មន្ត្រីសង្គមស៊ីវិលធ្វើការងារពាក់ព័ន្ធព្រៃឈើ លើកឡើងថា ឈើដែលសមត្ថកិច្ចខេត្តត្បូងឃ្មុំ ចាប់បានកាលពីពេលថ្មីៗនេះចំនួនពីររថយន្តធំៗ ដែលបម្រុងនឹងដឹកចេញទៅវៀតណាម នោះ គឺមិនមានសង្ឃឹមថា សមត្ថកិច្ចនឹងរកឃើញមនុស្សពាក់ព័ន្ធបានឡើយ។ ការលើកឡើងនេះ ដោយពួកគេយល់ថា ឈើទាំងនោះគឺមានពាក់ព័ន្ធមន្ត្រីឧកញ៉ានៅស្រុកខ្មែរ ដែលនឹងអាចមានកិច្ចអន្តរាគមន៍ណាមួយដើម្បីបញ្ចប់រឿងក្ដីនេះ។
មន្ត្រីសង្គមស៊ីវិលស្នើឱ្យស្ថាប័នពាក់ព័ន្ធត្រូវស៊ើបអង្កេតករណីចាប់បានរថយន្តដឹកឈើធំៗ ពីរគ្រឿងដែលគេសង្ស័យថា ជាប់ទំនាក់ទំនងជាមួយក្រុមហ៊ុនរ៉ូយ៉ាល់ គ្រុប របស់លោកឧកញ៉ា គិត ម៉េង បម្រុងនឹងដឹកចេញទៅប្រទេសវៀតណាម ឱ្យមានតម្លាភាព និងរកឱ្យឃើញថា តើនរណាខ្លះជាមេខ្លោងពិតប្រាកដ។
បន្ថែមពីនេះ ប្រសិនបើរថយន្តដឹកឈើទាំងនោះជាប់ពាក់ព័ន្ធក្រុមហ៊ុនរបស់លោកឧកញ៉ា អាជ្ញាធរត្រូវចាត់វិធានការតាមច្បាប់ដើម្បីធ្វើឱ្យមតិសាធារណៈមានជំនឿលើប្រពន្ធច្បាប់នៅកម្ពុជា និងមានជំនឿលើរាជរដ្ឋាភិបាលបន្តទៀត។
លេខាធិការដ្ឋានបណ្ដាញការពារព្រៃឡង់ ដែលបានតាមដានករណីនេះ លោក សេង សុខហេង មានប្រសាសន៍ថា ការចាប់រថយន្តដឹកឈើចំនួនពីរគ្រឿង ដែលគេសង្ស័យថា ជាប់ទាក់ទិនក្រុមហ៊ុនលោកឧកញ៉ា គិត ម៉េង អាចនឹងមានការសម្របសម្រួលដើម្បីដោះលែង ឬអន្តរាគមន៍ណាមួយជាក់ជាមិនខាន៖ «ប្រាកដជាមានការអន្តរាគមន៍ពីខាងលើដើម្បីឱ្យមានការដោះលែង។ ព្រោះកន្លងមកយើងឃើញហើយថា នៅពេលមានការចាប់ឈើអីបាន ពិសេសឡាននោះជារបស់អ្នកមានអំណាចរបស់ឧកញ៉ាអី តែងមានការអន្តរាគមន៍ដើម្បីឱ្យដោះលែង»។
កាលពីថ្ងៃទី៣១ ខែមីនា រថយន្តផ្ទុកឈើប្រភេទលេខ១ ចំនួន ២គ្រឿង ត្រូវបានសមត្ថកិច្ចខេត្តត្បូងឃ្មុំ បង្ក្រាបដោយសង្ស័យថា បម្រុងដឹកចេញទៅប្រទេសវៀតណាម។
ទោះជាយ៉ាងនេះក្ដី នៅក្នុងលិខិតអនុញ្ញាតដឹកជញ្ជូនឈើចំនួនជាង ៣០ម៉ែត្រគូបដែលចេញដោយមន្ទីរកសិកម្ម និងរដ្ឋបាលព្រៃឈើខេត្តស្ទឹងត្រែង របស់ក្រុមហ៊ុន អាំង អែន អាសូស៊ីអែត ឡយ័រ (Ang & Associate Lawyer Co., Ltd) បញ្ជាក់ថា ឈើមួយរថយន្តត្រូវដឹកទៅស្រុកកោះសូទិន ខេត្តកំពង់ចាម និងរថយន្តមួយទៀតត្រូវដឹកទៅស្រុកពញាក្រែក ខេត្តត្បូងឃ្មុំ មិនបានបញ្ជាក់ថា ដឹកទៅប្រទេសវៀតណាមទេ។
ព្រឹត្តិបត្រ ឌឹ ខេមបូឌា ដេលី (The Cambodia Daily) ដែលចុះផ្សាយកាលពីថ្ងៃទី៣ ខែមេសា ឱ្យដឹងតាមរយៈមន្ត្រីនាំពាក្យកងរាជអាវុធហត្ថលើផ្ទៃប្រទេសថា ក្រុមហ៊ុនមួយនេះជាបុត្រសម្ព័ន្ធរបស់ក្រុមហ៊ុន រ៉ូយ៉ាល់ គ្រុប របស់លោកឧកញ៉ា គិត ម៉េង។
