អភិបាលខេត្តស្ទឹងត្រែង និងមន្ត្រីជំនាញក្នុងខេត្តនេះ រងការចោទថា រំលោភកិច្ចសន្យាភាស៊ីផ្សារឆ្នាំ២០១៤។ ការចោទប្រកាន់នេះ ធ្វើឡើងបន្ទាប់ពីគម្រោងអភិវឌ្ឍន៍របស់អាជ្ញាធរខេត្ត កាលពីខែសីហា ឆ្នាំ២០១៤ បានប្ដូរទីតាំងផ្សារត្រីបន្លែ នៅពេលមិនទាន់ចប់កិច្ចសន្យាដែលមានកំណត់ក្នុងសៀវភៅបន្ទុក។ ចំណែកអ្នកនាំពាក្យសាលាខេត្តស្ទឹងត្រែង បដិសេធការចោទប្រកាន់នេះ ដោយលើកហេតុផលថា គ្រាន់តែរុះរើផ្សារដើម្បីអភិវឌ្ឍក្រុង និងរកទីតាំងថ្មីឲ្យលក់បន្តទៀត។
ម្ចាស់ភាស៊ីផ្សារខេត្តស្ទឹងត្រែង ដែលទទួលសិទ្ធិប្រមូលភាស៊ីផ្សារកាលពីឆ្នាំ២០១៤ បានដាក់ពាក្យប្ដឹងអភិបាលខេត្តស្ទឹងត្រែង ទៅក្រសួងមហាផ្ទៃ និងសាលាដំបូងខេត្តស្ទឹងត្រែង ទាក់ទិនការបំពានកិច្ចសន្យា។ ការដាក់ពាក្យប្ដឹងនេះ គឺនៅបន្ទាប់ពីគម្រោងអភិវឌ្ឍន៍ក្រុងរបស់អាជ្ញាធរខេត្ត បានផ្លាស់ប្ដូរទីតាំងផ្សារត្រីបន្លែលើសួនច្បារខាងលិចផ្សារថ្ម ទៅទីតាំងថ្មីមានចម្ងាយឆ្ងាយពីផ្សារបច្ចុប្បន្នជាង ២គីឡូម៉ែត្រ។ ជាងនេះទៅទៀត ម្ចាស់ភាស៊ីផ្សារអះអាងថា ការផ្លាស់ប្ដូរទីតាំងដើម្បីអភិវឌ្ឍក្រុង បង្កផលវិបាកធ្ងន់ធ្ងរដល់ដំណើរការប្រមូលថ្លៃភាស៊ីផ្សារ និងជាករណីបំពានកិច្ចសន្យាដែលមានចែងក្នុងសៀវភៅបន្ទុក ដែលកំណត់រយៈពេលជាក់លាក់។
ម្ចាស់ភាស៊ីផ្សារឆ្នាំ២០១៤ អ្នកស្រី ឯល ទីរៀម រៀបរាប់នៅថ្ងៃទី១៨ កក្កដា ថា អ្នកស្រីមិនជំទាស់នឹងគម្រោងអភិវឌ្ឍន៍របស់អាជ្ញាធរខេត្តនោះទេ តែទីតាំងនោះមិនទាន់ចប់អាណត្តិដែលមានចែងក្នុងសៀវភៅបន្ទុកឡើយ ស្រាប់តែអាជ្ញាធរខេត្តបានផ្លាស់ប្ដូរទីតាំងលក់ដូរកាលពីខែសីហា ឆ្នាំ២០១៤ បង្កការលំបាកដល់អាជីវករផ្សារត្រីបន្លែជិត ១.០០០នាក់ និងប៉ះពាល់ដល់ការប្រមូលប្រាក់សម្រាប់ថ្លៃភាស៊ី។ អ្នកស្រីបញ្ជាក់ថា ការផ្លាស់ប្ដូរទីតាំងលក់នេះ ជាឧបសគ្គចម្បងមិនអាចប្រមូលប្រាក់ភាស៊ីសម្រាប់បង់ចូលរដ្ឋចំនួនជាង ២៦លានរៀល និងការចំណាយថ្លៃសន្តិសុខ អនាម័យ ព្រមទាំងថ្លៃពន្ធ និងបង់ជូនអាជ្ញាធរក្រុងផងប្រហែល ១០លានរៀលផ្សេងទៀត។ អ្នកស្រីអំពាវនាវឲ្យរដ្ឋាភិបាល និងប្រព័ន្ធយុត្តិធម៌ ស៊ើបអង្កេតករណីនេះ ដើម្បីផ្តល់យុត្តិធម៌ដល់គ្រួសារអ្នកស្រី៖ «បែរជាអភិបាលខេត្តអភិបាលក្រុង រំលោភលើសៀវភៅបន្ទុកឆ្នាំ២០១៤ វិញ ត្រង់ហ្នឹងជាការខាតបង់របស់ខ្ញុំ ហើយអាជីវករគាត់លក់អត់បាន ធ្វើម៉េចបានលុយឲ្យយើង»។
ឆ្លើយតបការចោទប្រកាន់នេះ វិទ្យុអាស៊ីសេរី មិនអាចសុំការអធិប្បាយពីអភិបាលខេត្តស្ទឹងត្រែង លោក កុល សំអុល បានយ៉ាងណានោះទេ នៅថ្ងៃទី១៨ កក្កដា ដោយលោកនិយាយថា កំពុងជាប់រវល់ប្រជុំ។
