នាយិកាសាលាគ្រិស្តសាសនាមួយឈ្មោះ គ្លែដ ថាយឌីង (Glad Tiding) នៅក្រុងច្បារមន ខេត្តកំពង់ស្ពឺ អ្នកស្រី វ៉េនឌី លីម (Wendy Lim) ជាជនជាតិសិង្ហបុរី ត្រូវបានឃាតកវាយសម្លាប់កាលពីព្រឹកថ្ងៃទី៣០ មេសា នៅក្នុងអគារសាលារៀននោះ។
មន្ត្រីនគរបាលខេត្ត ឲ្យដឹងថា សពស្ត្រីរូបនោះត្រូវបានមន្ត្រីស្ថានទូតសិង្ហបុរី ប្រចាំកម្ពុជា និងនគរបាលក្រសួងមហាផ្ទៃ បញ្ជូនមកភ្នំពេញ ដើម្បីធ្វើវិភាគ ដោយលទ្ធផលបង្ហាញថា នេះជាករណីប្លន់សម្លាប់។
ជនសង្ស័យជាឃាតកវាយសម្លាប់នាយិកាសាលាគ្រិស្តសាសនាមួយនៅខេត្តកំពង់ស្ពឺ ត្រូវបានចាប់ខ្លួនហើយ និងកំពុងបន្តនីតិវិធីសាកសួរនៅក្នុងស្នងការនគរបាលខេត្តកំពង់ស្ពឺ។
ប្រធានការិយាល័យកណ្ដាលយុត្តិធម៌នៃស្នងការនគរបាលខេត្តកំពង់ស្ពឺ លោក សម សក្តិ នៅថ្ងៃទី១ ឧសភា មានប្រសាសន៍ថា ជនសង្ស័យសម្លាប់ស្ត្រីជនជាតិសិង្ហបុរី នោះ ជាបុរស ៤នាក់ ដែលធ្វើកម្មករសំណង់ក្នុងសាលាគ្រិស្តសាសនានោះ។ លោកបន្តថា ករណីប្លន់សម្លាប់នេះ ទើបតែកើតឡើងម្តងនេះគត់ក្នុងឆ្នាំ២០១៣ ហើយសមត្ថកិច្ចគ្រប់គ្រងស្ថានការណ៍បានទាំងស្រុងហើយ។
លោកបញ្ជាក់ថា ជនសង្ស័យទាំង៤ ជាយុវជនដែលមានអាយុចាប់ពី ២០ឆ្នាំទៅ ៣២ឆ្នាំ។ ក្នុងចំណោមជនសង្ស័យទាំងបួននាក់ មានម្នាក់សារភាពរួចហើយ និងបីនាក់ទៀតកំពុងសួរបន្ត គ្រោងបញ្ជូនទៅកាន់តុលាការនៅថ្ងៃទី២ ខែឧសភា៖ «ចម្លើយជនដៃដល់ គាត់ឆ្លើយថា គាត់ធ្វើទាំង ៤នាក់។ អាយុខ្ពស់បំផុត ៣២ឆ្នាំ ធ្លាប់សំណង់ឲ្យជនរងគ្រោះ។ សាកសពជនរងគ្រោះ ម្សិលមិញបញ្ជូនទៅភ្នំពេញ និងថ្ងៃនេះបញ្ជូនទៅស្រុកកំណើតនៅសិង្ហបុរី»។
កាសែតក្នុងស្រុកបានស្រង់សម្ដីមន្ត្រីស្ថានទូតសិង្ហបុរី ដែលលើកឡើងថា ប្រទេសសិង្ហបុរី សង្ឃឹមថាអាជ្ញាធរកម្ពុជា នឹងចាត់វិធានការឲ្យមានប្រសិទ្ធភាពបំផុតចំពោះរឿងនេះ។ ចំណែកអាជ្ញាធរសិង្ហបុរី ជាអ្នកផ្តល់សេវាកុងស៊ុលដល់សាច់ញាតិជនរងគ្រោះ ដើម្បីឲ្យបានមកមើលសាកសពនៅកម្ពុជា។
ទាក់ទងនឹងឃាតកម្មនេះ មន្ត្រីអង្កេតអង្គការការពារសិទ្ធិមនុស្សអាដហុក (Adhoc) ប្រចាំខេត្តកំពង់ស្ពឺ លោក រ័ត្ន សាវី មានប្រសាសន៍ថា ឃាតកម្មលើស្ត្រីជនជាតិបរទេសនេះធ្វើឲ្យពលរដ្ឋភ័យខ្លាចជាខ្លាំង។ លោកបន្តថា ពលរដ្ឋបារម្ភពីសុវត្ថិភាពទ្រព្យសម្បត្តិ និងអាយុជីវិត ដោយកាលពីដើមខែមេសា មានករណីលួចឡានទំនើប ៣គ្រឿង និងចុងខែមេសា កើតករណីប្លន់សម្លាប់ទៀត៖ «ក្នុងខែ៤ ហ្នឹង ចោរបានលួចកាមរីឆ្លាមមួយគ្រឿង កាមរីបាឡែនមួយគ្រឿង និងតាគូម៉ាមួយគ្រឿង ធ្វើឲ្យប្រជាពលរដ្ឋមានការព្រួយបារម្ភពីសុវត្ថិភាពទ្រព្យសម្បត្តិ ហើយនិងព្រួយបារម្ភពេលចេញទៅទីឆ្ងាយអីចឹង។ រឿងល្បែងស៊ីសងពេញនិយម រឿងកន្ទុយលេខ លេងពេញទាំងអស់»។
អ្នកស្រី វ៉េនឌី លីម មានអាយុ ៥៥ឆ្នាំ ជានាយិកាអនុវិទ្យាល័យអន្តរជាតិ ឈ្មោះ គ្លែដ ថាយឌីង ត្រូវបានគេសម្លាប់នៅកន្លែងស្នាក់នៅរបស់គាត់ក្នុងសាលារៀននេះ។ ហើយសាកសពត្រូវបានអ្នកធ្វើការជាមួយគាត់ ប្រទះឃើញ និងរាយការណ៍ប្រាប់នគរបាលនៅព្រឹកថ្ងៃទី៣០ មេសា។
ករណីវាយសម្លាប់ស្ត្រីជនជាតិសិង្ហបុរី នេះ ជាករណីឃាតកម្មទី៣ ហើយ លើជនបរទេសដែលរស់នៅកម្ពុជា ក្នុងឆ្នាំ២០១៣។ ករណីទី១ ជាអំពើឃាតកម្មទៅលើស្ត្រីជនជាតិបារាំង ឈ្មោះ អូហ្វេលី ប៊ែកនី (Ophelie Begnis) កាលពីខែមករា ហើយសមត្ថកិច្ចទើបតែចាប់ខ្លួនជនសង្ស័យបានកាលពីដើមខែមេសា។ ឃាតកម្មទី២ ជាអំពើបាញ់សម្លាប់ជនជាតិជប៉ុន ឈ្មោះ គីតាគូ រ៉ាកូសេ (KITAKU RAKOSE) នៅភ្នំពេញ កាលពីខែមីនា ហើយមិនទាន់រកឃើញឃាតកនោះទេ។
ខេត្តកំពង់ស្ពឺ ក៏ជាទីកន្លែងដែលគេរកឃើញថា ឃាតកបានសម្លាប់បុរសជនជាតិបារាំង ឈ្មោះ ឡូរ៉ង់ វ៉ាលីយ៉ (Laurent Vallier) និងកូនៗទាំង ៥នាក់ ហើយមិនទាន់រកឃើញអត្តសញ្ញាណនៃឃាតកនោះនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។