ពលរដ្ឋចោទប្រកាន់ក្រុមសមត្ថកិច្ចចម្រុះ មាន ប៉េអិម នគរបាល និងកងរាជអាវុធហត្ថប្រចាំការនៅចំណុចផ្លូវចូល លីយ៉ុងផាត់ ត្រង់ផ្លូវជាតិលេខ ៦ ថាបានចាប់បុរសម្នាក់វាយឲ្យមានរបួស ដោយចាត់ទុកការថតពីសកម្មភាពរបស់សមត្ថកិច្ច ថាគឺជាការរំខានចំពោះការបំពេញកិច្ចការរបស់មន្ត្រីជំនាញ។
ពលរដ្ឋនៅឃុំរកាកោង១ ស្រុកមុខកំពូល ខេត្តកណ្ដាល លោក ហឿន ប៉ូរេត ឲ្យដឹងនៅថ្ងៃទី៧ កញ្ញា ថា លោកត្រូវបានសមត្ថកិច្ចដែលឈរជើងនៅចំណុចផ្លូវចូល លីយ៉ុងផាត់ វាយចំភ្នែកមួយដៃ និងគំរាមដាក់ខ្នោះ ដោយចាត់ទុកការថតពីសកម្មភាពនៃការត្រួតពិនិត្យឡាន ដែលសង្ស័យថា អាចផ្ទុកគ្រឿងសព្វាវុធចូលក្រុង ចំថ្ងៃបាតុកម្ម គឺជាការជ្រៀតជ្រែកកិច្ចការរបស់សមត្ថកិច្ច៖ «ខ្ញុំជាប់រកដាក់ខ្នោះ ហើយធាក់ខ្ញុំមួយជើងទៀត ប៉ុន្តែឥតដួលទេ រួចដណ្ដើមទូរស័ព្ទក៏អត់បានដែរ។ ទះខ្ញុំមួយដៃចំភ្នែកឡើងក្រហម ឥឡូវកំពុងតែដេកស្អំនៅផ្ទះ។ មានប៉េអិម មានខាងឈុតខ្មៅ។ ឥតមានទេ ឥតមានទេ ព្រោះមួយដៃហ្នឹងលិចនោមហ្មង»។
ចំណែកករណីដាច់ដោយឡែកមួយផ្សេងទៀត ប្រជាពលរដ្ឋនៅឃុំអរិយក្សត្រ ត្រូវខកខានមិនបានចូលរួមមហាបាតុកម្មនៅថ្ងៃទី៧ កញ្ញា។ ប្រធានយុវជនគណបក្សសង្គ្រោះជាតិ នៅខណ្ឌដង្កោ លោក ប៊ូ ចាន់ណា និយាយថា ម្ចាស់ទូកដអរិយក្សត្រ ដែលចម្លងអ្នកដំណើរពីភ្នំពេញ ទៅឃុំអរិយក្សត្រ បានពន្យារការចេញដំណើររបស់ខ្លួនអស់រយៈពេលជាង ៣ម៉ោង។ លោកអះអាងថា ក្រោយពីត្រូវរង់ចាំជាច្រើនម៉ោង ក៏ប៉ុន្តែក្រោយមកត្រូវបានមេបញ្ជាការពាក់ស័ក្ដិប្រាំប្រចាំនៅកំពង់ដអរិយក្សត្រ ទម្លាយឲ្យដឹងថា មានបញ្ជាពីថ្នាក់លើមិនអនុញ្ញាតឲ្យទូកដដឹកជញ្ជូនអ្នកដំណើរឆ្លងកាត់ឡើយ៖ «បើតាមខ្ញុំដឹង មានមេប៉ូលិសម្នាក់សក្ដិប្រាំនៅហ្នឹង គាត់និយាយថា បញ្ជារបស់មេឲ្យបិទ ថាមានបញ្ជារបស់មេ»។
វិទ្យុអាស៊ីសេរី ពុំអាចស្នើសុំការអត្ថាធិប្បាយពីម្ចាស់ទូកដបានភ្លាមៗទេ ជុំវិញករណីនេះ និងពីមន្ត្រីនគរបាលប្រចាំចំណុចផ្លូវ លីយ៉ុងផាត់ នៅថ្ងៃទី៧ កញ្ញា។
ក៏ប៉ុន្តែ លោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ ឲ្យដឹងកាលពីថ្ងៃទី៥ ដើមសប្ដាហ៍កន្លងទៅនេះថា មន្ត្រីនគរបាលដែលមានភារកិច្ចអនុវត្តនៅតាមគោលដៅ មិនត្រូវអនុញ្ញាតឲ្យធ្វើដូចនេះឡើយ៖ «អគ្គស្នងការដ្ឋាននគរបាលជាតិ មិនដែលបានឮមេខ្ញុំបញ្ជាឲ្យទៅធ្វើបែបហ្នឹងទេ បាទ! មិនដែលមានទេ ហើយមិនមានគោលការណ៍អីថាទៅធ្វើបែបហ្នឹងថាទៅហាមគេឲ្យមកធ្វើបាតុកម្ម គឺឥតមាន»។
ចំណែក អ្នកស្រី លឹម មុន្នី អនុប្រធានកម្មវិធីស្ត្រីរបស់សមាគមអាដហុក (Adhoc) ដែលបានចុះអង្កេតដោយផ្ទាល់ការប្រើប្រាស់ហិង្សាពីសំណាក់សមត្ថកិច្ច ប្រឆាំងសកម្មជនគណបក្សសង្គ្រោះជាតិ មានប្រសាសន៍ថា អ្នកគាំទ្រគណបក្សប្រឆាំង ពិតជាត្រូវរងការប្រើហិង្សាពីសមត្ថកិច្ច។ អ្នកស្រីគិតថា ការត្រួតពិនិត្យអាវុធជាតិផ្ទុះហាក់ពុំមានតម្លាភាពឡើយ ព្រោះការអនុវត្តបានប្រឆាំងតែចំពោះឡានណាដែលសង្ស័យថា អ្នកដំណើរមានបំណងទៅចូលរួមបាតុកម្មប៉ុណ្ណោះ៖ «បុរសម្នាក់ឈ្មោះ ប៉ូរេត ហ្នឹង ហើយនិងប្រជាជនត្រូវបានរាយការណ៍ យើងបានជួប ប៉ូរេត ហ្នឹងដែរ ថាគាត់ត្រូវបានអ្នកដាក់បារ៉ាស់ឃាត់វាយធ្វើបាបគាត់។ ប៉ុន្តែ យើងឥតមានឃើញឈាមហូរទេ តែគ្រាន់តែថា ចាប់គ្រៀកគាត់របៀបជាសហាវព្រៃផ្សៃ ហើយម្នាក់ហ្នឹងគ្រៀកម្នាក់វាយអីអ៊ីចឹង រាងដាល់តប់គាត់អ៊ីចឹងទៅ»។
ការដាក់បារ៉ាស់ត្រួតពិនិត្យអាវុធជាតិផ្ទុះនេះ ត្រូវបានគេពង្រាយគ្រប់ច្រកចូលសំខាន់ៗមកភ្នំពេញ ដូចជា ផ្លូវជាតិលេខ៤ លេខ៥ លេខ៣ លេខ១ លេខ៦ និងផ្លូវជាតិលេខ២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។