គ្រូបង្រៀន និងសិស្សមួយចំនួន ចោទប្រកាន់នាយកអនុវិទ្យាល័យចម្ការកៅស៊ូស្នួល ខេត្តក្រចេះ ថាមានសីលធម៌មិនល្អ ជេរប្រមាថបុគ្គលិកសិក្សា និងសិស្ស ប្រើប្រាស់ថវិកាទ្រទ្រង់សាលាមិនបានត្រឹមត្រូវ និងបង្កើតបញ្ហាអសកម្មជាច្រើនទៀតនៅក្នុងការបំពេញការងារប្រចាំថ្ងៃ។
តើការចោទប្រកាន់នេះ មានមូលដ្ឋានអ្វីខ្លះជាសំអាង? តើនាយកសាលាមានប្រតិកម្មបែបណាទាក់ទិនការចោទប្រកាន់នេះ?
គ្រូបង្រៀនចំនួន ៨នាក់នៅអនុវិទ្យាល័យចម្ការកៅស៊ូ ស្នួល ឋិតក្នុងឃុំស្នួល ស្រុកស្នួល ខេត្តក្រចេះ ស្នើសុំទៅក្រសួងអប់រំ យុវជន និងកីឡា ឲ្យផ្លាស់ប្ដូរនាយកអនុវិទ្យាល័យនេះចេញពីតំណែង ហើយសុំឲ្យមន្ទីរអប់រំ ជ្រើសរើសបុគ្គលិកអប់រំមានសមត្ថភាព និងមានសីលធម៌ល្អ មកដឹកនាំអនុវិទ្យាល័យនេះជំនួសនាយកបច្ចុប្បន្ននេះ។
ការស្នើសុំនេះ ធ្វើឡើងតាមរយៈពាក្យបណ្ដឹងមួយច្បាប់ចុះថ្ងៃទី២៧ ខែមេសា ឆ្នាំ២០១៥ ដាក់ជូនរដ្ឋមន្ត្រីក្រសួងអប់រំ ដើម្បីស៊ើបអង្កេតភាពមិនប្រក្រតីដែលប្រព្រឹត្តឡើងដោយនាយកអនុវិទ្យាល័យរូបនេះ ខណៈបុគ្គលិកសិក្សាទាំងនោះបានដាក់ពាក្យប្ដឹងទៅមន្ទីរអប់រំខេត្តក្រចេះ ប្រមាណ ៣ខែកន្លងទៅ ប៉ុន្តែមិនឃើញមានដំណោះស្រាយ។
គ្រូបង្រៀនឈ្មោះ ប៉ា វិបុល រៀបរាប់ថា គ្រូបង្រៀន និងសិស្សភាគច្រើនមិនពេញចិត្តការដឹកនាំរបស់ លោក ម៉ៅ ពន្លក ជានាយកអនុវិទ្យាល័យ ព្រោះប្រមាណ ៥ឆ្នាំកន្លងទៅនេះ ពួកគេបានស៊ូទ្រាំចំពោះការប្រើពាក្យសំដីអសុរោះ គ្មានសីលធម៌ ជេរប្រមាថគ្រូ និងសិស្ស និងមិនធ្វើជាគំរូល្អក្នុងនាមជាថ្នាក់ដឹកនាំដល់គ្រូដទៃ និងសិស្ស។ ដោយឡែកនាយករូបនេះ ប្រើប្រាស់ថវិកាក្រសួងដែលផ្តល់សម្រាប់ទ្រទ្រង់សាលាមិនត្រូវគោលដៅ ឃុបឃិតយកប្រាក់បៀវត្សរ៍គ្រូពីរនាក់មិនមកបង្រៀនសិស្សរយៈពេល ២ឆ្នាំដល់ ៤ឆ្នាំ និងគាបសង្កត់សិស្សឲ្យរៃអង្គាសប្រាក់សម្រាប់ចំណាយផ្សេងៗក្នុងការងារបង្រៀនទៀតផង៖ «មានពាក្យអាគ្រូភ្លើ អាគ្រូឡប់ អាគ្រូចរិតដូចឆ្កែ ទាំងគ្រូទាំងសិស្ស ហើយនិងពាក្យអសុរោះផ្សេងទៀត។ បើសិនបក្ខពួកគាត់ គាត់ដកមុខវិជ្ជាផ្សេងៗឲ្យបង្រៀនល្អៗ គ្នាគាត់ឈប់ គាត់អត់ដាក់អវត្តមានទេ ពេលអ្នកប្រឆាំងគាត់ឈប់ គាត់ចាំគូសអវត្តមានតែម្តង។ គាត់ប្រើពាក្យថា បើគាត់មុខវិជ្ជាណាឲ្យគ្នាគាត់បង្រៀន គាត់មានអន្តរាគមន៍ពីខាងមន្ទីរ ឬពីខាងណាមួយអ៊ីចឹង»។
ដូចគ្នានេះដែរ គ្រូបង្រៀនឈ្មោះ គា វុត្ថា អះអាងថា គ្រូបង្រៀនភាគច្រើនបានផ្ដិតមេដៃតវ៉ាករណីនេះទៅមន្ទីរអប់រំ តាំងពីខែមីនា ប៉ុន្តែមិនឃើញមានចំណាត់ការបែបណាឡើយ។ លោកបន្តថា គ្រូបង្រៀនដែលតវ៉ាមានភស្តុតាងគ្រប់គ្រាន់ដែលបញ្ជាក់ថា នាយកអនុវិទ្យាល័យឈ្មោះ ម៉ៅ ពន្លក បានប្រព្រឹត្តខុសឆ្គងច្រើនករណី។ ហេតុនេះ ក្រសួងអប់រំ គួរចុះស៊ើបអង្កេតដើម្បីដោះស្រាយការតវ៉ារបស់ក្រុមគ្រូបង្រៀន៖ «ពិតតែម្តង អត់មានភូត ព្រោះខ្ញុំមានភស្តុតាងទាំងអស់ យកលុយសិស្ស។ អ៊ីចឹងបានខ្ញុំថា ចង់ឲ្យអ្នកណាម្នាក់ចុះមកមើល ស៊ើបអង្កេតមើលទៅ ដើម្បីដឹងថាយ៉ាងម៉េច?»។
អនុវិទ្យាល័យចម្ការកៅស៊ូ ស្នួល មានសិស្សជាង ៣០០នាក់ និងគ្រូបង្រៀន រួមនឹងបុគ្គលិកសិក្សាផ្សេងទៀតសរុប ១៧នាក់។
ឆ្លើយតបការចោទប្រកាន់នេះ នាយកអនុវិទ្យាល័យចម្ការកៅស៊ូ ស្នួល លោក ម៉ៅ ពន្លក បដិសេធថា លោកមិនបានប្រព្រឹត្តអំពើខុសឆ្គង ឬប្រព្រឹត្តអំពើពុករលួយអ្វីដូចការអះអាងរបស់គ្រូ ដែលបានប្ដឹងលោកនោះឡើយ។ លោកទទួលស្គាល់ថា បានប្រើពាក្យសំដីមិនគប្បីខ្លះចំពោះសិស្ស និងគ្រូ ដោយសារតែពួកគេមិនស្តាប់ការណែនាំរបស់លោក ក៏ប៉ុន្តែករណីនេះ លោកបានសុំទោសពួកគេរួចហើយ។ លោកកត់សម្គាល់ថា មូលហេតុដែលគ្រូមួយចំនួនប្ដឹងដកលោកពីតំណែង ដោយសារពួកគេខឹងនឹងលោក ដែលរឹតបន្តឹងបញ្ហាអវត្តមានគ្មានច្បាប់របស់គ្រូទាំងនោះ៖ «ប្ដឹងហ្នឹងខុសហើយ អត់មានទេ។ ទិញសម្ភារៈខ្ញុំមានវិក្កយបត្រ ឆ្នាំមុនក្រសួងគេចុះមកមើលបិទបញ្ជីត្រឹមត្រូវអស់ហើយ។ ខ្ញុំអត់បានជេរទេ ប៉ុន្តែខ្ញុំថាគ្រូមកបង្រៀនដឹងតែបង្រៀន អត់ជួយមើលសិស្សទេ សិស្សវាវាយឈ្លោះគ្នា ខ្ញុំថាអាសិស្ស និងគ្រូដូចឆ្កែអស់ហើយ»។
