គ្រូបង្រៀន និងបុគ្គលិកមន្ត្រីរាជការបម្រើការនៅតាមស្ថាប័នរដ្ឋនានា ស្នើដល់ប្រមុខដឹកនាំរដ្ឋាភិបាលកម្ពុជា ផ្តល់ប្រាក់ឧបត្ថម្ភសម្រាប់បុណ្យជាតិជូនមន្ត្រីរាជការ ដើម្បីមានថវិកាចូលរួមពិធីបុណ្យភ្ជុំបិណ្ឌ និងជួបជុំក្រុមគ្រួសារនៅស្រុកកំណើត។ សំណើនេះ ធ្វើឡើងនៅគ្រាពិធីបុណ្យភ្ជុំបិណ្ឌប្រពៃណីជាតិឆ្នាំនេះបានចូលមកដល់។
សមាគមគ្រូបង្រៀនកម្ពុជាឯករាជ្យ បានផ្ញើលិខិតជូនលោកនាយករដ្ឋមន្ត្រី ហ៊ុន សែន ស្នើសុំប្រាក់ឧបត្ថម្ភសម្រាប់បុណ្យភ្ជុំបិណ្ឌ ឬបុណ្យជាតិចំនួន ១៥ម៉ឺនរៀល ជូនគ្រូបង្រៀន និងមន្ត្រីរាជការ ដើម្បីឲ្យពួកគាត់មានថវិកាចំណាយក្នុងពិធីបុណ្យភ្ជុំបិណ្ឌ និងជួបជុំគ្រួសារមានភាពកក់ក្តៅ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ ឲ្យដឹងថា កាលពីថ្ងៃទី៩ ខែកញ្ញា បានលិខិតជូនលោកនាយករដ្ឋមន្ត្រី ហ៊ុន សែន ឲ្យពិនិត្យ និងពិចារណាទៅលើសំណើសុំប្រាក់ឧបត្ថម្ភនេះ។ លោកបន្តថា សព្វថ្ងៃនេះ ទោះបីរាជរដ្ឋាភិបាលបានដំឡើងប្រាក់ខែជូនគ្រូបង្រៀន និងមន្ត្រីរាជការបន្តបន្ទាប់ក្តី ក៏ប្រាក់បៀវត្សទាំងនេះនៅមានកម្រិតទាប និងមានគម្លាតឆ្ងាយពីតម្លៃទំនិញលើទីផ្សារ ធ្វើឲ្យជីវភាពមន្ត្រីរាជការជួបការលំបាក។
ផ្ដើមពីបញ្ហានេះ លោក រ៉ុង ឈុន បានស្នើដល់ប្រមុខដឹកនាំ ឲ្យពិចារណាផ្តល់ប្រាក់ឧបត្ថម្ភជូនមន្ត្រីរាជការ គ្រូបង្រៀន ដើម្បីឲ្យពួកគាត់ប្រារព្ធពិធីបុណ្យជាតិ។ លោកបន្តថា ជារៀងរាល់ឆ្នាំ មន្ត្រីបម្រើការងារនៅក្នុងស្ថាប័នរដ្ឋសភា និងព្រឹទ្ធសភា បានទទួលប្រាក់ឧបត្ថម្ភសម្រាប់បុណ្យជាតិជាធម្មតានៅឡើយ។ ដូច្នេះ ប្រមុខដឹកនាំគួរពិចារណាផ្តល់ប្រាក់ឧបត្ថម្ភចំនួន ១៥ម៉ឺនរៀលជូនមន្ត្រីរាជការម្នាក់ៗ ដូចគ្នាមន្ត្រីក្នុងស្ថាប័នរដ្ឋសភា និងព្រឹទ្ធសភាដែរ៖ «យើងកត់សម្គាល់ឃើញថា កន្លងមកហ្នឹង រដ្ឋាភិបាលធ្លាប់បានផ្តល់ថវិកាសម្រាប់បុណ្យជាតិជូនមន្ត្រីរាជការ។ ប៉ុន្តែក្នុងរយៈពេល ១០ឆ្នាំមកនេះ ប្រាក់ឧបត្ថម្ភហ្នឹងបានបាត់ តែមិនដឹងថា តើរដ្ឋាភិបាលមានគោលការណ៍បែបណាជុំវិញការលុបបំបាត់នូវប្រាក់បុណ្យសម្រាប់ជាតិធំៗហ្នឹង។ បើយើងធ្វើការកត់សម្គាល់មានស្ថាប័នពីរដែលរដ្ឋាភិបាលនៅផ្តល់ឲ្យមកដល់សព្វថ្ងៃនេះ គឺមានមន្ត្រីនៅក្នុងស្ថាប័នរដ្ឋសភា និងស្ថាប័នព្រឹទ្ធសភា គឺទទួលបានថវិកាឧបត្ថម្ភនៅក្នុងបុណ្យជាតិនីមួយៗហ្នឹងចំនួន ៣០ម៉ឺនរៀលក្នុងម្នាក់ៗ»។
