ទំនាស់រវាងគ្រូបង្រៀនមួយក្រុមនៅវិទ្យាល័យក្រឡាញ់ ស្រុកក្រឡាញ់ ខេត្តសៀមរាប ជាមួយនឹងនាយកសាលានោះ បានអូសបន្លាយរយៈពេលជាង ១ឆ្នាំមកហើយ។ ក្រុមគ្រូបង្រៀនខ្លះអះអាងថា គេបានដាក់ពាក្យបណ្ដឹងទៅមន្ទីរអប់រំយុវជន និងកីឡា ខេត្តសៀមរាប តាំងតែពីខែមីនា ឆ្នាំ២០១៤ កន្លងទៅ ធ្វើឱ្យមន្ត្រីពាក់ព័ន្ធចុះទៅសម្របសម្រួលជាច្រើនលើក ក៏ប៉ុន្តែពួកគេនៅតែមិនទាន់ទទួលបានការដោះស្រាយត្រឹមត្រូវនៅឡើយ។
ក្រុមគ្រូបង្រៀននៅវិទ្យាល័យក្រឡាញ់ ជាច្រើននាក់ បានព្រមានថា ពួកគេនឹងប្រមូលផ្ដុំគ្នាធ្វើកូដកម្មដោយមិនបង្រៀនសិស្សចាប់ពីថ្ងៃច័ន្ទ ទី២៥ ខែឧសភា។
ការព្រមានធ្វើកូដកម្ម បានកើតឡើងបន្ទាប់ពីគ្រូបង្រៀនមួយចំនួនចោទប្រកាន់នាយកសាលាដែលទើបតែឡើងកាន់តំណែងថ្មីថា មានការចាយវាយប្រាក់កម្មវិធីអាទិភាព ភីប៊ី (PB) របស់រដ្ឋាភិបាលគ្មានតម្លាភាព ហើយពួកគេបានប្ដឹងទៅមន្ទីរអប់រំយុវជន និងកីឡា ក៏ប៉ុន្តែមិនមានដំណោះស្រាយណាអាចទទួលយកបានទេ។
ប្រធានក្រុមបច្ចេកទេសនៃវិទ្យាល័យក្រឡាញ់ ដែលសកម្មក្នុងការតវ៉ា គឺលោក ឌិន ចន្ថា។ លោកមានប្រសាសន៍ថា រូបលោកនិងក្រុមគ្រូបង្រៀន ១៦រូបទៀត នឹងនាំគ្នាធ្វើកូដកម្មនៅថ្ងៃទី២៥ ខែឧសភា ដើម្បីទាមទារឱ្យមានការដកហូតតំណែងនាយកសាលា ដែលទើបតែឡើងថ្មីនោះវិញ។
លោក ឌិន ចន្ថា ចោទប្រកាន់នាយកសាលាដែលទើបតែឡើងថ្មី គឺលោក ស៊ាន ផល្លា ថាបានចាយវាយថវិកាភីប៊ី របស់រដ្ឋ ដោយមិនមានតម្លាភាពទេ។ គ្រូបង្រៀនដដែលរិះគន់ថា រយៈពេល ២ឆ្នាំមកហើយដែលនាយកសាលាថ្មីឡើងកាន់តំណែង គឺមិនដឹងថា យកប្រាក់ភីប៊ី ទៅចាយវាយលើអ្វីខ្លះ ពីព្រោះនៅក្នុងសាលារៀនអត់មានសម្ភារៈប្រើប្រាស់ ដូចជាអំបោស ក្រដាសសម្រាប់សរសេរពាក្យស្លោកជាដើម។ សមា្ភរៈទាំងអស់នេះគឺធ្លាក់បន្ទុកទៅលើសិស្ស ដែលត្រូវរៃលុយគ្នាទិញវិញ។
ចំណែកការបង្រៀនរាល់ថ្ងៃទៀតសោត គឺគ្រូអត់មានទឹកហ្វឺតសរសេរទេ ត្រូវដាក់បន្ទុកឱ្យសិស្សរៃលុយគ្នាទិញ ប៉ុន្តែថ្នាក់ខ្លះដែលគ្មានលុយទិញទឹកហ្វឺត គឺគ្រូអត់បានបង្រៀន ហើយនៅក្នុងបរិវេណសាលាទាំងមូល គឺក្រៀមក្រោះ ដោយមិនមានការរៀបចំជាដើម។
