ក្រុមគ្រូបង្រៀននៅខេត្តកំពង់ចាម មិនបានទទួលប្រាក់ម៉ោងជិត ២ត្រីមាសមកហើយ ដោយពុំដឹងបណ្ដាលមកពីមូលហេតុអ្វីច្បាស់លាស់។ ក្រុមគ្រូបង្រៀនបញ្ជាក់ថា បញ្ហាយឺតយ៉ាវក្នុងការបើកប្រាក់ម៉ោងនេះ កើតឡើងជាច្រើនលើកច្រើនសាមកហើយ នៅតែមិនឃើញមានដំណោះស្រាយ។ យ៉ាងណា ប្រធានមន្ទីរអប់រំអះអាងថា វាជាកំហុសរបស់សាលាខ្លះទៅវិញទេ ដែលបញ្ជូនឯកសារមកមិនទាន់ពេលវេលា។
គ្រូបង្រៀននៅខេត្តកំពង់ចាម សម្ដែងការមិនពេញចិត្តចំពោះរបៀបធ្វើការងាររបស់មន្ទីរអប់រំខេត្ត ដែលចេះតែបណ្ដោយឲ្យបញ្ហាប្រាក់ម៉ោងរបស់ពួកគាត់ចោទឡើងដដែលៗ។ គ្រូបង្រៀនទាំងនោះ ឲ្យដឹងថា បើទោះបីជាប្រាក់ម៉ោងនោះវាតិចតួចសម្រាប់ពួកគាត់ក៏ដោយ ប៉ុន្តែប្រសិនបើបើកបានទាន់ពេលវេលា ក៏ជាការលើកទឹកចិត្តដល់ការបង្រៀនរបស់ពួកគាត់ និងម្យ៉ាងក៏អាចសម្រួលការពិបាកក្នុងជីវភាពរស់នៅប្រចាំថ្ងៃដែរ។
គ្រូបង្រៀននៅវិទ្យាល័យមួយក្នុងស្រុកបាធាយ សុំមិនឲ្យបញ្ចេញឈ្មោះឲ្យដឹងថា ចាប់ពីពេលចូលកងឆ្នាំសិក្សា២០១៤-២០១៥ មក គឺគ្រូបង្រៀនទាំងអស់នៅមិនទាន់បានប្រាក់ម៉ោងទេ។ បើទោះបីជាលោកមិនបានដឹងពីមូលហេតុនៃការយឺតយ៉ាវនេះច្បាស់លាស់ក៏ដោយ ប៉ុន្តែបញ្ហានេះកើតឡើងដដែលៗ ទើបលោកយល់ថា អាចជាកំហុសខាងមន្ទីរអប់រំច្រើនជាង៖ «សំខាន់គោលការណ៍ខាងយើង គឺសុំឲ្យខាងមន្ទីរ ឬក្រសួងហ្នឹងសុំមេត្តាបើកប្រាក់ហ្នឹងឲ្យទាន់ពេលវេលាមក»។
ស្រដៀងគ្នានេះ គ្រូបង្រៀនម្នាក់ទៀតនៅវិទ្យាល័យ សម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន មានជ័យ នៅស្រុកជើងព្រៃ លោក នុត សឿន ក៏បានត្អូញត្អែរចំពោះបញ្ហាប្រាក់ម៉ោងដែរ។ លោកចង់ឲ្យខាងក្រសួង ឬមន្ទីរអប់រំពន្លឿនការដោះស្រាយជុំវិញបញ្ហានេះ ពីព្រោះគ្រូបង្រៀនជាច្រើនខិតខំយកពេលដើម្បីទៅបង្រៀនសិស្សសម្រាប់ម៉ោងលើស ដើម្បីបានប្រាក់ខ្លះគ្រាន់ឧបត្ថម្ភជីវភាពគ្រួសារ។
ប្រាក់ម៉ោងសម្រាប់គ្រូកម្រិតឧត្តមសិក្សា គឺបានមួយម៉ោង ៥.២០០រៀល និងកម្រិតមធ្យមសិក្សាបានមួយម៉ោង ២.៦០០រៀល។
ក្រៅពីបញ្ហាប្រាក់ម៉ោងយឺតយ៉ាវហើយ ក៏មានបញ្ហាប្រាក់តំបន់សម្រាប់ឧបត្ថម្ភសាលាដាច់ស្រយាលចំពោះគ្រូនៅខេត្តកំពង់ចាម ក្នុងមួយខែ ៤ម៉ឺនរៀល ហើយបីខែបើកឲ្យម្តងនោះ ក៏មិនឃើញបើកជូនពួកគាត់ដែរមកទល់ពេលនេះ។