វិទ្យុអាស៊ីសេរី នៅថ្ងៃទី១២ ខែឧសភា មិនអាចសុំការបញ្ជាក់ពីអ្នកនាំពាក្យក្រសួងអប់រំ បាននៅឡើយ ដោយសារទូរស័ព្ទលោកមិនមានអ្នកទទួល។
ទាក់ទិនការប្ដឹងនេះដែរ នាយកមន្ទីរអប់រំខេត្តក្រចេះ លោក ឡាយ បូរ៉ា មានប្រសាសន៍បញ្ជាក់ថា មន្ត្រីមន្ទីរនេះកំពុងស៊ើបអង្កេតការប្ដឹងតវ៉ានេះហើយ ក៏ប៉ុន្តែលោកមិនប្រាកដថា តើភាគីណាខុស ឬត្រូវនោះទេ? លោកថា ការស៊ើបអង្កេត ទាមទារពេលវេលា មិនអាចធ្វើការដោយប្រញាប់ប្រញាល់ដូចការចង់បានរបស់គ្រូបង្រៀនទាំងនោះឡើយ៖ «គេកំពុងប្រមូលសំណុំរឿង ប៉ុន្តែមិនដឹងជាអ្នកប្ដឹងខូច ឬអ្នកណាខូចទេ គេកំពុងស្រាវជ្រាវ។ ខ្ញុំបានឲ្យការិយាល័យបុគ្គលិកហៅគ្រូទាំងអស់នៅសាលាហ្នឹង មកប្រមូលព័ត៌មានទាំងអស់ បានខ្ញុំធ្វើការ ព្រោះអាហ្នឹងយើងធ្វើការលឿនពេក អត់កើតទេ»។
ទោះជាយ៉ាងនេះក្តី សិស្សអនុវិទ្យាល័យចម្ការកៅស៊ូ ស្នួល មួយរូបសុំមិនឲ្យបញ្ចេញឈ្មោះ បង្ហាញចេតនាមិនពេញចិត្តចំពោះសីលធម៌មិនល្អរបស់លោកនាយកអនុវិទ្យាល័យ ដែលជេរប្រមាថសិស្ស និងគ្រូ។ កញ្ញាសំណូមពរឲ្យថ្នាក់ដឹកនាំក្រសួងអប់រំ ចាត់វិធានការលុបបំបាត់ភាពអសកម្មនៅក្នុងអនុវិទ្យាល័យនេះ៖ «មិនពេញចិត្តត្រង់គាត់មើលងាយថា ពួកសិស្សចរិតថោក។ គាត់ថាទាំងសិស្សទាំងគ្រូ ខ្ញុំថាកុំឲ្យគាត់ធ្វើអ៊ីចឹងទៀត ព្រោះប៉ាម៉ាក់ខ្ញុំអត់ដែលជេរថាពួកខ្ញុំចរិតថោកស្អីអ៊ីចឹងទេ»។
ភាពអសកម្មសំខាន់ៗដែលគ្រូបង្រៀន ៨នាក់ប្ដឹងចោទលោកនាយកអនុវិទ្យាល័យចម្ការកៅស៊ូ ស្នួល រួមមាន ចាយថវិកាទ្រទ្រង់សាលាគ្មានតម្លាភាព ឃុបឃិតយកប្រាក់បៀវត្សរ៍គ្រូបង្រៀនពីរនាក់មិនមកបង្រៀនរយៈពេល ២ឆ្នាំ និង ៤ឆ្នាំ រៃអង្គាសប្រាក់ពីសិស្សខុសគោលការណ៍ក្រសួងអប់រំ ប្រើអំណាចផ្ដាច់ការ ប្រកាន់បក្ខពួកធ្វើកាលវិភាគបង្រៀន និងគំរាមសិស្សមិនឲ្យធ្វើការតវ៉ាប្រឆាំងភាពអសកម្មរបស់នាយក ប្រើពាក្យជេរប្រមាថសិស្ស និងគ្រូ ចំណែកលោកនាយកមិនមកបំពេញការងារតាមពេល និងម៉ោងធ្វើការឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។