លោក ឌិន ចន្ថា បញ្ជាក់ថា ដោយសារករណីជាច្រើននេះ គឺលោកបានប្ដឹងពាក់ព័ន្ធនឹងអំពើពុករលួយតាំងតែពីជាង ១ឆ្នាំមុន ក៏ប៉ុន្តែរហូតមកដល់ពេលនេះ មិនមានមន្ត្រីណារកយុត្តិធម៌ឱ្យបានត្រឹមត្រូវនៅឡើយ៖ «ប្រាក់ភីប៊ីហ្នឹងកាលឆ្នាំ២០១៣ អីនោះ ១ជុំវាមាន ៥លាន ២០ម៉ឺនរៀល ជុំខ្លះ ៥លាន ហើយក្នុង ១ឆ្នាំៗគឺមាន ៤ជុំ។ ពេលអ៊ីចឹងគាត់ប្រើប្រាស់អត់ដឹងមុខដឹងមាត់ ហើយបើមើលទៅលើសមិទ្ធផលផ្សេងៗដូចជាអត់មាន»។
ទោះយ៉ាងណាវិទ្យុអាស៊ីសេរី មិនអាចទាក់ទងនាយកវិទ្យាល័យក្រឡាញ់ លោក ស៊ាន ផល្លា ដើម្បីសុំប្រតិកម្មឆ្លើយតបនឹងការចោទប្រកាន់នេះ បានថាយ៉ាងណានៅឡើយ។
ចំណែកប្រធានការិយាល័យអប់រំ ស្រុកក្រឡាញ់ លោក ទេស សារិន មានប្រសាសន៍ថា បញ្ហាទំនាស់រវាងក្រុមគ្រូបង្រៀនជាមួយនាយកវិទ្យាល័យក្រឡាញ់នោះ គឺកើតមានយូរហើយ ដោយរូបលោកបានត្រឹមតែដឹង ក៏ប៉ុន្តែការដោះស្រាយវិញ គឺរូបលោកមិនដែលបានទទួលពាក្យបណ្ដឹងអំពីរឿងនោះទេ ដោយសារតែគ្រូបង្រៀនបានដាក់ទៅមន្ទីរអប់រំយុវជន និងកីឡា។
លោកប្រធានការិយាល័យអប់រំ មិនហ៊ានអះអាងថា ទំនាស់រវាងក្រុមគ្រូបង្រៀន ជាមួយនឹងនាយកវិទ្យាល័យក្រឡាញ់នោះ តើអ្នកណាជាអ្នកខុស ឬអ្នកណាជាអ្នកត្រូវឡើយ៖ «ខ្ញុំមិនទាន់បានដឹងច្បាស់ទេ ពីព្រោះអានេះទាល់តែចុះទៅស្រាវជ្រាវឯកសារ ពីព្រោះកាលពីគ្រូធ្វើពាក្យបណ្ដឹងគឺដាក់ទៅមន្ទីរអប់រំយុវជននិងកីឡា អត់មានដាក់មកការិយាល័យអប់រំស្រុកទេ»។
មន្ត្រីមន្ទីរអប់រំយុវជន និងកីឡា ខេត្តសៀមរាប ឱ្យដឹងថា ករណីជម្លោះរវាងក្រុមគ្រូបង្រៀនជាមួយនាយកវិទ្យាល័យ ដែលទើបតែឡើងកាន់តំណែងថ្មីនោះ គឺទាំងមន្ទីរអប់រំ និងអាជ្ញាធរខេត្តសៀមរាប បានចុះទៅស្រាវជ្រាវ និងសម្របសម្រួល ៣-៤លើកមកហើយ ក៏ប៉ុន្តែក្រុមគ្រូបង្រៀនភាគតិចដែលជំទាស់នៅតែមិនទទួលយកដំណោះស្រាយ។
