សមត្ថកិច្ចខេត្តស្វាយរៀង បានចាប់ខ្លួនមនុស្សម្នាក់នៅរសៀលថ្ងៃទី១៥ ខែតុលា ពីបទឆបោកប្រាក់ប្រជាពលរដ្ឋជាង ៦០០នាក់ នៅក្នុងស្រុកចំនួនពីរ គឺស្រុករមាសហែក ខេត្តស្វាយរៀង និងស្រុកមេសាង ខេត្តព្រៃវែង។
សមត្ថកិច្ចចាប់ខ្លួននោះ ឈ្មោះ ហួត សំរិត ជាប្រធានក្រុមហ៊ុនឈ្មោះ ហួត សំរិត បញ្ជូនដល់ការិយាល័យព្រហ្មទណ្ឌកម្រិតស្រាលនៃស្នងការនគរបាលខេត្តស្វាយរៀង ហើយ។ ចំណែកឯសមត្ថកិច្ច មិនទាន់អត្ថាធិប្បាយយ៉ាងណានៅឡើយទាក់ទងនឹងករណីនេះ ដោយកំពុងស៊ើបសួរ។
ពលរដ្ឋដែលអះអាងថាជាអ្នកចាញ់បោកគេនោះ បានបំភ្លឺថា ពលរដ្ឋជាង ៦០០នាក់ នៅក្នុងស្រុកពីរ គឺបានចាញ់បោក លោក ហួត សំរិត សរុបជាប្រាក់ចំនួនជាង ៤៥ម៉ឺនដុល្លារអាមេរិក។
លោក ថុន សុខនី រស់នៅស្រុកមេសាង ខេត្តព្រៃវែង បានថ្លែងថា លោកបានដាក់ដើមទុនចំនួន ៩ពាន់ដុល្លារអាមេរិក ហើយមូលហេតុដែលពលរដ្ឋប្រមូលគ្នាយកប្រាក់ទៅឲ្យ លោក ហួត សំរិត នោះ គឺម្ចាស់ក្រុមហ៊ុនប្រាប់ពលរដ្ឋថា ទិញភាគហ៊ុនដោយសងការប្រាក់ ៥% នៃប្រាក់ដើមជារៀងរាល់ខែ។ ប៉ុន្តែសម្រាប់ពីរ ឬបីខែចុងក្រោយនេះ ក្រុមហ៊ុនមិនបានទូទាត់ដល់ពលរដ្ឋគ្រប់គ្នាទេ។
លោក ថុន សុខនី៖ «ក្រុមហ៊ុនហ្នឹងបើនិយាយទៅ គាត់និយាយចេញមកធ្វើឲ្យខ្ញុំជឿទុកចិត្តអ៊ីចឹង។ ដល់ពេលចុងក្រោយ គាត់បានប្រាប់ខ្ញុំថា ប្រសិនបើបានដាក់ ៣ពាន់ដុល្លារទៀត គាត់នឹងឧបត្ថម្ភម៉ូតូក្នុងម្នាក់ ១គ្រឿង គឺចាប់ពី ៣ពាន់ដុល្លារឡើងទៅ ហើយបានមែន! តែដល់ថ្ងៃចែកម៉ូតូ សុទ្ធតែអ្នកធំៗគេមកចែកម៉ូតូឲ្យអ៊ីចឹង។ ដល់ពេលផុតពីហ្នឹងទៅ បែរជាគេថា ក្រុមហ៊ុនគេក្ស័យធនឯណា ខាតបង់ថវិកាអ៊ីចឹងណា អត់បានបើកឲ្យប្រជាជនវិញទេ»។
បុគ្គលិករបស់ក្រុមហ៊ុនម្នាក់បានថ្លែងថា ករណីនេះ លោក ហួត សំរិត នឹងទទួលខុសត្រូវក្នុងការសងប្រាក់ដល់ពលរដ្ឋវិញ ប៉ុន្តែការសងនោះ គឺធ្វើតាមដំណាក់កាលដែលធ្វើឲ្យពលរដ្ឋមិនយល់ព្រម។
ពលរដ្ឋដែលបានដាក់ភាគហ៊ុនជាមួយក្រុមហ៊ុន ហួត សំរិត ថ្លែងថា ពលរដ្ឋកំពុងរងគ្រោះពីរដងជាន់គ្នា គឺទី១ មិនបានការប្រាក់ និងប្រាក់ដើមមកវិញ ហើយទី២ គឺមានពលរដ្ឋខ្លះលក់ដី ឬបញ្ចាំដី និងផ្ទះនៅធនាគារ ហើយធនាគារកំពុងតែរឹបអូសបណ្ដើរៗហើយ។
ទោះយ៉ាងណា ពលរដ្ឋដែលចាញ់បោកគេទាំងនោះ ដាក់ពាក្យប្ដឹងទៅសមត្ថកិច្ចក្នុងមូលដ្ឋានខ្លួនរស់នៅ គឺខេត្តព្រៃវែង និងខេត្តស្វាយរៀង ដើម្បីដោះស្រាយករណីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។