គ្រូបង្រៀននៅវិទ្យាល័យកំពង់ធំ ខេត្តកំពង់ធំ បារម្ភថាការវាយតម្លៃលើបេក្ខជន ដើម្បីជ្រើសរើសជានាយកគ្រប់គ្រងសាលា នឹងមិនមានតម្លាភាពឡើយ។ ការលើកឡើងដូចនេះ បន្ទាប់ពីក្រដាសវាយតម្លៃរបស់គ្រូទាំងនោះ ត្រូវខាងមន្ទីរប្រមូលទៅពិនិត្យ ដោយមិនឲ្យពួកគាត់ដឹងនោះទេ។ យ៉ាងណា ប្រធានមន្ទីរអប់រំ បញ្ជាក់ថា ដំណាក់កាលនេះគ្រាន់តែជាការវាយតម្លៃប៉ុណ្ណោះ មិនទាន់បានសម្រេចយ៉ាងណាឡើយ។
ការបារម្ភនេះ កើតឡើងបន្ទាប់ពីប្រធានមន្ទីរអប់រំ អាជ្ញាធរខេត្ត រួមទាំងលោកគ្រូអ្នកគ្រូជាង ១០០នាក់ ចូលរួមវាយតម្លៃបេក្ខជនបីនាក់ ដែលនឹងអាចក្លាយជាគណៈគ្រប់គ្រងសាលាវិទ្យាល័យកំពង់ធំ កាលពីថ្ងៃទី១៧ ធ្នូ។ ក្រដាសវាយតម្លៃ ត្រូវដាក់បញ្ចូលទៅក្នុងធុង ហើយយកទៅខាងមន្ទីរអប់រំបាត់ ក្រោមហេតុផលថាធ្វើតាមនីតិវិធី ដោយមិនបានបង្ហាញជាសាធារណៈនៅចំពោះមុខលោកគ្រូអ្នកគ្រូនៅទីនោះទេ ទើបធ្វើឲ្យគ្រូជាច្រើនយល់ថា នឹងអាចមានភាពមិនប្រក្រតី។
គ្រូបង្រៀនម្នាក់នៅវិទ្យាល័យកំពង់ធំ ក្រុងស្ទឹងសែន លោក ឡេង ប៉េងសរ មានប្រសាសន៍ថា លោកបានតវ៉ាទៅនឹងលក្ខខណ្ឌនៃការវាយតម្លៃនោះ ដោយលោកចង់ឲ្យបង្ហាញលទ្ធផលនៅចំពោះអ្នកចូលរួមទាំងអស់ភ្លាមៗ ពីព្រោះកាលពីពេលកន្លងទៅ ការវាយតម្លៃជ្រើសរើសនាយកសាលាបឋមសិក្សានៅក្បែរនោះ គឺគេបង្ហាញលទ្ធផលពេលវាយតម្លៃនៅទីនោះតែម្តង។ ប៉ុន្តែការតវ៉ារបស់លោក ត្រូវអាជ្ញាធរបដិសេធ ហើយថែមទាំងបណ្ដេញលោកចេញទៅក្រៅទៀតផង៖ «តាមខ្សែនេះខ្សែនោះអ៊ីចឹង។ យើងឮអ៊ីចឹង ចេះតែព្រួយបារម្ភថាវាមិនប្រក្រតី។ នេះជារឿងកំសាក ហើយរឿងកំសាករបស់អ្នកមានអំណាច»។
លោកយល់ថា អាជ្ញាធរ និងខាងមន្ត្រីនៅមន្ទីរ ហាក់មើលងាយទៅលើការវាយតម្លៃរបស់លោកគ្រូអ្នកគ្រូភាគច្រើន ពីព្រោះវាយតម្លៃហើយបែរទៅបើកមើលលទ្ធផលតែក្រុមគ្នាឯង។ លោកបន្តថា ប្រសិនបើលទ្ធផលចេញផ្ទុយពីការចង់បានរបស់ពួកគាត់ នោះមានន័យថា ហៅលោកគ្រូអ្នកគ្រូឲ្យចូលរួម គឺគ្រាន់តែចង់បំពេញតាមលក្ខខណ្ឌរបស់គេប៉ុណ្ណោះ។
ឆ្លើយតបបញ្ហានេះ ប្រធានមន្ទីរអប់រំ យុវជន និងកីឡា ខេត្តកំពង់ធំ លោក ជូ វុនធី មានប្រសាសន៍ថា នោះមិនមែនជាការបោះឆ្នោតជ្រើសរើសទេ ប៉ុន្តែជាការវាយតម្លៃពិន្ទុសម្រាប់បេក្ខជន ដើម្បីឈានទៅគ្រប់គ្រងសាលា ហើយលោកថា ការវាយតម្លៃក៏មិនទាន់អាចបង្ហាញលទ្ធផលភ្លាមៗកើតដែរ៖ «វាយតម្លៃបើពិន្ទុយើងស្អាតបានធ្វើតែបង្ហាញនៅពេលមុខហ្នឹង គឺមិនទាន់បានទេ។ តែបើលោកចង់មើលគេឲ្យមើល»។
