស្វែងបានលុយមកឲ្យកូនបានទៅរៀននឹងគេ ហើយកូនខ្ញុំក៏អរទៅបានទៅរៀន។ អត់មានបានសួរផង គ្រាន់ដឹងបានថា គេតម្រូវលុយៗអ៊ីចឹង ទាល់តែបានលុយឲ្យគេបានឲ្យសិស្សទៅហ្នឹង»។
ឪពុកម្ដាយ អាណាព្យាបាលរបស់សិស្ស បន្ថែមថា នាយកសាលាបានប្រព្រឹត្តអំពើពុករលួយយកលុយពីសិស្សដុះស្លែយូរមកហើយ។ រហូតដល់សិស្សខ្លះបានសម្រេចចិត្តបញ្ចប់ការសិក្សារបស់ខ្លួនត្រឹមតែថ្នាក់ទី៦ ក៏មានជាហូរហែដែរ។ ការឈប់រៀនត្រឹមថ្នាក់ទី៦ ព្រោះដោយសារឪពុកម្ដាយរបស់ពួកគេពុំមានលទ្ធភាពរកប្រាក់បង់ឲ្យនាយកសាលា។
ឆ្លើយតមនឹងការចោទប្រកាន់នេះ នាយកសាលាបឋមសិក្សាព្រៃខ្លា លោក សៀន សាមៀត គូសបញ្ជាក់ថា លោកពុំបានគំរាមទារប្រាក់ផ្ទេរឈ្មោះពីអាណាព្យាបាលរបស់សិស្ស ដូចការចោទប្រកាន់នេះឡើយ។ លោកថា ទិសដៅមុខព្រួញសិស្សដែលរៀនចប់ថ្នាក់ទី៦ ឡើងថ្នាក់ទី៧ តាមគោលការណ៍ សិស្សនោះបើទៅរៀនបន្តនៅអនុវិទ្យាល័យព្រែកកណ្ដៀង នោះ ពុំចោទជាបញ្ហាទេ។ អាណាព្យាបាលសិស្សខ្លះ ពុំបានយល់ ហើយបានបញ្ជូនកូនទៅរៀននៅអនុវិទ្យាល័យបារាយ ដែលនាំឲ្យមានផលលំបាក។ បញ្ហាទាំងនេះ ធ្វើឲ្យអាណាព្យាបាលរបស់សិស្សខឹងសម្បា ចោទប្រកាន់ថា នាយកសាលាមិនបានអើពើជួយរកដំណោះស្រាយឲ្យពួកគាត់។
លោក សៀន សាមៀត៖ «ខ្ញុំដូចជាគ្មានទទួលថវិកាពីនណាម្នាក់សោះ ហើយបើសិនឪពុកម្ដាយណាថាឲ្យលុយខ្ញុំ ហៅគាត់មកស្បថហ្មងក៏បានដែរ។ តែបើខ្លួនគាត់ទៅថតសំបុត្រកំណើតសំបុត្រអីនោះ យើងយកសំបុត្រកំណើតថតហ្វូតូកូពី ទៅជូនអនុវិទ្យាល័យបារាយ។ អាហ្នឹងគាត់ប្រើប្រាស់លុយជាមួយអ្នកណា ខ្ញុំអត់ដឹងថាគាត់តម្រូវម៉េចអីម៉េចទេ។ គ្រាន់តែខ្ញុំតម្រូវសុំទី១ ត្រូវមានសំបុត្រកំណើតឲ្យខ្ញុំ អានេះជាភាសាតឹងតែរបស់ខ្ញុំ។ ទី២ ឪពុកម្ដាយហ្នឹងត្រូវខ្ញុំហ្វូតូពាក្យសុំអីឲ្យធ្វើម៉េចឲ្យបានពាក្យសុំម៉ោខ្ញុំចារពីលើថា សិស្សនេះពិតជារៀននៅសាលាហ្នឹង ថ្នាក់ទីឆ្នាំសិក្សា២០១២-២០១៣មែន»។
យ៉ាងណាក៏ដោយ អាណាព្យាបាលរបស់សិស្សបានបញ្ជាក់ថា នាយកសាលាបឋមសិក្សាព្រៃខ្លា ជាមនុស្សមានអំណាចក្នុងភូមិ។ មិនថាឡើយតែប្រជាពលរដ្ឋស្លូតត្រង់ដែលខ្លាចគាត់ សូម្បីប្រធានភូមិក៏មិនហ៊ានហើបជាមួយលោកនាយកសាលានោះដែរ។ ប្រជាពលរដ្ឋទទូចស្នើសុំឲ្យក្រសួងអប់រំ យុវជន និងកីឡា ចាត់វិធានការតាមដានបញ្ហានេះជាបន្ទាន់ ដើម្បីកុំឲ្យខូចអនាគតក្មេងដោយសារគ្មានប្រាក់បង់ផ្ទេរឈ្មោះ។
សិស្សថ្នាក់ទី៦ នៅសាលាបឋមសិក្សាព្រៃខ្លា ដែលត្រូវផ្ទេរឈ្មោះទៅរៀនបន្តថ្នាក់ទី៧ ក្នុងឆ្នាំសិក្សា២០១៣-២០១៤ សរុបប្រមាណជាង ២០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។