គ្រូបង្រៀននៅអនុវិទ្យាល័យ ព្រីងជ្រុំ ស្រុកជើងព្រៃ លោក អោម ងួន មានប្រសាសន៍ថា ប្រាក់ឧបត្ថម្ភសម្រាប់គ្រូនៅសាលាដាច់ស្រយាល គឺមានខែខ្លះកាលពីឆ្នាំមុនៗ គឺមិនឃើញបើកជូនគាត់ឡើយ ហើយសម្រាប់ឆ្នាំសិក្សាថ្មីនេះ គឺមិនឃើញថែមទៀត៖ «ខ្ញុំយល់ថាមានមន្ត្រីខ្លះមានភាពមិនស្មោះត្រង់ មិនគោរពតាមវិជ្ជាជីវៈរបស់ក្រុមការងារក្រសួង»។
ឆ្លើយតបបញ្ហានេះ ប្រធានមន្ទីរអប់រំ យុវជន និងកីឡា ខេត្តកំពង់ចាម លោក ស្វាយ ផល្លា មានប្រសាសន៍ថា មូលហេតុប្រាក់ម៉ោងមិនទាន់បើកជូនគ្រូបង្រៀនទាំងនោះជិតពីរត្រីមាសមកនេះ គឺដោយសារកំហុសនៅតាមសាលាខ្លះ បញ្ជូនឯកសារមកខាងមន្ទីរមានភាពយឺតយ៉ាវ។ តែយ៉ាងណា លោកថា ប្រាក់ម៉ោងសម្រាប់ត្រីមាសទីមួយ នឹងអាចបានក្នុងពេលឆាប់ៗ ហើយខាងលោកក៏បានជំរុញឲ្យគ្រូនៅតាមសាលាទាំងអស់ បំពេញឯកសារឲ្យបានលឿនសម្រាប់ត្រីមាសបន្តបន្ទាប់ ជៀសវាងមានបញ្ហាទៀត៖ «អ៊ីចឹងមកដល់ខ្ញុំហ្នឹង បើយឺតតែមួយ ក៏យើងធ្វើអត់ចេញដែរ។ ឥឡូវហ្នឹងលុយវាមកដល់ខាងខ្ញុំហើយ។ ខ្ញុំបានបញ្ជូនទៅខាងមុខងារអាខែ១១ ខែ១២»។
បន្ថែមលើនេះ ប្រធានការិយាល័យមធ្យមសិក្សានៃមន្ទីរអប់រំខេត្ត លោក ប្លង់ វណ្ណប៉ាត់ ឲ្យដឹងថា ឯកសារដែលបញ្ជូនមកពីតាមសាលាខ្លះ គ្រាន់តែយឺតយ៉ាវ គឺជាង ៣ខែទៅហើយ ទើបធ្វើឲ្យការងារនេះត្រូវរាំងស្ទះ។ ចំណែករឿងប្រាក់ឧបត្ថម្ភតាមសាលាដាច់ស្រយាលវិញ លោក ប្លង់ វណ្ណប៉ាត់ បញ្ជាក់ថា ដោយសារតែថ្មីៗនេះខាងក្រសួងបានកោះហៅគ្រប់ប្រធានមន្ទីរអប់រំទាំងអស់ ទៅពិភាក្សាគ្នា ដើម្បីឈានទៅបន្ថែមចំនួនទឹកប្រាក់ពី ៤ម៉ឺនរៀល ទៅ ៨ម៉ឺនរៀល ទើបធ្វើឲ្យជួបបញ្ហានេះ៖ «ខ្ញុំធ្វើកិច្ចការហ្នឹងទើបខែបួនទេ គ្រាន់តែយឺតពីគាត់ ៣ខែហើយ។ ខ្ញុំបានជម្រាបគាត់ជារឿយៗ។ ហើយប្រាក់តំបន់ដូចខ្ញុំបានជម្រាបមិញហ្នឹង គឺក្រសួងចង់កែលេខលុយពី ៤ម៉ឺនទៅ ៨ម៉ឺន»។
ទាក់ទងបញ្ហាទាំងនេះ ប្រធានស្តីទីសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី កត់សម្គាល់ថា បញ្ហាប្រាក់ម៉ោង ពេលខ្លះគឺកើតចេញពីគ្រូខ្លះមែន ប៉ុន្តែពេលខ្លះទៀត គឺអាចជាចេតនារបស់ខាងមន្ទីរ ឬក្រសួង ដែលមិនបានយកចិត្តទុកដាក់លើជីវភាពរស់នៅរបស់លោកគ្រូអ្នកគ្រូតែម្តង។ អ្នកស្រីស្នើឲ្យខាងក្រសួង គប្បីពិនិត្យលើបញ្ហាទាំងនេះ ដោយបើកប្រាក់ទាំងនោះជូនគ្រូបង្រៀនឲ្យទាន់ពេលវេលា ពិសេសសុំឲ្យបញ្ចូលប្រាក់ទាំងនោះទៅក្រុមប្រព័ន្ធប្រាក់បៀវត្សរ៍ប្រចាំខែរបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។