ចំណែកអ្នកនាំពាក្យសាលាខេត្តស្ទឹងត្រែង និងជាអភិបាលរងខេត្ត លោក ដួង ពៅ លើកឡើងថា ការអភិវឌ្ឍរបស់អាជ្ញាធរនៅលើសួនច្បារ ជាទីតាំងលក់ដូរត្រីបន្លែ គ្រាន់តែជាមែកធាងផ្សារថ្មស្ទឹងត្រែងប៉ុណ្ណោះ។ លោកបញ្ជាក់ថា អាជ្ញាធរខេត្តរុះរើផ្សារដើម្បីអភិវឌ្ឍ ហើយរកកន្លែងថ្មីឲ្យអាជីវករលក់បន្ត។ បន្ថែមពីលើនេះ អាជ្ញាធរមិនបានរំលោភសេចក្តីទុកចិត្តដូចការចោទប្រកាន់នោះទេ។ ផ្ទុយទៅវិញ ម្ចាស់ភាស៊ីផ្សារទៅវិញទេដែលតែងតែមិនគោរពគោលការណ៍ណែនាំរបស់អាជ្ញាធរខេត្ត ដូចជាការធ្វើសំណង់រឹងលើសួនច្បារ និងការលក់ដូរលើផ្លូវសាធារណៈយ៉ាងអនាធិបតេយ្យ ជាដើម៖ «ឲ្យលក់តាមទំនើងចិត្តគាត់ ចឹងការចោទប្រកាន់របស់គាត់ គឺជាការរារាំងកិច្ចការសាធារណៈរបស់រដ្ឋ បើតាមច្បាប់ គាត់ត្រូវមានទោសទៀត»។
យ៉ាងនេះក្តី មន្ត្រីសង្គមស៊ីវិលដែលឃ្លាំមើលបញ្ហានេះ រកឃើញថា គម្រោងអភិវឌ្ឍន៍របស់អាជ្ញាធរ ពិតជាបានរំលោភកិច្ចសន្យាពិតមែន ដែលមានចែងជាក់លាក់ក្នុងសៀវភៅបន្ទុកដែលបានកំណត់ទីតាំងច្បាស់លាស់មុនពេលទទួលសិទ្ធិដេញថ្លៃ។
មន្ត្រីសម្របសម្រួលនៃសមាគមអាដហុក (adhoc) ខេត្តស្ទឹងត្រែង លោក ហូ សំអុល រកឃើញថា អាជ្ញាធរខេត្តប្រើកម្លាំងប្រដាប់អាវុធបណ្ដេញអាជីវករចេញក្នុងអំឡុងខែសីហា ឆ្នាំ២០១៤ ដោយម្ចាស់ភាស៊ីផ្សារមិនទាន់ចប់អាណត្តិនៅទីតាំងផ្សារត្រីសាច់បន្លែរយៈពេល ១ឆ្នាំ ក្នុងឆ្នាំ២០១៤។ លោកថា អាជ្ញាធរខេត្តត្រូវទទួលខុសត្រូវចំពោះសំណងរដ្ឋប្បវេណី បើរកឃើញថា ពិតជារំលោភលើកិច្ចសន្យាដែលមានចែងក្នុងសៀវភៅបន្ទុកពិតមែន ព្រោះក្នុងសៀវភៅបន្ទុកបានកំណត់ទីតាំងជាក់ស្តែង និងតម្លៃជាដើម មុនពេលដេញថ្លៃ៖ «អាជ្ញាធរខេត្តត្រូវទទួលខុសត្រូវចំពោះគម្រោងហ្នឹងផង យើងគាំទ្រចំពោះការអភិវឌ្ឍក្រុង ប៉ុន្តែក្នុងអាណត្តិរបស់គេ តែទៅដេញគេម៉េចកើត!»។
លោក ហូ សំអុល រិះគន់ការកំណត់តម្លៃភាស៊ីផ្សារនៅឆ្នាំ២០១៥ នេះថា មានភាពមិនប្រក្រតីធ្ងន់ធ្ងរ ដោយសារតែគម្លាតឆ្ងាយពីការកំណត់តម្លៃភាស៊ីផ្សារឆ្នាំ២០១៤ មានតម្លៃ ៣១៥លានរៀលក្នុងមួយឆ្នាំ ចំណែកការកំណត់តម្លៃប្រមូលនៅឆ្នាំ២០១៥ របស់លោកឧកញ៉ា សា លាង មានតម្លៃតែ ៦០លានរៀលក្នុងមួយឆ្នាំទៅវិញ។
ក្រមរដ្ឋប្បវេណីឆ្នាំ២០០៦ មាត្រា៤០៨ ចំណុចទី១ ចែងថា ការបំពានកិច្ចសន្យាយ៉ាងធ្ងន់ធ្ងរ សំដៅទៅលើករណីភាគីម្ខាងមិនគោរពកិច្ចសន្យាបាន ដោយសារការបំពានរបស់ភាគីម្ខាងទៀត ត្រូវចាត់ទុកថាជាការបំពានកិច្ចសន្យាយ៉ាងធ្ងន់ធ្ងរ។ ពាក្យបណ្ដឹងរបស់ម្ចាស់ភាស៊ីផ្សារទៅអភិបាលខេត្ត គឺទាមទារសំណងរយៈពេល ៤ខែ ចាប់ពីខែកញ្ញា ដល់ខែធ្នូ ឆ្នាំ២០១៤ ចំនួន ១៤០លានរៀល ព្រមទាំងជំងឺចិត្តខាតបង់ពេលវេលាចំនួន ១០ម៉ឺនដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។