តុលាការ​សៀមរាប​សម្រេច​ឃុំ​ខ្លួន​អ្នក​នេសាទ​ខុស​ច្បាប់​៥៨​នាក់

ប្រភព​ពី​សមត្ថកិច្ច​រដ្ឋាភិបាល បាន​ឱ្យ​ដឹង​ថា អ្នក​ដែល​នៅ​ពី​ក្រោយ​ខ្នង​នៃ​ការ​នេសាទ​ខុស​ច្បាប់​ក្នុង​បឹង​ទន្លេសាប​នៃ​ទឹកដី​ខេត្ត​សៀមរាប ខ្លះ កំពុង​រត់​ទៅ​ពួន​សំងំ​នៅ​ឯ​បរទេស ដើម្បី​គេច​ខ្លួន​ពី​ការ​តាម​បង្ក្រាប​របស់​អាជ្ញាធរ។
ដោយ ហង្ស សាវយុត
2013-02-23
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ការ​រត់​គេច​ខ្លួន​នេះ នៅ​ពេល​ដែល​មន្ត្រី​តុលាការ និង​កង​រាជ​អាវុធហត្ថ​កំពុង​បន្ត​សកម្មភាព​តាម​រក និង​ចាប់​ខ្លួន​អ្នក​ប្រព្រឹត្ត​បទ​ល្មើស​នេសាទ និង​អ្នក​ពាក់ព័ន្ធ​មួយ​ចំនួន​ជា​បន្តបន្ទាប់។

តុលាការ​ខេត្ត​សៀមរាប បាន​សម្រេច​ឃុំ​ខ្លួន​មនុស្ស​ចំនួន ៥៨​នាក់ នៅ​ក្នុង​ពន្ធនាគារ​ជា​បណ្ដោះ​អាសន្ន​ក្នុង​រយៈពេល​ប្រមាណ​១​សប្ដាហ៍​កន្លង​មក​នេះ។

អ្នក​ដែល​ជាប់​ឃុំ​ទាំង​នោះ បន្ទាប់​ពី​តុលាការ​ចោទ​ប្រកាន់​ជា​បឋម​ពាក់ព័ន្ធ​នឹង​ការ​ប្រើ​ឧបករណ៍​ទំនើប ឧបករណ៍​កែច្នៃ ធ្វើ​សកម្មភាព​នេសាទ​ខុស​ច្បាប់។

លោក ទី សុវិនថាល់ ជា​ព្រះរាជ​អាជ្ញា​អម​សាលា​ដំបូង​ខេត្ត​សៀមរាប លោក​បាន​មាន​ប្រសាសន៍​កាល​ពី​រសៀល​ថ្ងៃ​សៅរ៍ ទី២៣ ខែ​កុម្ភៈ ថា ក្នុង​ចំណោម​មនុស្ស​ជាង ៦០​នាក់​ដែល​សមត្ថកិច្ច​បាន​ចាប់​ខ្លួន​ជា​បន្ត​បន្ទាប់​ពី​ក្នុង​បឹង​ទន្លេសាប គឺ​តុលាការ​បាន​ចោទ​ប្រកាន់​ជា​បឋម​ទៅ​លើ​មនុស្ស​ចំនួន ៥៨​នាក់ ហើយ​បច្ចុប្បន្ន​ពួក​គេ​ទាំង​នោះ​កំពុង​ជាប់​ឃុំ​ជា​បណ្ដោះ​អាសន្ន​នៅ​ក្នុង​ពន្ធនាគារ។

លោក ទី សុវិនថាល់៖ «ឱ្យ​តែ​អ្នក​ណា​ពាក់ព័ន្ធ​ត្រូវ​តែ​ចាប់ មាន​ទាំង​បុគ្គល​មិន​មែន​ជា​សមត្ថកិច្ច។ រក​ជា​បន្ត​បន្ទាប់​ទៀត​នៅ​អា​ពួក​ពូកែ​ដើរ​រក​លុយ! ដើរ​រក​លុយ​អត់​បាន ទើប​រាយការណ៍ បើ​បាន ធ្វើ​ភ្នាក់ងារ​ឱ្យ​ទៀត។ អីចឹង​បាន​ជា​ពួក​ខ្ញុំ​ចុះ​ជាច្រើន​លើក​ច្រើន​សារ​មក​ហើយ មិន​ងាយ​ចាប់​បាន​ទេ។ បាន​ប៉ុន្មាន គឺ​យក​ប៉ុណ្ណឹង​ទៅ ហើយ​នៅ​ពេល​ដែល​តុលាការ​ផ្ដន្ទាទោស​អស់ គឺ​ចេញ​ដីកា​ចាប់​ជា​បន្តបន្ទាប់​ទៀត​ទៅ»

ប្រភព​ពី​សមត្ថកិច្ច បាន​ឱ្យ​ដឹង​ថា មនុស្ស​ចំនួន ៥៨​នាក់ ដែល​តុលាការ​សម្រេច​ឱ្យ​ឃុំ​ខ្លួន​ជា​បណ្ដោះ​អាសន្ន​នោះ គឺ​មាន​ទាំង​ជន​ជាតិ​ខ្មែរ និង​ជន​ជាតិ​វៀតណាម ខ្លះៗ។