ប្រធានមន្ទីរអប់រំយុវជន និងកីឡា ខេត្តសៀមរាប លោក អ៊ុង សេរីឌី មានប្រសាសន៍ថា តាមការចុះស្រាវជ្រាវជាច្រើនលើក គឺមន្ទីររកឃើញនាយកវិទ្យាល័យក្រឡាញ់ មិនមានការកេងបន្លំថវិការបស់រដ្ឋ ដូចការចោទប្រកាន់នោះទេ។ លោកពន្យល់ថា នៅពេលដែលនាយកសាលានោះឡើងកាន់តំណែងថ្មី គឺក្នុងសាលាមិនមានមន្ត្រីខាងគណនេយ្យទេ ដូច្នេះសាលាក៏សម្រេចរើសគ្រូម្នាក់ឱ្យគ្រប់គ្រងផ្នែកគណនេយ្យ ប៉ុន្តែមន្ត្រីផ្នែកគណនេយ្យនោះ ក៏មិនចេះជំនាញនោះដែរ ទើបធ្វើឱ្យការចាយវាយខ្លះៗមិនមានបញ្ជីស្នាមត្រឹមត្រូវ។
លោកប្រធានមន្ទីរអប់រំយុវជន និងកីឡា ខេត្តសៀមរាប បង្ហាញជំហរច្បាស់លាស់ថា បើទោះបីជាគ្រូបង្រៀនមួយក្រុមសំដែងការមិនពេញចិត្តជាមួយនាយកវិទ្យាល័យថ្មី ហើយទាមទារឱ្យដកហូតតំណែងក៏ដោយ ក៏មន្ទីរមិនអាចធ្វើតាមសំឡេងភាគតិចទេ ពីព្រោះនៅក្នុងវិទ្យាល័យនោះ គឺមានគ្រូបង្រៀនភាគច្រើនបានគាំទ្រចំពោះនាយកសាលាថ្មីនេះ៖ «វាគ្រាន់តែរឿងខុសនីតិវិធីអីបន្តិចបន្តួចអីប៉ុណ្ណឹង គឺយើងអាចកែសម្រួល យើងណែនាំ ហើយដាក់លក្ខខណ្ឌ ដោយអភិបាលរងខេត្តគាត់ទៅប្រជុំក៏បានដាក់លក្ខខណ្ឌឱ្យកែលំអអស់ហើយ ហើយនាយកហ្នឹងក៏បានកែលំអដែរ»។
សមាជិកក្រុមប្រឹក្សាស្រុកក្រឡាញ់ ១រូប លោក ស៊ឹម សោភ័ណ បានហៅការសម្របសម្រួលរបស់មន្ទីរអប់រំយុវជន និងកីឡា ព្រមទាំងអភិបាលរងខេត្តសៀមរាប លើរឿងទំនាស់រវាងគ្រូបង្រៀន និងនាយកវិទ្យាល័យក្រឡាញ់ កន្លងទៅនោះថា គឺរឿងដែលធ្វើឱ្យគ្រូបង្រៀននៅតែមិនទាន់អស់ចិត្ត។
លោក ស៊ឹម សោភ័ណ បញ្ជាក់ថា បញ្ហាទំនាស់នេះ ថ្វីត្បិតតែលោកដឹងមិនស៊ីជម្រៅ ក៏ប៉ុន្តែលោកធ្លាប់ទទួលបានព័ត៌មានជាច្រើន ហើយសមាជិកក្រុមប្រឹក្សាស្រុកជាច្រើនក៏ពេញចិត្តឱ្យមានការដកហូតតំណែងនាយកសាលាថ្មីនោះដែរ៖ «បើតាមសំណូមពរ ខ្ញុំគួរតែដកចេញទៅវាចប់បាត់ទៅហើយ រកកន្លែងឱ្យលោកនាយកហ្នឹងនៅថ្មីទៀតទៅ។ បើសិនជាគេរកឃើញភស្តុតាងច្បាស់លាស់ហើយថាគាត់មានកំហុស»។
ក្រុមគ្រូបង្រៀនខ្លះ ព្រមានថា គេមានឯកសារពាក់ព័ន្ធនឹងនាយកសាលាចាយថវិការដ្ឋគ្មានតម្លាភាពនោះ ហើយគេនឹងបង្ហាញដល់ក្រុមអ្នកសារព័ត៌មាន និងមន្ត្រីអង្គការក្រៅរដ្ឋាភិបាលជាច្រើននៅពេលដែលពួកគេប្រមូលផ្ដុំគ្នាធ្វើកូដកម្មប្រឆាំងនាយកសាលារូបនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។