ថ្នាក់ដឹកនាំស្ថាប័នជំនាញខេត្តព្រះសីហនុ ស្នើឲ្យប្រជាពលរដ្ឋជាអ្នកប្រើប្រាស់ផ្លូវ ឬអ្នកបើកបរត្រូវចូលរួមគោរពច្បាប់ចរាចរណ៍ឲ្យបានទាំងអស់គ្នា នៅឱកាសធ្វើដំណើរទៅកាន់ស្រុកកំណើតជួបជុំគ្រួសារ និងធ្វើដំណើរកម្សាន្តក្នុងឱកាសពិធីបុណ្យភ្ជុំបិណ្ឌឆ្នាំនេះឲ្យមានសុវត្ថិភាព និងទទួលបានភាពសប្បាយរីករាយ។
អភិបាលខេត្តព្រះសីហនុ លោក យន្ត មីន បានរំលឹកដល់ប្រជាពលរដ្ឋទូទៅ ពិសេសប្រជាពលរដ្ឋធ្វើដំណើរតាមផ្លូវចេញចូលខេត្តជាប់មាត់សមុទ្រមួយនេះ ត្រូវគោរពច្បាប់ឲ្យបានជាប្រចាំ និងត្រូវមានសុជីវធម៌ក្នុងការបើកបរ មានការយោគយល់អធ្យាស្រ័យឲ្យគ្នាទៅវិញទៅមក ដោយមិនត្រូវបើកបរជែងគ្នាក្នុងល្បឿនលឿនលើសច្បាប់កំណត់នោះទេ។
នាឱកាសនេះ លោក យន្ត មីន បានជូនពរដល់ប្រជាពលរដ្ឋ នៅតាមក្រុមគ្រួសារនីមួយៗ ក្នុងពិធីបុណ្យភ្ជុំបិណ្ឌប្រពៃណីជាតិឆ្នាំនេះ សូមមានសុភមង្គលទាំងអស់គ្នា និងសូមអញ្ជើញមកទស្សនាខេត្តព្រះសីហនុ ឲ្យបានច្រើនកុះករ ព្រោះកម្លាំងសមត្ថកិច្ចបានត្រៀមការពារសន្តិសុខជូនទេសចរជាតិ អន្តរជាតិ ដោយមានការទទួលខុសត្រូវខ្ពស់៖ «ក្នុងឱកាសធ្វើដំណើរទៅវត្តអារាមនានា ឬទៅស្រុកកំណើតជួបជុំឱពុកម្ដាយ ក្រុមគ្រួសារនីមួយៗ សូមបួងសួងឲ្យបងប្អូនប្រជាពលរដ្ឋខ្មែរទាំងអស់មានសទ្ធាជ្រះថ្លា និងមានសេចក្ដីសុខផ្លូវចិត្ត ផ្លូវកាយក្តី ឲ្យបានសុខសប្បាយតាមគ្រួសាររៀងៗខ្លួន។ ក្នុងនោះការបើកបររបស់បងប្អូនក៏មិនត្រូវរូតរះពេកទេ គឺត្រូវប្រយ័ត្នពីគ្រោះថ្នាក់ចរាចរណ៍ផ្សេងៗ ដែលអាចនឹងកើតមានឡើងជាយថាហេតុ ដូច្នេះត្រូវប្រុងប្រយ័ត្ន និងគោរពច្បាប់ចរាចរណ៍ផ្លូវគោកឲ្យបានទាំងអស់គ្នា»។
ទាក់ទិនបញ្ហាចរាចរណ៍នេះដែរ ស្នងការដ្ឋាននគរបាលខេត្តព្រះសីហនុ បានបញ្ជូនកម្លាំងនគរបាលជំនាញ ឲ្យចុះនៅតាមគោលដៅជាច្រើនក្នុងខេត្តនេះឲ្យចុះចែកខិត្តប័ណ្ណអប់រំច្បាប់ចរាចរណ៍ផ្លូវគោកជូនដល់ប្រជាពលរដ្ឋ ឬអ្នកបើកបររថយន្តដឹកអ្នកដំណើរ រថយន្តដឹកកម្មករ និងអ្នករត់ម៉ូតូជាដើម ដើម្បីកាត់បន្ថយគ្រោះថ្នាក់ចរាចរណ៍នាពិធីបុណ្យភ្ជុំឆ្នាំនេះ។
បន្ថែមលើនេះ លោក អ៊ី សុខា ស្នងការរងនគរបាលខេត្តព្រះសីហនុ និងជាប្រធានការិយាល័យកណ្ដាលនគរបាលសណ្ដាប់ធ្នាប់សាធារណៈ បានអំពាវនាវដល់អ្នកប្រើប្រាស់ផ្លូវ ត្រូវមានការប្រុងប្រយ័ត្នពេលបើកបរឲ្យបានជាប្រចាំ ជាពិសេសមិនត្រូវបើកបរលឿនហួសច្បាប់បានកំណត់ ឬបើកប្រជែងគ្នាខ្វះការយោគយល់នោះទេ។
លោកសង្កត់ធ្ងន់ថា រាល់ការបើកបរយានយន្តគ្រប់ប្រភេទ អ្នកកាន់ដៃចង្កូតដាច់ខាតមិនត្រូវទទួលទានគ្រឿងស្រវឹងនោះទេ ហើយពលរដ្ឋអ្នកបើកបរម៉ូតូ ត្រូវតែពាក់មួយការពារសុវត្ថិភាពឲ្យបានទាំងអស់គ្នា ទាំងអ្នកកាន់ដៃចង្កូត និងអ្នករួមដំណើរ ទោះចម្ងាយផ្លូវជិត ឬឆ្ងាយបែបណាក្តី។
របាយការណ៍ស្នងការដ្ឋាននគរបាលខេត្តព្រះសីហនុ ឆមាសទី១ ឆ្នាំ២០១៦ បង្ហាញថា មូលដ្ឋាននេះកើតមានគ្រោះថ្នាក់ចរាចរណ៍ចំនួន ១៧៦ករណី។ ក្នុងនោះមានមនុស្សស្លាប់ និងរងរបួសជិត ៤០០នាក់។ បើប្រៀបធៀបពេលវេលាដូចគ្នាឆ្នាំ២០១៥ បានកើនជិត ៥០ករណី។ គ្រោះថ្នាក់នេះបានសម្លាប់មនុស្សចំនួន ៥៦នាក់ កើន ២៤នាក់ និងរងរបួសធ្ងន់ស្រាល ៣១០នាក់ គឺកើន ៩៥នាក់ បើប្រៀបធៀបឆ្នាំ២០១៥។ គ្រោះថ្នាក់ចរាចរណ៍ឆមាសទី១ ដើមឆ្នាំ២០១៦ នាខេត្តព្រះសីហនុ បានខូចខាតយានយន្តគ្រប់ប្រភេទ ២៩២គ្រឿង។ បើប្រៀបធៀបឆមាសទី១ ឆ្នាំ២០១៥ បានកើន ៧៩គ្រឿង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។