កាល​ពី​ថ្ងៃ​ទី១៥ ខែ​កុម្ភៈ កន្លង​ទៅ ទី​បញ្ជាការ​កង​រាជ​អាវុធហត្ថ​ខេត្ត​សៀមរាប បាន​បញ្ជូន​កម្លាំង​ចុះ​ប្រតិបត្តិការ​ក្នុង​បឹង​ទន្លេសាប​នៃ​អតីត​ឡូត៍​នេសាទ​លេខ​៤ និង​តំបន់​ដែន​នេសាទ​បម្រុង​ទុក​ឱ្យ​ត្រី​ពង​កូន ហើយ​បាន​ចាប់​ខ្លួន​អ្នក​ប្រើ​ឧបករណ៍​នេសាទ​ខុស​ច្បាប់​ប្រមាណ​ជាង ៦០​នាក់ ព្រម​ទាំង​ឃាត់​ទុក​កាណូត​ធំៗ​ចំនួន ១៦​គ្រឿង​ទៀត។ រហូត​មក​ដល់​ពេល​នេះ សមត្ថកិច្ច​នៅ​តែ​បន្ត​តាម​ចាប់​ខ្លួន​អ្នក​ពាក់ព័ន្ធ​នឹង​ការ​នេសាទ​ខុស​ច្បាប់​ទាំង​នោះ​នៅ​ឡើយ។

សមត្ថកិច្ច​បាន​ឱ្យ​ដឹង​ថា ការ​បង្ក្រាប​បទ​ល្មើស​នេសាទ​ខុស​ច្បាប់​នៅ​បឹង​ទន្លេសាប​នៃ​ទឹកដី​ខេត្ត​សៀមរាប ជា​បន្តបន្ទាប់​នោះ គឺ​គេ​បាន​ចាប់​ខ្លួន​បុរស​ជន​ជាតិ​វៀតណាម ម្នាក់​ឈ្មោះ ដូ យ៉ាងដាង ដែល​ជា​មេ​កញ្ច្រែង​យ៉ាង​សកម្ម​ក្នុង​ការ​រក​ស៊ី​នេសាទ​ខុស​ច្បាប់​ផង​ដែរ។

លោក អ៊ិត សុធា ជា​ចៅក្រម​ស៊ើប​អង្កេត​នៃ​សំណុំ​រឿង​នេសាទ​ខុស​ច្បាប់​នោះ បាន​មាន​ប្រសាសន៍​ថា លោក​បាន​សម្រេច​ឃុំ​ខ្លួន​ជន​ទាំង​អស់​នោះ​ជា​បណ្ដោះ​អាសន្ន ដើម្បី​រង់ចាំ​ការ​ស៊ើប​អង្កេត​បន្ត៖ «ខាង​ព្រះរាជ​អាជ្ញា​គាត់​ចោទ​ប្រកាន់​មក​ពី​បទ​នេសាទ​ដោយ​ប្រើ​ឧបករណ៍​ទំនើប ឧបករណ៍​កែច្នៃ ហើយ​ព្រម​ទាំង​អ្នក​ទទួល​ផល​អនុផល​ខាង​ជល​ផល​ទៀត។ អ្នក​ទាំង​នេះ​ប្រសិន​បើ​តុលាការ​រក​ឃើញ​ថា​ដូច្នេះ​មែន គឺ​នឹង​ប្រឈម​មុខ​នឹង​ការ​ផ្ដន្ទាទោស»

មន្ត្រី​តុលាការ​បាន​ឱ្យ​ដឹង​ថា ក្រៅ​តែ​ពី​មនុស្ស ៥៨​នាក់ ដែល​គេ​បាន​ឃុំ​ខ្លួន គឺ​នៅ​មាន​អ្នក​ពាក់ព័ន្ធ​នឹង​ការ​នេសាទ​ខុស​ច្បាប់​ជាច្រើន​ទៀត ដែល​តុលាការ​កំពុង​តែ​តាម​រក ហើយ​មិន​ទាន់​អាច​ចាប់​ខ្លួន​បាន​នៅ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

យុទ្ធិធម៌អង្គរ

ពី សៀមរាប

ខ្លាំងតែជាមួយខ្មែរគ្នាំឯង គ្នាគ្រាន់តែនេសាទខុសច្បាប់បន្តិចបន្តួច ហើយមិនបានសែន ក៏ចាប់គ្នាដាក់គុក តែបើពួកយួនវិញ នេសាទប្រើឧបករណ៍ខុសច្បាប់មួយគគោគ គ្មានឃើញចាប់សោះ តើហេតុអ្វី? មកពីពួកវាបានសែនជូនឬ?

Feb 23, 2013 09:13 PM

HBS

ពី សៀមរាប

ខ្ញុំសូមសួរលោក បន្រ្តីថា ក្រុម PM បង្កើតឡើង
ធ្វើអ្វី សំរាប់ការពាររាស្រ្ត រីសំរាប់យកលុយពីរាស្រ្ត
តាមដឹងរាល់ការចេញនេសាទនៅកំពង់ឃ្លាំង
ទាល់តែអោយលុយពួកគាត់ ទើបរកស្រួល សូមអំពាវនាវ
លោកមន្រី្ត គួរគិតថា អ្នកនាខុស បើលោកបើកនោះ
ផ្នែកមើល

Feb 23, 2013 08:33 AM

kbs

ពី សៀមរាប

សូមលោកមន្រ្តី បើចង់ចាប់គូរតែគិតថា បើគ្មានការអនុញ្ញាត
ពីអស់លោកមួលដ្នានទេ កប្រជាជនមិហានចេញ
រកទេ លោកគូរយែដឹងហើយថាអ្នកណាជាអ្នកយក
លុយនៅពីក្រោការនេដាទនេះ បើអោយស្មើភាពរវាង
រាស្រ្ត លោកគួរពីយួនផង រកសំបើមណាស់
រាល់ថ្ងៃ ទោះបីមានការចាប់បែបនរះកដោយ

Feb 23, 2013 08:19 AM