លោកបន្ថែមថា គ្រូដែលចូលរួមមាន ១១៨នាក់ ក្នុងនោះគ្រូ ១០៨នាក់ យល់ព្រមតាមលក្ខខណ្ឌវាយតម្លៃ ប៉ុន្តែមាន ១០នាក់ទេដែលមិនស្របតាមគោលការណ៍នោះ។ ដូចនេះ លោកថាមតិភាគតិចត្រូវគោរពមតិភាគច្រើន។
តែយ៉ាងណា គ្រូបង្រៀនភាសាអង់គ្លេសម្នាក់ទៀត គឺលោក ថៅ វិភាគបញ្ជាក់ថា មានគ្រូភាគច្រើនមិនពេញចិត្តចំពោះនីតិវិធីវាយតម្លៃនោះ ប៉ុន្តែពួកគាត់ខ្លាច និងមិនហ៊ានចេញមុខតវ៉ា។ លោកបន្តថា កាលពីថ្ងៃទី១៧ កញ្ញា គឺមានការស្ទាបស្ទង់មតិនៅការិយាល័យអប់រំស្រុកម្តងរួចមកហើយ ប៉ុន្តែខាងមន្ទីរទាមទារយកប្រអប់វាយតម្លៃទៅបើកនៅកន្លែងខ្លួន តែដោយមានគ្រូជាច្រើនតវ៉ាខ្លាំង ទើបដំណើរការជ្រើសរើសនាយកត្រូវផ្អាកទៅវិញ។ លោកយល់ថា ការធ្វើបែបនេះ ហាក់បង្ហាញថា បេក្ខជនម្នាក់ក្នុងចំណោមបីនាក់ ត្រូវបានគេតែងតាំងរួចទៅហើយ ប៉ុន្តែគ្រាន់តែធ្វើឲ្យលោកគ្រូអ្នកគ្រូអស់ចិត្តប៉ុណ្ណោះ៖ «តែបើលក្ខណៈទៅវាយតម្លៃស៊ីសុះស្ងាត់ៗ ទៅបើកក្រដាសវាយតម្លៃមានពិន្ទុស្រាប់នៅមន្ទីរ ហើយយកទៅវាយតម្លៃម៉ាជាន់ទៀតនៅសាលាស្រុក ហើយខេត្តជាអ្នកសម្រេចនោះខាងយើងមិនយល់ព្រមទេ»។
លោកបារម្ភថា ប្រសិនបើរើសអ្នកគ្រប់គ្រងម្នាក់ដែលគ្រូភាគច្រើនមិនពេញចិត្ត នឹងអាចធ្វើឲ្យការងារសាលាត្រូវរាំងស្ទះ ហើយកាន់តែធ្វើឲ្យការបង្រៀនធ្លាក់ចុះ។ លើសពីនេះទៀត នឹងអាចបង្កការលំបាកដល់លោកគ្រូអ្នកគ្រូដែលចេញមុខតវ៉ាខ្លាំង ចំពោះនីតិវិធីនេះនៅពេលក្រោយ។
ទាក់ទងបញ្ហានេះ អនុប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី មានប្រសាសន៍ថា កន្លងមកការជ្រើសរើសគណៈគ្រប់គ្រងសាលា ភាគច្រើនគឺមិនសូវបានជ្រើសរើសចេញពីការពេញចិត្តរបស់លោកគ្រូអ្នកគ្រូនៅក្នុងសាលានោះទេ ប៉ុន្តែបែរជាខាងក្រសួង ឬមន្ទីរជាអ្នកសម្រេចទៅវិញ៖ «ចា៎! អ្នកណានិន្នាការគេហ្នឹងគេឲ្យអ្នកហ្នឹងធ្វើអ្នកដឹកនាំនៅកន្លែងហ្នឹង»។
អ្នកស្រីថា ប្រសិនបើលទ្ធផលចេញមកដោយគ្រូភាគច្រើនមិនពេញចិត្ត ពួកគាត់អាចធ្វើកូដកម្មមិនចូលបង្រៀនបាន លុះណាមន្ទីរព្រមយកមតិភាគច្រើនរបស់ពួកគាត់។ ជាងនេះទៀត អ្នកស្រីចង់ឲ្យក្រសួងចាត់វិធានការលើបញ្ហានេះ ហើយផ្ដល់សិទ្ធិជ្រើសរើសគណៈគ្រប់គ្រងសាលាដល់គ្រូទាំងអស់ ជៀសវាងធ្វើឲ្យប៉ះពាល់ដល់វិស័យអប់រំទាំងមូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។