កម្មកររោងចក្រ អែស.អិល ជាង ៣ពាន់នាក់ ដើរថ្មើរជើងពីវិមានឯករាជ្យឆ្ពោះទៅកាន់ផ្ទះលោកនាយករដ្ឋមន្ត្រី ហ៊ុន សែន ហើយត្រូវសមត្ថកិច្ចវាយបំបែក និងបណ្ដេញចេញឲ្យទៅខាងកើតក្បែរព្រះបរមរូបព្រះបរមរតនកោដ្ឋ។
កម្មការិនីដែលរងរបួសដោយការវាយបណ្ដេញចេញពីមុខផ្ទះលោក ហ៊ុន សែន បានស្រែកយំថា ពួកគេទាមទារសុំឲ្យនាយករដ្ឋមន្ត្រីដោះស្រាយបញ្ហាដែលថៅកែរោងចក្រមិនព្រមដោះស្រាយតាមការស្នើសុំ ដូចជាសុំឲ្យដូរលោក មាស សុថា ចេញ ព្រោះលោកនោះប្រើកម្លាំងវាយដំកម្មករ។
ស្ត្រីរូបនោះបន្តថា ក្រៅពីនោះ កម្មករក៏ទាមទារសុំដូរលក្ខខណ្ឌការងារជាង ១០ចំណុចដែរ។ ប៉ុន្តែកម្មកររង់ចាំ ២ខែ ១១ថ្ងៃ គិតមកដល់ថ្ងៃទី២១ ខែតុលា អត់មានដោះស្រាយ។ នៅពេលគាត់មកសុំការជួយអន្តរាគមន៍ពីលោក ហ៊ុន សែន ស្រាប់តែគាត់ត្រូវក្រុមសមត្ថកិច្ចវាយដំដូចសត្វធាតុ៖ «ខ្ញុំអត់ចង់រស់ទេ ខ្ញុំចង់ងាប់តាមប្តីខ្ញុំ។ ប្តីខ្ញុំទៅទាហានងាប់ហើយ ឯខ្ញុំខំធ្វើការរោងចក្រ ឥឡូវគេធ្វើបាបទៀត។ ប៉ូលិសឆក់ពួកខ្ញុំ បើមិនត្រូវទេ ខ្ញុំមិនយំទេ ខ្ញុំសុខចិត្តងាប់តាមប្តីខ្ញុំទាហាន»។
កម្មការិនីម្នាក់ទៀតថ្លែងថា ពួកគាត់ទាមទារឲ្យថៅកែរោងចក្រដូរលោក មាស សុថា ចេញ ព្រោះលោក មាស សុថា នោះ បញ្ជាអាវុធហត្ថនៅក្នុងរោងចក្រវាយដំកម្មករ និងកាងឲ្យថៅកែជនជាតិសិង្ហបុរីប៉ុណ្ណោះ។
លោកស្រីថា លោក មាស សុថា មិនមានតួនាទីច្បាស់លាស់ក្នុងរោងចក្រ គឺចេះតែប្រើអំណាចបំបាក់ស្មារតីកម្មករ និងគំរាមបាញ់សម្លាប់ដែលធ្វើឲ្យកម្មករមិនពេញចិត្ត៖ «ទាមទារ ៥ចំណុច។ មុនដំបូងកម្មករអត់ចង់បានទាមទារអីទាំងអស់ សុំតែដកលោក មាស សុថា ចេញពីរោងចក្រ ហើយនិងកងរាជអាវុធហត្ថនៅក្នុងហ្នឹង ឲ្យដកចេញពីរោងចក្រ កម្មករនឹងព្រមចូលធ្វើការវិញ តែថៅកែអត់ព្រមទេ សុខចិត្តឲ្យទាំងអស់ ទុក មាស សុថា អ៊ីចឹងកម្មករមានអាវុធឯណាបាញ់ជាមួយកាំភ្លើង បាញ់ជាមួយកងរាជអាវុធហត្ថ កម្មករមានតែដៃ ម៉េចចាំយករាជអាវុធហត្ថមកធ្វើអី»។
ប្រធានសហជីព ស៊ីខាវឌូ (CCAWDU) លោក អាត់ ធន់ ថ្លែងថា កម្មកររោងចក្រ អែស.អិល ទាមទារថៅកែសុំប្ដូរលក្ខខណ្ឌការងារច្រើនចំណុច គឺសុំដកលោក មាស សុថា សុំដកមន្ត្រីប្រដាប់អាវុធ។ សុំឲ្យក្រុមហ៊ុនរៀបចំវេនធ្វើការតែ ៣វេន។ សុំឲ្យក្រុមហ៊ុនដកពាក្យបណ្ដឹងដែលក្រុមហ៊ុនប្ដឹងកម្មករនិងសហជីព និងសុំឲ្យក្រុមហ៊ុនផ្ដល់អត្ថប្រយោជន៍ផ្សេងៗ ក្នុងអំឡុងការតវ៉ា។
