មន្ទីរសាខាពន្ធដារខេត្ត និងអាជ្ញាធរខេត្តកំពត ចាប់ផ្ដើមធ្វើបច្ចុប្បន្នភាព ស្ដីពីការចុះបញ្ជីពន្ធដារនៅទូទាំងខេត្ត ដោយបានប្រកាសដល់តំណាងក្រុមហ៊ុន សហគ្រាសទាំងអស់ ឲ្យចាប់ផ្ដើមចុះបញ្ជីពន្ធដារសារឡើងវិញ ចាប់តាំងពីថ្ងៃទី៣០ តុលា តទៅ។
ប្រធានផ្នែកចុះបញ្ជីសាខាពន្ធដារខេត្តកំពត លោក គង់ សុវ៉ាត បញ្ជាក់ថាការផ្សព្វផ្សាយនេះធ្វើឡើងតាមសេចក្ដីប្រកាសរបស់ក្រសួងសេដ្ឋកិច្ច និងហិរញ្ញវត្ថុ ចុះថ្ងៃទី៩ តុលា ឆ្នាំ ២០១៤៖ «ឥឡូវយើងឲ្យគេរៀបចំផ្សាយថ្ងៃហ្នឹងនៅតាមបណ្ដាស្រុកគ្រប់ទាំងអស់។ សហគ្រាសយើងនៅក្នុងខេត្តមានសណ្ឋាគារ ផ្ទះសំណាក់ ភោជនីយដ្ឋានអ្នករកស៊ីមួយចំនួនធំៗ»។
បើតាមសេចក្ដីប្រកាសរបស់ក្រសួងសេដ្ឋកិច្ច និងហិរញ្ញវត្ថុ ការធ្វើបច្ចុប្បន្នភាព ស្ដីពីការចុះបញ្ជីពន្ធដារនេះ មានបំណងពង្រឹង និងបង្កើនប្រសិទ្ធភាពនៃការគ្រប់គ្រងការចុះបញ្ជីពន្ធដារ និងផ្ដល់សេវា ជូនអ្នកជាប់ពន្ធឲ្យកាន់តែប្រសើរ។
ខេត្តកំពតគឺជាខេត្តទេសចរណ៍ជាប់មាត់សមុទ្រមួយ ដែលសម្បូរទៅដោយសណ្ឋាគារ ផ្ទះសំណាក់ ភោជនីយដ្ឋាន រកស៊ីដោយខ្មែរនិងបរទេស។
ក៏ប៉ុន្តែប្រធានសាខាពន្ធដារខេត្តកំពត លោក អ៊ូច គឹមស៊ាន បដិសេធមិនផ្ដល់ព័ត៌មានអំពីចំនួន ក្រុមហ៊ុន សហគ្រាស និងចំនួនទឹកប្រាក់ប្រមូលពន្ធប្រចាំឆ្នាំ កន្លងមកនោះទេ ដោយលោកឆ្លើយថា ការផ្ដល់ព័ត៌មានអំពីតួលេខប្រាក់ចំណូលពន្ធ និងចំនួនក្រុមហ៊ុន ធ្វើអាជីវកម្មនានានៅក្នុងខេត្ត ជាការខុសច្បាប់ពន្ធដារ ព្រោះអ្នកយកព័ត៌មាន មិនមានលិខិតឧទ្ទេសនាម អនុញ្ញាតយកព័ត៌មានអំពីរឿងនេះពីថ្នាក់លើ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។