ការតវ៉ារបស់កម្មករ នៅក្នុងវិស័យរោងចក្រកាត់ដេរសំលៀកបំពាក់ ជាការដាក់សម្ពាធមួយធ្វើឲ្យតម្លៃហ៊ុននៅក្នុងផ្សារមូលប័ត្រកម្ពុជាធ្លាក់ថ្លៃ។ អ្នកវិភាគលើវិស័យមូលប័ត្របានអះអាងថា អំពើហិង្សាដែលកើតឡើងពីការទាមទារប្រាក់ឈ្នួល និងទាមទារលក្ខខណ្ឌការងារសមរម្យ ពិតជាឧបសគ្គសម្រាប់ក្រុមហ៊ុនដែលចង់ចុះបញ្ជី វិនិយោគលក់ភាគហ៊ុន នៅក្នុងផ្សារមូលប័ត្រ។
ភាគហ៊ុនរបស់រោងចក្រសំលៀកបំពាក់ ឈ្មោះជីធីអាយ (Grand Twin International) ដែលបានបោះពុម្ពផ្សាយលក់ហ៊ុនរបស់ខ្លួននៅ ក្នុងផ្សារមូលប័ត្រកម្ពុជាបានបន្តធ្លាក់ថ្លៃជាលំដាប់ ដោយគិតចាប់តាំងពីក្រុមហ៊ុននេះ បានចូលលក់ហ៊ុនរបស់ខ្លួន កាលពីខែឧសភាឆ្នាំ២០១៤កន្លងមក។
ការធ្លាក់ថ្លៃ គឺជាការបង្ហាញថាវិស័យមូលប័ត្រកម្ពុជា កំពុងរងផលប៉ះពាល់ពីកត្តាខាងក្រៅដូចជា ការយល់ដឹងរបស់អ្នកទិញហ៊ុន និងការផ្សព្វផ្សាយ អំពីសកម្មភាពអាជីវកម្មនៅក្នុងផ្សារមូលប័ត្រហាក់នៅមានកម្រិតទាប។
គេហទំព័រ របស់ផ្សារមូលប័ត្រកម្ពុជានៅថ្ងៃទី១៧វិច្ឆិកាបានបង្ហាញថា តម្លៃហ៊ុនរបស់ក្រុមហ៊ុនជីធីអាយ ធ្លាក់ចុះ១៨% មកត្រឹម ៧ពាន់៩រយក្នុងមួយហ៊ុន បើប្រៀបធៀបតម្លៃហ៊ុនដែលបានបោះពុម្ពផ្សាយរបស់ខ្លួនកាលពីខែឧសភា ។ ចំណែក ភាគហ៊ុនរបស់រដ្ឋាករទឹកស្វយ័តរាជធានីភ្នំពេញ បានធ្លាក់ថ្លៃប្រមាណ៧% មកត្រឹម៤ពាន់៨រយរៀលក្នុងមួយហ៊ុន នៅថ្ងៃទី១៧វិច្ឆិកា បើប្រៀបធៀបនឹងតម្លៃហ៊ុននៅសប្ដាហ៍មុន។
អ្នកវិភាគថ្នាក់ខ្ពស់នៃក្រុមហ៊ុនតុងយ៉ាស៊ីធ្យូរីធី (Tong Yang Securities) លោក ស៊ីន ស៊ីវុធថារ៉ា មានប្រសាសន៍ថា ការធ្លាក់ថ្លៃហ៊ុន បណ្ដាលមកពីកត្តាសំខាន់ពីរ ទីមួយស្ថានភាពផលចំណេញរបស់ក្រុមហ៊ុន និងកត្តាសំខាន់ទីពីរ ដោយសារតែ ការធ្វើកូដកម្ម និងបាតុកម្ម ពីសំណាក់កម្មករ នៅក្នុងវិស័យកាត់ដេរសំលៀកបំពាក់។ ម្យ៉ាងវិញទៀត ភាពខ្វះខាតព័ត៌មាន ក៏ជាកត្តាសំខាន់ផ្សេងទៀតដែលធ្វើតម្លៃហ៊ុនធ្លាក់ថ្លៃនៅផ្សារមូលប័ត្រដែរ។ សំឡេង
បន្ថែមលើនេះលោក ស៊ី វុធថារ៉ា បានឲ្យដឹងថាកត្តាដែលក្រុមហ៊ុនចុះបញ្ជីលក់ហ៊ុន មិនបានផ្សព្វផ្សាយព័ត៌មានភ្លាម អំពីរបាយការណ៍ហិរញ្ញវត្ថុរបស់ក្រុមហ៊ុននីមួយៗ ឲ្យសាធារណជនបានដឹង គឺជាកត្តាធ្វើឲ្យតម្លៃហ៊ុនធ្លាក់ថ្លៃ។
អ្នកវិភាគសេដ្ឋកិច្ចឯករាជ លោក ស្រី ចន្ធី យល់ឃើញថាកត្តាដែលធ្វើឲ្យសកម្មភាពទិញលក់មូលប័ត្រ មានសភាពនៅទ្រឹងដោយសារ ការយល់ដឹងពីសាធារណជនអំពីការជួញដូរ ហ៊ុន នៅមានកម្រិត និងឈ្មួញធំៗ មិនមានបំណងវិនិយោគដោយសារ មិនទទួលបានផលចំណេញច្រើន។
តាមបទពិសោធន៍នៃការបើកផ្សារមូលបត្រ គឺទាមទាររយៈប្រមាណ១០ឆ្នាំ ដើម្បីបង្ហាញថាផ្សារមូលប័ត្រ មានការទុកចិត្តពីសាធារណជន និងក្រុមហ៊ុនដែលចុះបញ្ជីលក់ហ៊ុន។ ចំណែកផ្សារមូលប័ត្រកម្ពុជាបានបង្កើតឡើង ប្រមាណ៣ឆ្នាំប៉ុណ្ណោះ។ បច្ចុប្បន្នគណៈកម្មាធិការមូលប័ត្រកម្ពុជា រង់ចាំការចុះបញ្ជីពីក្រុមហ៊ុនរបស់រដ្ឋចំនួនពីផ្សេងទៀត ដើម្បីលក់ហ៊ុននៅក្នុងផ្សារមូលបត្រកម្ពុជា ក្នុងនោះមាន កំពង់ផែស្វយ័តព្រះសីហនុ និងអគ្គិសនីកម្ពុជា ដើម្បីជំរុញសកម្មភាពទិញលក់ហ៊ុនកាន់តែច្រើនទៅក្នុងផ្សារមូលប័ត្រកម្ពុជា។
ការអភិវឌ្ឍវិស័យមូលប័ត្រគឺជាមូលដ្ឋានមួយយ៉ាងសំខាន់សម្រាប់ វិស័យឯកជន និងការអភិវឌ្ឍសេដ្ឋកិច្ចជាតិ ដោយសារតែវិស័យនេះផ្ដល់ជម្រើសសម្រាប់ក្រុមហ៊ុនរដ្ឋ និងឯកជនដើម្បីបង្កើនទុនវិនិយោគ ក្នុងការពង្រីកផលិតកម្ម និងពង្រឹងសមត្ថភាពប្រកួតប្រជែងនៅក្នុងទីផ្សារជាតិ និងអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។