លោកថា រាល់ការទាមទារគ្មានការដោះស្រាយ បើទោះបីកម្មករប្ដឹងទៅក្រសួងការងារ ប្ដឹងទៅក្រុមប្រឹក្សាអាជ្ញាកណ្តាល ប្ដឹងទៅសាលារាជធានីភ្នំពេញ ក៏ដោយ ទើបជម្រើសចុងក្រោយកម្មករដើរមកផ្ទះនាយករដ្ឋមន្រ្តី ដើម្បីសុំជួយអន្តរាគមន៍៖ «គេថាញុះញង់ ប៉ុន្តែកម្មកររាប់ពាន់នាក់គាត់មក គាត់មកទឹកចិត្តរបស់គាត់ គ្មានអ្នកណាញុះញង់ទេ អ៊ីចឹងក្រុមហ៊ុនចេះតែរកវិធីដើម្បីបំបែកសំឡេងកម្មករទៅ។ មួយទៀត គឺយើងសុំឲ្យក្រុមហ៊ុនផ្ដល់នូវអត្ថប្រយោជន៍ផ្សេងៗនៅអំឡុងពេលតវ៉ា ព្រោះកម្មវត្ថុនៃការតវ៉ា គឺក្រុមហ៊ុនជាអ្នករៀបចំធ្វើដោយខ្លួនឯង គឺជួល មាស សុថា មកដើម្បីបង្ករឿង ហើយដូរវេនអី អត់មានប្រាប់ដល់កម្មករ ហើយកម្មករអត់ដឹងចូលធ្វើការយ៉ាងម៉េច អ៊ីចឹងគាត់ធ្វើកូដកម្មរហូតមកដល់បច្ចុប្បន្ននេះ»។
វិទ្យុអាស៊ីសេរី មិនអាចទាក់ទងលោក មាស សុថា ដែលកម្មករនិងសហជីពបានចោទនោះ ដើម្បីជម្រាបសួរព័ត៌មានតបនឹងការចោទបានទេ នៅថ្ងៃ២១ ខែតុលា។
អភិបាលរាជធានីភ្នំពេញ លោក ប៉ា សុជាតិវង្ស បានចុះចរចាផ្ទាល់ជាមួយកម្មករ និងសហជីពដល់កន្លែងតវ៉ាដែលនៅក្បែរព្រះបរមរូបព្រះបរមរតនកោដ្ឋ។ លោកបានសុំឲ្យកម្មករទៅជួបជុំគ្នានៅមុខវត្តបទុមវតី ដើម្បីស្វែងរកដំណោះស្រាយ ប៉ុន្តែកម្មករមិនព្រម ដោយពួកគេសុំនៅរង់ចាំចម្លើយនៅកន្លែងដដែល។
នៅម៉ោង ១០ព្រឹក ថ្ងៃ២១ ខែតុលា ប្រធានសហជីពស៊ីខាវឌូ លោកអភិបាលក្រុង និងរដ្ឋមន្រ្តីក្រសួងការងារ ជួបប្រជុំគ្នារកវិធីដោះស្រាយការទាមទាររបស់កម្មករ ដែលបន្តពិភាក្សាមិនទាន់ចប់រហូតដល់រសៀលថ្ងៃដដែល។
កម្មករនិងសហជីពឲ្យដឹងថា រោងចក្រ អែស.អិល មានចំនួនជាង ៦ពាន់នាក់ បានធ្វើការនៅក្នុងរោងចក្រនោះ។ នៅក្នុងថ្ងៃ២១ ខែតុលា មានកម្មករប្រមាណ ៣០០នាក់ បានធ្វើការ ឯកម្មករភាគច្រើនលើសលប់ បានធ្វើកូដកម្មតាំងពីអំឡុងមុនបោះឆ្នោតបន្តមកដល់បច្ចុប្បន្ន ដើម្បីសុំប្តូរលក្ខខណ្ឌការងារ។
លោក អាត់ ធន់ ប្រធានសហជីពស៊ីខាវឌូ ថ្លែងប្រាប់កម្មករថា តាមការសម្រេចក្នុងពេលប្រជុំរវាងសហជីព ក្រសួងការងារក្រោមការសម្របសម្រួលរបស់អភិបាលរាជធានីភ្នំពេញ ព្រមដកលោក មាស សុថា ហើយសុំថៅកែបើកប្រាក់អតីតភាពការងារឲ្យកម្មករដែលបញ្ឈប់ពីការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។