ក្រុមអ្នករត់ឡានឈ្នួលពីភ្នំពេញ ទៅខេត្តព្រៃវែង យកឡានជាច្រើនគ្រឿងដាក់បិទផ្លូវនៅចំណតបេនឡានផ្សារអូឡាំពិក ដើម្បីទាមទារឲ្យម្ចាស់ចំណតអនុញ្ញាតឲ្យពួកគាត់បានចាប់ម៉ូយដាក់ឡានដូចធម្មតា។ ក្រោយការតវ៉ាមួយសន្ទុះ ក៏មានការសម្របសម្រួលត្រូវរ៉ូវគ្នា ហើយពួកគេបើកឡានចេញពីផ្លូវនោះវិញ ដើម្បីសម្រួលដល់ចរាចរណ៍។
ការយកឡានប្រមាណជាង ១០គ្រឿងតវ៉ាបិទផ្លូវនៅចំណតរថយន្តផ្សារអូឡាំពិក នៅព្រឹកថ្ងៃទី១១ ខែមេសា បន្ទាប់ពីម្ចាស់ឡានឈ្នួលតូចធំទាំងនោះ មើលឃើញថា ម្ចាស់រថយន្តឈ្នួលឈ្មោះ អ៊ី ហ៊ួត ទេសចរណ៍ បានឃុបឃិតគ្នាជាមួយម្ចាស់ចំណតរថយន្ត កាងមិនឲ្យពួកគាត់ចាប់ម៉ូយឡើយ។
ពួកគាត់ថា មិនយុត្តិធម៌ឡើយ ព្រោះរថយន្ត អ៊ី ហ៊ួត ប្រមាណជាង ១០គ្រឿង បានចាប់ម៉ូយដែលធ្វើដំណើរពីភ្នំពេញ ទៅខេត្តព្រៃវែង ផ្ដាច់មុខ មិនអោយពួកគាត់ចូលចំណតចាប់ម៉ូយឡើយ ជាពិសេសក្នុងឱកាសបុណ្យចូលឆ្នាំខ្មែរនេះ៖ «អោយតែមកដល់បេន គឺគេដេញចេញហើយ គេថា អត់មានសៀវភៅបេន ហើយសុំធ្វើសៀវភៅបេនគេថាចង្អៀត។ ត្រង់ឡានគេទិញថ្មី៤ទៀតគឺអត់អីទេ។ សំណូមពរថា អត់អោយរថយន្ត អ៊ី ហ៊ួត ទិញបេនផ្ដាច់តែឯងទេ គឺមានសិទ្ធិស្មើគ្នាអ្នកមានមកដល់មុនចេញជើងទី១»។
ការយកឡានតវ៉ាបិទផ្លូវនោះ បណ្ដាលឲ្យកកស្ទះចរាចរណ៍ និងមានការប៉ះពាក្យសម្ដីគ្នាខ្លះរវាងក្រុមម្ចាស់ឡានដែលតវ៉ា និងប៉ូលិសដែលព្រមានចាប់ពួកគាត់ដាក់គុក បើនៅតែមិនយកឡានចេញពីផ្លូវ។ ទោះយ៉ាងណា ពុំមានហិង្សាកើតឡើងនោះទេ ហើយអាជ្ញាធរ និងក្រុមអ្នកតវ៉ា រួមទាំងម្ចាស់ចំណតបេនឡានផ្សារអូឡាំពិក បានសម្របសម្រួលត្រូវគ្នាវិញ។
អ្នកសម្របសម្រួលចំណតរថយន្តផ្សារអូឡាំពិក លោក ហេង សង្ហា មានប្រសាសន៍ថា ថ្វីត្បិតតែរថយន្ត អ៊ី ហ៊ួត ទេសចរណ៍មានច្រើនគ្រឿងក្តី ប៉ុន្តែពួកគាត់មិនបានចាប់ម៉ូយផ្ដាច់មុខនោះទេ។ លោកថា រឿងនេះគ្រាន់តែជាការយល់ច្រឡំគ្នាប៉ុណ្ណោះ ហើយលោកក៏យល់ព្រមតាមសំណើរបស់ចាស់ឡានឈ្នួលដែលតវ៉ាទាំងនោះ៖ «ឥឡូវនេះយើងសម្របសម្រួលជាមួយគាត់ហើយ គឺអោយគាត់ដាក់វេនជើងគ្នា គឺមាន័យថា អ្នកណាមកមុនបានចាប់មុន ហើយចេញមុន អ្នកណាមកក្រោយបន្ទាប់គឺចាប់បន្ទាប់តាមលេខរៀង»។
ក្រុមម្ចាស់ឡានឈ្នួលដែលតវ៉ានោះ ក៏អះអាងថា ប្រសិនបើម្ចាស់រថយន្ត អ៊ី ហ៊ួត និងម្ចាស់ចំណតរថយន្ត មិនគោរពតាមកិច្ចព្រមព្រៀងជាពាក្យសម្ដីជាមួយពួកគាត់ទេនោះ ពួកគាត់នឹងប្រមូលផ្ដុំគ្នាយកឡានបិទផ្លូវម្ដងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។