ក្រុមគ្រូបង្រៀនបឋមសិក្សាប្រមាណ ២៧២នាក់នៅខេត្តបាត់ដំបង ត្អូញត្អែរថាមិនបានបើកប្រាក់ខែបង្រៀនពីរពេល និងបង្រៀនផ្គួបថ្នាក់ជាងមួយឆ្នាំមកហើយ ដោយពុំដឹងមូលហេតុអ្វីនោះទេ។ ពួកគាត់កំពុងទន្ទឹងរង់ចាំប្រាក់ខែទាំងនោះ ដើម្បីយកទៅដោះស្រាយជីវភាពប្រចាំថ្ងៃ។
ក្រុមគ្រូបង្រៀនដែលពុំទាន់បើកប្រាក់ខែនោះ អំពាវនាវឲ្យប្រធានមន្ទីរអប់រំ យុវជន និងកីឡា ខេត្តបាត់ដំបង និងមន្ត្រីពាក់ព័ន្ធ ជួយពន្លឿនបើកប្រាក់ខែបង្រៀនឲ្យបានឆាប់ ពីព្រោះសព្វថ្ងៃជីវភាពគ្រួសារកំពុងជួបការខ្វះខាត។
តំណាងគ្រូបង្រៀនបឋមសិក្សាម្នាក់នៅស្រុកថ្មគោល ថ្លែងសុំមិនឲ្យបញ្ចេញឈ្មោះនៅថ្ងៃទី២៦ វិច្ឆិកា ថា ប្រាក់ខែបង្រៀនបន្ថែមពីរពេល គឺពេលព្រឹក និងពេលរសៀលកាលពីបង្រៀនមុនឆ្នាំ២០១៣ ពុំមានជាបញ្ហាចោទនោះទេ ប៉ុន្តែចាប់តាំងពីខែតុលា ឆ្នាំ២០១៣ មក គឺទៅបើកប្រាក់ខែបង្រៀនមិនបាននោះទេ។ លោកបន្តថា ក្រុមគ្រូបង្រៀននៅតាមបណ្ដាស្រុកនានាទូទាំងខេត្តបាត់ដំបង ជាច្រើននាក់ ចេះតែទន្ទឹងរង់ចាំប្រាក់ខែបង្រៀនរបស់ខ្លួនយកទៅដោះស្រាយជីវភាពគ្រួសារ ហើយបានទៅសាកសួរនៅការិយាល័យអប់រំស្រុករៀងៗខ្លួនដែរ ប៉ុន្តែពុំទទួលបានលទ្ធផលនោះទេ៖ «យើងខំប្រឹងធ្វើការងារជូនសង្គមជាតិ តែរដ្ឋមិនផ្ដល់ថវិកាឲ្យយ៉ាងនេះ ធ្វើឲ្យយើងជាគ្រូបង្រៀនគ្មានកម្លាំងចិត្តទៅបង្រៀនសិស្សនោះទេ»។
ឆ្លើយតបនឹងបញ្ហានេះ ប្រធានមន្ទីរអប់រំ យុវជន និងកីឡា ស្រុកថ្មគោល លោក អួន ប៊ុនជៀន ទទួលស្គាល់ថា ពិតជាមានគ្រូបង្រៀនមួយចំនួនពុំបានបើកប្រាក់បង្រៀនពីរពេលប្រាកដមែន ហើយថាបាននាំរឿងនេះទៅជម្រាបមន្ទីរអប់រំខេត្តបាត់ដំបង ដើម្បីដោះស្រាយដល់គ្រូបង្រៀនទាំងនោះរួចទៅហើយ៖ «នៅក្នុងករណីនេះ ខ្ញុំមិនដឹងថាជាមូលហេតុអ្វី បានជាក្រសួងអប់រំ មិនព្រមទម្លាក់ប្រាក់មកបើកគ្រូបង្រៀននោះទេ»។
ទោះយ៉ាងនេះក្ដី អនុប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី កត់សម្គាល់ថា ការយឺតយ៉ាវមិនបើកប្រាក់ខែបង្រៀនពីរពេលដល់ក្រុមគ្រូបង្រៀននេះ ជាករណីដដែលៗ ហើយក្រសួងអប់រំ គួរគិតគូរបើកប្រាក់ខែដល់ពួកគាត់ឲ្យបានឆាប់ ព្រោះធ្វើឲ្យប៉ះពាល់ដល់ជីវភាពរស់នៅរបស់គ្រូបង្រៀន ដែលពួកគាត់មានប្រាក់បៀវត្សរ៍តិចតួចមិនគ្រប់គ្រាន់ចាយវាយប្រចាំថ្ងៃនោះទេ៖ «ខ្ញុំថាមូលហេតុចម្បងដែលបើកប្រាក់ខែបន្ថែមម៉ោងរបស់គ្រូបង្រៀនយឺតយ៉ាវនេះ ដោយសារក្រសួងអប់រំ ចាយវាយថវិកាផ្ដេសផ្ដាស និងអាចមានអំពើពុករលួយ»។
ប្រាក់ខែបង្រៀនពីរពេល ជាប្រាក់បង្រៀនបន្ថែមពីលើភារកិច្ចបង្រៀនប្រចាំថ្ងៃរបស់គ្រូបង្រៀន ក្នុងនោះមានការបង្រៀនផ្គួបថ្នាក់ និងការបង្រៀនពីរពេលជាដើម ដែលប្រាក់ខែទាំងនោះទទួលបានប្រហាក់ប្រហែលប្រាក់ខែរបស់គ្រូបង្រៀនដែរ។ គ្រូបង្រៀននៅខេត្តបាត់ដំបង ដែលពុំទាន់បើកប្រាក់បង្រៀនបន្ថែមនេះ ប្រមាណ ២៧២នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។