ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ប្រចាំរោងចក្រ អែស.អិល អ្នកស្រី ស៊ាន សុផល បានឲ្យដឹងនៅថ្ងៃទី៦ ខែកញ្ញា ថា កម្មករបានចូលធ្វើការវិញទៅតាមការណែនាំរបស់អភិបាលក្រុងភ្នំពេញ។ ប៉ុន្តែអ្នកស្រីកត់សម្គាល់ ការចូលធ្វើការនេះ តាមតែការណែនាំរបស់អាជ្ញាធរប៉ុណ្ណោះ រីឯក្រុមហ៊ុនហាក់ពុំសហការផ្ដល់ឲ្យកម្មករបានធ្វើការដូចធម្មតានោះទេ។
កាលពីថ្ងៃទី៥ ខែកញ្ញា កម្មករដេរសំលៀកបំពាក់ឲ្យម៉ាក លីវ៉ាយ (Lyvis) នៅរោងចក្រ អែស.អិល ប្រមាណ ៤ពាន់នាក់ បានដើរក្បួនពីរោងចក្ររបស់ពួកគាត់នៅសង្កាត់ស្ទឹងមានជ័យ ចូលទៅបិទផ្លូវព្រះមុនីវង្ស ខាងមុខសាលារាជធានីភ្នំពេញ ប្រមាណជិត ២ម៉ោង។
ជាលទ្ធផលបន្ទាប់ពីភាគីពាក់ព័ន្ធចូលចរចាជាមួយសាលារាជធានីភ្នំពេញ ក្រុមហ៊ុនបានសម្រេចលប់ចោលការព្យួរឈ្មោះកម្មករ និងការបញ្ឈប់កម្មករពីការងារ ព្រមទាំងតម្រូវឲ្យកម្មករទាំងអស់ចូលធ្វើការវិញនៅថ្ងៃសុក្រ ទី៦ ខែកញ្ញា។ ហើយថា នៅថ្ងៃច័ន្ទទី៩ កញ្ញា គណៈកម្មការចម្រុះ ដែលមានអភិបាលរាជធានី គណៈកម្មការដោះស្រាយបាតុកម្ម កូដកម្ម អាជ្ញាធរដែនដី សមាគមនិយោជក និងសហជីព នឹងដោះស្រាយបញ្ហាផ្សេងៗ មានជាអាទិ ផ្ដល់ប្រាក់បណ្ដេញចេញ ប្រាក់ជូនដំណឹង ប្រាក់ជំងឺចិត្ត ប្រាក់បំណាច់ឆ្នាំ និងប្រាក់ខែលើកចុងក្រោយ បើសិនជារោងចក្រនេះបិទទ្វារលែងដំណើរការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។