ការជួញដូរហ៊ុននៅក្នុងផ្សារមូលបត្រកម្ពុជា ហាក់មានភាពស្ងប់ស្ងាត់ ដែលបានផ្សព្វផ្សាយនៅលើគេហទំព័ររបស់ផ្សារមូលបត្រកម្ពុជា នៅថ្ងៃទី១៦ កក្កដា ឆ្នាំ២០១៣។ ទំហំនិងចំនួនប្រតិបត្តិការជួញដូរ ស្ទើរតែគ្មានសកម្មភាពទាល់តែសោះចាប់តាំងពីការឃោសនាបោះឆ្នោតរបស់គណបក្សនយោបាយ ដែលបានចាប់ផ្ដើមកាលពីថ្ងៃទី២៧ មិថុនា មកម្ល៉េះ។
អ្នកវិភាគហិរញ្ញវត្ថុបានអះអាងថា ការធ្លាក់ចុះនៃការជួញដូរហ៊ុននេះ មិនរងឥទ្ធិពលពីសកម្មភាពឃោសនារបស់គណបក្សនយោបាយនោះឡើយ។ ការថយចុះនោះ ដោយសារការរំពឹងទុករបស់អ្នកវិនិយោគធ្លាក់ចុះ។ ការរំពឹងទុករបស់អ្នកលេងហ៊ុន (អ្នកវិនិយោគ) ដែលឆ្លុះបញ្ចាំងសកម្មភាពជួញដូរកើនឡើង រួមមានតម្លៃហ៊ុន និងការបែងចែកភាគលាភរបស់ក្រុមហ៊ុនលក់មូលប័ត្រ។
ប្រធាននាយកប្រតិបត្តិក្រុមហ៊ុនមូលបត្រ សូណាត្រា លោកឧកញ៉ា ស៊ន សុខណា បានសង្កេតឃើញថា សកម្មភាពជួញដូរមូលបត្រមានសភាពនៅទ្រឹង ឬបន្តថយចុះទាំងតម្លៃ និងសកម្មភាពជួញដូរហ៊ុននៅរយៈពេលចុងក្រោយនេះ៖ «ទំហំនៃការជួញដូររាល់ថ្ងៃហ្នឹង ជួនកាលមាន ជួនកាលអត់មាន។ តែបើមាន ក៏មានធំដែរ ដោយសារថា មានក្រុមហ៊ុនឡើងផ្សារហ៊ុនទើបតែមួយ គឺរដ្ឋាករទឹកស្វយ័តក្រុងភ្នំពេញ ធ្វើឲ្យការជួញដូរមិនទាន់មានសកម្មភាពខ្លាំងក្លានៅឡើង»។
បន្ថែមលើបញ្ហានេះ អត្រាបម្រែបម្រួលតម្លៃស្ថិតនៅកម្រិតមួយទាបបំផុត ដោយសារតែអតិថិជន ឬអ្នកវិនិយោគទុនដែលជួញដូរហ៊ុនជាមនុស្សដដែលៗ ជាពិសេសអ្នកជួញដូរហ៊ុនជាលក្ខណៈបុគ្គល។
ប្រធានក្រុមប្រឹក្សាភិបាលនៃក្រុមហ៊ុនមូលបត្រភ្នំពេញ លោក គុយ វ៉ាត មានប្រសាសន៍ថា ដើម្បីបង្កើនសកម្មភាពជួញដូរមូលបត្រ គណៈកម្មការមូលបត្រ និងក្រុមហ៊ុនមូលបត្រ ត្រូវសហការគ្នា លើការកសាងទំនុកទុកចិត្តអតិថិជន ឬអ្នកវិនិយោគមូលបត្រ៖ «មានទំនុកចិត្តលើការវិនិយោគ ដូចថា ក្រុមហ៊ុនដូចគ្នា នៅពេលដែលម្នាក់អត់ហ៊ានវិនិយោគលើវិស័យហ្នឹងទេ ធ្វើឲ្យទីផ្សារដើរមិនលឿនបាន»។
ទោះជាយ៉ាងណាក៏ដោយ គិតចាប់ពីខែមេសា ឆ្នាំ២០១៣ តម្លៃហ៊ុនបន្តធ្លាក់ចុះរហូតដល់បច្ចុប្បន្ន។ តម្លៃនៃការជួញដូរហ៊ុនមានតម្លៃចន្លោះពី ៦.៣០០ ទៅ ៦.២០០ ប៉ុណ្ណោះ។
បរិមាណជួញដូរជាមធ្យមក្នុងមួយថ្ងៃមានចំនួន ១៦.០០០ហ៊ុន សមាមាត្រនឹងទឹកប្រាក់ដែលបានជួញដូររៀងរាល់ថ្ងៃជាមធ្យមមានចន្លោះ ២ ទៅ ៥ម៉ឺនដុល្លារអាមេរិក។ បច្ចុប្បន្នក្រុមហ៊ុនមូលបត្រចំនួន ៧ក្រុមហ៊ុន ដែលទទួលបានអាជ្ញាប័ណ្ណពីគណៈកម្មការមូលបត្រកម្ពុជា ដែលអាចទិញលក់ហ៊ុននៅលើផ្សារមូលបត្រកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។