ក្រុមកម្មករនៃរោងចក្រ អែស.អិល ហៅការមិនអនុវត្តតាមសេចក្ដីសម្រេចរបស់រដ្ឋាភិបាល ដែលភាគីរោងចក្រនៅតែបន្តនាំឲ្យមានការខកខានម្ដងជាពីរដងនេះ គឺជាផ្នែកមួយបញ្ជាក់ថា ជាចេតនារបស់ភាគីរោងចក្រ ដោយចាត់ទុកថា ការសម្រេចនេះនឹងមិនអាចគ្របដណ្ដប់ ឬអាចមានឥទ្ធិពលណាមួយប្រឆាំងនឹងការសម្រេចចិត្តរបស់ថៅកែរោងចក្របានឡើយ។
កម្មការិនីម្នាក់ក្នុងចំណោមកម្មករជាច្រើនរយនាក់ផ្សេងទៀតរបស់រោងចក្រ អែស.អិល ឈ្មោះ រឿង ប៉ុម ដែលប្រមូលផ្ដុំគ្នានៅថ្ងៃទី២០ វិច្ឆិកា ថ្លែងថា អ្វីដែលក្រុមកម្មករផ្ទុះកូដកម្មជាថ្មីឡើងវិញនេះ ព្រោះតែភាគីរោងចក្រមិនគោរពតាមការសម្រេចនៃអង្គប្រជុំ ដែលភាគីទាំងពីរបានឯកភាពរួចហើយនោះក្នុងពេលកន្លងទៅ។
មានដើមកំណើតនៅខេត្តព្រៃវែង លោកស្រី រឿង ប៉ុម បន្តថា លើសពីនេះ ក្រុមកម្មករស្នើសុំឲ្យភាគីរោងចក្រទទួលយកតំណាងកម្មករចំនួន ១៩នាក់ ដែលបានបញ្ឈប់ អាចមានសិទ្ធិចូលធ្វើការឡើងវិញ៖ «ស.ជ.ណ ពីសម្ដេច ហ៊ុន សែន ហ្នឹងក៏ឲ្យអ្នក ១៩នាក់ហ្នឹងចូលធ្វើការដែរ។ ប៉ុន្តែ ថៅកែហ្នឹងមិនទាន់មានដូចថា ចេញជាក្រដាសលក្ខខណ្ឌមួយដើម្បីឲ្យកម្មករយើង ១៩នាក់ហ្នឹងចូល»។
ពាក់ព័ន្ធភាពចម្រូងចម្រាសនេះ នៅក្នុងកិច្ចប្រជុំកាលពីថ្ងៃទី១៣ វិច្ឆិកា ក្រោមការសម្របសម្រួលរបស់ក្រសួងការងារ និងបណ្ដុះបណ្ដាលវិជ្ជាជីវៈ និងគណៈកម្មការដោះស្រាយបាតុកម្ម និងកូដកម្ម ភាគីទាំងពីរបានសម្រេចលើគោលការណ៍ ៦ចំណុចរួចមកហើយ។ ប៉ុន្តែ ចំណុចដែលចាំបាច់ គឺខាងរោងចក្រសម្រេចផ្តល់លុយចំនួន ៥០% ជូនកម្មករក្នុងរយៈពេលនៃការតវ៉ាកន្លងទៅនេះ។
បញ្ហាដែលចាំបាច់ជាងនេះទៀត គឺពួកគេទាមទារឲ្យតំណាងកម្មករចំនួន ១៩នាក់ បានចូលធ្វើការដូចដើមវិញ។ បើទោះជានៅក្នុងកិច្ចប្រជុំកាលពីថ្ងៃទី១៣ វិច្ឆិកា ត្រូវជំទាស់ជាដាច់ខាត ដោយភាគីរោងចក្រថានឹងមិនអាចទទួលយកអ្នកទាំង ១៩នាក់ក៏ដោយចុះ ប៉ុន្តែការប្រជុំកាលពីថ្ងៃទី១៥ កន្លងទៅនេះ អ្នកទាំង ១៩នាក់នោះ ត្រូវបានព្រមព្រៀងឲ្យចូលធ្វើការឡើងវិញហើយដែរ។ ការផ្ទុះកូដកម្មជាថ្មីទៀតនេះ កម្មករបានបិទផ្លូវ៣៧១ ដែលឆ្លងកាត់មុខរោងចក្រ អែស.អិល មិនអនុញ្ញាតឲ្យអ្នកដំណើរបានឆ្លងកាត់ឡើយ។
យ៉ាងណាក៏ដោយនេះ ជាមូលហេតុថ្មីមួយទៀតក្នុងចំណោមមូលហេតុនៃការរើសអើង គឺភាគីខាងរោងចក្រមិនចង់ឲ្យមានសហជីពនៅក្នុងរោងចក្រ។ ករណីនេះ ទើបនាំឲ្យផ្ទុះកូដកម្មកើតឡើង ក្រោយពីមានសេចក្ដីសម្រេចនេះ គឺកម្មករទាមទារឲ្យភាគីរោងចក្រអនុវត្តដូចបានសន្យារួចមកហើយនោះ ឲ្យបានឆាប់។
នាយកគ្រប់គ្រងផលិតនៃរោងចក្រ អែស.អិល លោក អ៊ី ចាន់សន បដិសេធថា លោកនៅមិនទាន់បានដឹងពីមូលហេតុពិតប្រាកដនៃភាពយឺតយ៉ាវនេះនៅឡើយទេ។ បើទោះជាបែបណា លោកទទួលស្គាល់ថា ការបន្តអូសបន្លាយនៃវិវាទនេះ វានឹងធ្វើឲ្យកម្ពុជា ត្រូវប្រឈមនឹងកេរ្តិ៍ឈ្មោះមិនល្អនៅក្នុងតំបន់ និងពិភពលោក៖ «ខ្ញុំក៏សង្ឃឹមថាក៏មិនចង់ឲ្យយូរតទៅទៀតដែរ ព្រោះយើងវាមុខមាត់ប្រទេសយើងផងដែរ។ កាលណាយើងបន្តធ្វើអ៊ីចឹងទៅ វាអាចនឹងអាប់អោនមុខមាត់ប្រទេសយើងដែរ»។
បញ្ហាកើតចេញពីការជាប់គាំងនេះ បានបណ្ដាលឲ្យស្ត្រីលក់បាយវ័យ ៤០ឆ្នាំម្នាក់ ដែលពុំជាប់ពាក់ព័ន្ធក្នុងរឿងនេះ បានស្លាប់ភ្លាមៗ និងច្រើននាក់ផ្សេងទៀតត្រូវរងរបួសធ្ងន់ និងស្រាល ក្នុងការបាញ់បង្ក្រាបហិង្សាមួយ ប្រឆាំងក្រុមបាតុកររបស់សមត្ថកិច្ច កាលពីថ្ងៃទី១២ វិច្ឆិកា។
ព្រឹត្តិការណ៍ផ្ទុះឡើងនៅគល់ស្ពានស្ទឹងមានជ័យ កាលណោះ ក្រោយពីកម្លាំងចម្រុះរបស់រដ្ឋាភិបាលបានព្យាយាមរារាំងកម្មកររោងចក្រ អែស.អិល មិនឲ្យទៅកាន់ផ្ទះលោកនាយករដ្ឋមន្ត្រី ហ៊ុន សែន ក្នុងបំណងសុំឲ្យមានកិច្ចអន្តរាគមន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។