ក្រសួងការបរទេសកម្ពុជា និងអង្គការទេសន្តរប្រវេសន៍អន្តរជាតិ ហៅកាត់ថា អាយ.អូ.អឹម (IOM) ដែលសហការជាមួយប្រទេសម៉ាឡេស៊ី បានបញ្ជូនកម្មករកម្ពុជា ចំនួន ៦នាក់ មកប្រទេសវិញ។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា ពលរដ្ឋខ្មែរចំនួន ៦នាក់ គឺស្ថិតក្នុងចំណោមអ្នករងគ្រោះខ្មែរ ១៦នាក់ ដែលស្ថានទូតម៉ាឡេស៊ី បានសហការជាមួយអាជ្ញាធរម៉ាឡេស៊ី បានជួយសង្គ្រោះពីទូកនេសាទរបស់ជនជាតិថៃ ដែលបានចូលនេសាទដោយខុសច្បាប់នៅក្នុងដែនទឹកប្រទេសម៉ាឡេស៊ី៖ «ប៉ុន្តែមកពីខេត្តផ្សេងៗមានខេត្តកំពង់ធំ ខេត្តសៀមរាប ខេត្តអីផ្សេងៗ ១៦នាក់។ ប៉ុន្តែ ឥឡូវហ្នឹងអង្គការ អាយ.អូ.អឹម គេចេញជាសោហ៊ុយសំបុត្រយន្តហោះបាន ៦នាក់សិន ហើយអ្នកផ្សេងទៀត គឺខាងក្រសួងការបរទេសយើងកំពុងតែស្នើទៅ អាយ.អូ.អឹម ជាបន្តបន្ទាប់។ ហើយគេកំពុងតែពិចារណាអ្នកបន្តបន្ទាប់ទៀតហើយ»។
លោក កុយ គួង ថ្លែងបន្តថា ពលរដ្ឋខ្មែរនិយមធ្វើចំណាកស្រុកទៅរកការងារធ្វើនៅបរទេស។ ពួកគេច្រើនលើសលប់មិនសូវទៅរកការងារធ្វើតាមរយៈក្រុមហ៊ុនស្របច្បាប់ទេ ទើបធ្លាក់ទៅក្នុងការជួញដូរពលកម្មពីប្រទេសមួយទៅប្រទេសមួយ ហើយក្លាយជាជនអន្តោប្រវេសន៍ខុសច្បាប់។ លោកថា ប្រសិនបើគ្មានកិច្ចសហការជាមួយប្រទេសជិតខាង និងអង្គការ អាយ.អូ.អឹម ទេ ពលរដ្ឋខ្មែរនឹងរឹតតែរងនូវការលំបាកពីការគាបសង្កត់របស់ថៅកែ បង្ខំឲ្យធ្វើការទាំងយប់ទាំងថ្ងៃលើទឹកសមុទ្រ ដើម្បីចាប់ត្រី។ លោកឲ្យដឹងថា កម្មករនេសាទជួយសង្គ្រោះបានពីសមុទ្រនៅប្រទេសម៉ាឡេស៊ី នៅសល់ ១០នាក់ទៀត ដែលអង្គការ អាយ.អូ.អឹម កំពុងតែស្វែងរកថវិកាដើម្បីបញ្ជូនគេឲ្យវិលមកប្រទេសកម្ពុជា វិញបន្តបន្ទាប់។