ទាក់ទងបញ្ហានេះ អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មានប្រសាសន៍ថា រថយន្តដឹកឈើទាំងពីរគ្រឿងនោះ គឺត្រូវបានមន្ត្រីគយចល័ត និងកម្លាំងអាជ្ញាធរខេត្តឃាត់ដោយរកឃើញថា មិនមានឯកសារដឹកជញ្ជូនត្រឹមត្រូវ ដើម្បីយកមករក្សាទុកនៅទីស្នាក់ការគយខេត្តត្បូងឃ្មុំ រង់ចាំការស្រាវជ្រាវបន្តទៀត។ លោកមិនបានដឹងថា ឈើនោះមានប្រភពមកពីណា និងមានចំនួនប៉ុន្មានប្រាកដទេ៖ «ខ្ញុំមិនដឹងមានប្រភពមកពីណាទេ ខាងសារព័ត៌មានហើយក៏សូមបញ្ជាក់ដែរថា កាលពីថ្ងៃមុនហ្នឹង សារព័ត៌មានរបស់ ឌឹ ខេមបូឌា ដេលី ដែរ គាត់ដាក់ថា ខ្ញុំនិយាយតាមពិតខ្ញុំអត់បាននិយាយទេ»។
ប្រជាសហគមន៍រស់នៅក្បែរព្រំដែនកម្ពុជា-វៀតណាម នៅស្រុកមេមត់ អះអាងកាលពីពេលថ្មីៗនេះថា សកម្មភាពរថយន្តដឹកជញ្ជូនឈើចេញទៅប្រទេសវៀតណាម គឺកើតមានស្ទើរជារៀងរាល់ថ្ងៃ។
យ៉ាងនេះក្ដី អ្នកនាំពាក្យកងរាជអាវុធហត្ថដដែលបញ្ជាក់ថា សមត្ថកិច្ចកំពុងស៊ើបអង្កេតបញ្ហានេះ ហើយអាជ្ញាធរពាក់ព័ន្ធតែងចាត់វិធានការបង្ក្រាបសកម្មភាពបទល្មើសជាប្រចាំ ប៉ុន្តែករណីខ្លះពលរដ្ឋមិនប្រាកដឡើយ ដោយគ្រាន់តែឃើញរថយន្តឆ្លងកាត់ ហើយវាយតម្លៃថា ជារថយន្តដឹកឈើតែម្ដង។
សមាជិកក្រុមប្រឹក្សាខេត្តត្បូងឃ្មុំ មួយរូបមកពីគណបក្សសង្គ្រោះជាតិ លោក ស៊ូ យាន ឱ្យដឹងថា ករណីរត់ពន្ធឈើចេញទៅប្រទេសវៀតណាម នៅតែកើតមានដោយលួចលាក់ដដែល។ លោកបន្តថា នៅពេលមានកិច្ចប្រជុំក្រុមប្រឹក្សាខេត្តម្ដងៗ ពួកគាត់តែងលើកឡើងអំពីបញ្ហាទាំងនេះ ប៉ុន្តែអាជ្ញាធរខេត្តមិនបានយកចិត្តទុកដាក់ និងហាក់មិនមានឆន្ទៈទប់ស្កាត់ ឬបង្ក្រាបបទល្មើសទាំងនោះទេ៖ «យើងមានការសោកស្ដាយដែរ ដោយសារតែនៅពេលប្រជុំគណៈអភិបាលដែលចូលរួមហ្នឹងហាក់ដូចជាមិនយកប្រសាសន៍របស់សម្ដេចនាយករដ្ឋមន្ត្រីដែលចេញឱ្យយន្តហោះអីណាទប់ស្កាត់បទល្មើសព្រៃឈើ ប៉ុន្តែបើយើងពិនិត្យសកម្មភាពអាជ្ញាធរមូលដ្ឋានហាក់មិនបានធ្វើតាមបទបញ្ជារបស់លោកនាយករដ្ឋមន្ត្រីទេ»។
លេខាធិការដ្ឋានបណ្ដាញការពារព្រៃឡង់ លោក សេង សុខហេង អះអាងថា ឈើដែលកំពុងនាំចេញទៅប្រទេសវៀតណាម បច្ចុប្បន្នភាគច្រើនជាឈើកាប់ និងដឹកជញ្ជូនពីតំបន់ព្រៃការពារ រួមមាននៅខេត្តរតនគិរី ខេត្តមណ្ឌលគិរី ក្រចេះ ស្ទឹងត្រែង ហើយមួយផ្នែកត្រូវដឹកចេញពីតំបន់ព្រៃឡង់ ដោយលោកអះអាងថា តំបន់ដីសម្បទានសេដ្ឋកិច្ចរបស់ក្រុមហ៊ុនគឺមិនមានឈើសម្រាប់ធ្វើអាជីវកម្មទៀតឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។