លោក អែក ហ៊ល ជាគ្រូបង្រៀននៅអនុវិទ្យាល័យមួយក្នុងស្រុកជើងព្រៃ ខេត្តកំពង់ចាម ស្ថិតក្នុងចំណោមគ្រូបង្រៀនច្រើនទៀតនៅទូទាំងប្រទេសកម្ពុជា ក៏បានសំណូមពរដល់លោកនាយករដ្ឋមន្ត្រី ហ៊ុន សែន ផ្តល់ប្រាក់ឧបត្ថម្ភជូនបុគ្គលិកមន្ត្រីរាជការសម្រាប់ពិធីបុណ្យជាតិនេះដែរ៖ «បុណ្យប្រពៃណីជាតិ បើសិនជាប្រមុខរាជរដ្ឋាភិបាលលោកយល់ព្រមផ្តល់ជាថវិកាក្នុងចំនួនសមស្របមួយ ធ្វើបុណ្យទានវាជាការប្រសើរ ជាការលើកទឹកចិត្តលើកកម្ពស់មួយដល់គ្រូបង្រៀន ក៏ដូចជាមន្ត្រីរាជការដទៃទៀត»។
ទាក់ទិនបញ្ហានេះ លោក ភួង សុវណ្ណ អគ្គលេខាធិការសមាគមមន្ត្រីរាជការឯករាជ្យកម្ពុជា ក៏គាំទ្រចង់ឲ្យរដ្ឋាភិបាល ពិនិត្យលើលទ្ធភាពផ្តល់ប្រាក់ឧបត្ថម្ភជូនបុគ្គលិកមន្ត្រីរាជការនៅក្នុងពិធីបុណ្យជាតិ ចូលមកដល់នេះដែរ។ លោកស្នើដល់ប្រមុខដឹកនាំ គួរលើកយកសំណើនេះទៅពិនិត្យពិចារណា និងឆ្លើយតបចំពោះបញ្ហានេះ៖ «បញ្ហាសំណើសុំឲ្យមានប្រាក់ឧបត្ថម្ភជូនគ្រូបង្រៀន ក៏ដូចជាមន្ត្រីរាជការទូទៅនៅក្នុងព្រះរាជាណាចក្រកម្ពុជា ហ្នឹងកន្លងទៅ យើងមានគោលការណ៍ដែរពីរឿងផ្តល់ប្រាក់ឧបត្ថម្ភដល់មន្ត្រីរាជការ ក្នុងពេលបុណ្យជាតិធំៗហ្នឹង។ សូមអំពាវនាវដល់រាជរដ្ឋាភិបាល មេត្តាយល់ព្រមជាមួយនឹងសំណើរបស់សមាគមគ្រូបង្រៀនហ្នឹងទៅ ដើម្បីឲ្យមន្ត្រីរាជការដែលមានប្រាក់បៀវត្សតិចតួច អាចទៅលេងស្រុកកំណើតបានដូចជារូបខ្ញុំជាដើម»។
សមាគមគ្រូបង្រៀនឲ្យដឹងថា មិនទាន់មានការឆ្លើយតបបែបណាពីមន្ត្រីរដ្ឋាភិបាល លើការស្នើសុំផ្តល់ប្រាក់ឧបត្ថម្ភជូនមន្ត្រីរាជការសម្រាប់បុណ្យជាតិនេះទេ។
កន្លងមក រាជរដ្ឋាភិបាលកម្ពុជា បានខកខានមិនបានផ្តល់ជូនគ្រូបង្រៀន និងមន្ត្រីរាជការអស់រយៈពេលជាង ១០ឆ្នាំមកហើយ។ ប៉ុន្តែបានបន្តផ្តល់ជូនប្រាក់ឧបត្ថម្ភសម្រាប់បុណ្យជាតិនេះ ជូនមន្ត្រីរាជការបម្រើការនៅក្នុងស្ថាប័នរដ្ឋសភា និងព្រឹទ្ធសភា រហូតមកដល់សព្វថ្ងៃនេះ។
ទោះយ៉ាងណា បុគ្គលិកមន្ត្រីរាជការរំពឹងថា លោកនាយករដ្ឋមន្ត្រី ហ៊ុន សែន នឹងពិចារណាទៅលើសំណើសុំផ្តល់ប្រាក់ឧបត្ថម្ភសម្រាប់បុណ្យជាតិ ជូនមន្ត្រីរាជការជាថ្មីឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។