ពលករឈ្មោះ ង៉ែត ឈិ រស់នៅភូមិតារាជ្យ ឃុំត្រពាំងរាំង ស្រុកជុំគីរី ខេត្តកំពត ថ្លែងថា គាត់ចេញទៅធ្វើការនៅប្រទេសថៃ តាមក្រុមហ៊ុនស្របច្បាប់ ដោយមានកាន់លិខិតឆ្លងដែនត្រឹមត្រូវ។ ប៉ុន្តែនៅពេលគាត់ទៅដល់ប្រទេសថៃ ថៅកែថៃ បានដកយកលិខិតឆ្លងដែននោះទុក ហើយប្រាប់គាត់ថា ត្រូវធ្វើការឲ្យរួចថ្លៃធ្វើលិខិតឆ្លងដែនតម្លៃ ២ម៉ឺនបាតប្រាក់ថៃ សិន ទើបអាចទទួលបានប្រាក់ខែ។ ដោយសារបញ្ហានេះ ពួកគាត់គ្មានលុយទិញបាយ ទិញទឹក គឺមានតែកន្លែងស្នាក់នៅ ហើយធ្វើការប្រៀបដូចទាសករ។ លោកបញ្ជាក់ថា បញ្ហាដកយកលិខិតឆ្លងដែននេះ ទើបពលករខ្មែរច្រើនរយនាក់រងគ្រោះក្រោមអំពីការជួញដូរកម្លាំងពលកម្ម ព្រោះតែក្រុមហ៊ុននាំពលករទៅបរទេសនោះធ្វើការមិនច្បាស់លាស់ ហើយក្រសួងពាក់ព័ន្ធមិនបានត្រួតពិនិត្យ និងតាមដានសកម្មភាពក្រុមហ៊ុននាំពលករទៅធ្វើការនៅបរទេសនោះ។
ពលករ ង៉ែត ឈិ៖ «វាមុនដំបូងធ្វើប៉ាសស្ព័រឲ្យខ្ញុំ តែរយៈពេល ២អាទិត្យទេ។ ដល់ពេលក្រោយមក ទៅសន្យាជាមួយក្រុមហ៊ុនថៃ បើខែក្រោយពលករខ្ញុំនឹងស្របច្បាប់ ២ឆ្នាំ។ ដល់ពេលនោះបាត់រហូត អាប៉ាសស្ព័រក៏អត់ អាប៉ាសស្ព័រ២អាទិត្យក៏ដាច់។ អីចឹងមានន័យថា ពួកខ្ញុំគេយកទៅលក់តែម្តង លក់ទៅឲ្យតាប់ថៃ គេហៅថាមេការនៅស្រុកថៃ។ តែឥឡូវខ្ញុំមកដល់ស្រុកខ្មែរវិញហើយ»។
ពាក់ព័ន្ធការបញ្ជូនពលករពីបរទេសមកកម្ពុជា វិញនេះ មន្ត្រីសមាគមការពារសិទ្ធិមនុស្សអាដហុក (Adhoc) ខេត្តកំពត កញ្ញា សឹម សោភា ថ្លែងថា នៅក្នុង ៣ខែ ឆ្នាំ២០១៣ គ្រាន់តែនៅខេត្តកំពត មានពលករ ១០នាក់ បានមកដល់ប្រទេសវិញដោយសុវត្ថិភាព បន្ទាប់ពីសមាគមនេះបានសហការជាមួយក្រសួងមហាផ្ទៃ និងអង្គការពាក់ព័ន្ធ ដើម្បីស្វែងរកពលករតាមបណ្ដឹងពីក្រុមគ្រួសារ៖ «បញ្ហាធ្វើការចំណាកស្រុកហ្នឹង ជួបប្រទះបញ្ហាច្រើន គឺមានប្រទេសថៃ ប្រទេសម៉ាឡេស៊ី ហើយនិងប្រទេសឥណ្ឌូនេស៊ី»។
លោក កុយ គួង អ្នកនាំពាក្យក្រសួងការបរទេសកម្ពុជា បានអំពាវនាវសុំឲ្យពលរដ្ឋកម្ពុជា កុំប្រថុយប្រថានស្វែងរកការងារធ្វើនៅបរទេសតាមរយៈមេខ្យល់អូសទាញ គួររកការងារធ្វើតាមរយៈក្រុមហ៊ុនដែលមានច្បាប់អនុញ្ញាតពីរាជរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។