ក្រោយពីក្រសួងអប់រំ យុវជន និងកីឡា ប្រកាសកែទម្រង់វិស័យអប់រំ ៨ចំណុចមក អ្នកគ្រប់គ្រងសាលាមួយចំនួន ត្រូវបានបុគ្គលិកនៅក្រោមឱវាទលាតត្រដាងពីការប្រព្រឹត្តអំពើពុករលួយ និងបក្ខពួកនិយម។
ស្របពេលគ្នានេះដែរ គ្រូបង្រៀននៅវិទ្យាល័យ ហ៊ុន សែន សំពៅពូន ស្រុកកោះធំ ខេត្តកណ្ដាល ស្នើសុំឲ្យមន្ត្រីមន្ទីរ ឬក្រសួងអប់រំ ចុះអង្កេត និងដោះស្រាយភាពមិនប្រក្រតីនៃការគ្រប់គ្រងនៅសាលាមួយនេះ។
គ្រូបង្រៀនផ្នែកគណិតវិទ្យាមួយរូបបង្រៀននៅវិទ្យាល័យ ហ៊ុន សែន សំពៅពូន ឲ្យដឹងថា នាយក និងនាយករងមួយចំនួននៅក្នុងវិទ្យាល័យនោះ បង្កបក្ខពួក ហើយបំបាត់លុយទ្រទ្រង់សាលា និងលុយប្រជុំក្នុងសាលា។
លោក សឹម សាវណ្ណ គ្រូបង្រៀនមុខវិជ្ជាគណិតវិទ្យានៃវិទ្យាល័យ ហ៊ុន សែន សំពៅពូន បន្តថា អ្នកគ្រប់គ្រងសាលាលាក់ឈ្មោះគ្រូបង្រៀន ៣នាក់ មិនឲ្យបង្រៀន ហើយប្រកាសថា សាលាខ្វះគ្រូ តែប្រាក់ខែគ្រូទាំងនោះមានឈ្មោះបើកលុយរាល់ខែ៖ «លាក់បុគ្គលិកនៅក្នុងសាលារៀនមិនឲ្យបង្រៀន មានតែឈ្មោះនៅក្នុងសាលាបើកលុយ តែអត់មកបង្រៀនឈ្មោះ ចន សុភា។ ហើយមួយទៀត លោកនាយកហ្នឹងគាត់រៀបកាលវិភាគ បុគ្គលណាគ្នាគេ គេរៀបជ្រើសរើសថ្ងៃបង្រៀនបាន ហើយគេទៅប្រកបមុខរបរផ្សេង មុខរបរទីពីរបាន គឺទៅធ្វើការជាមួយនឹងអង្គការ»។
លោកបន្តថា លើសពីនេះទៀត មានការបង្កើនឋានៈគ្រូបង្រៀនម្នាក់ឲ្យឡើងជានាយករង ដោយពុំមានការឆ្លងកាត់ការវាយតម្លៃបច្ចេកទេសការងារ ហើយឲ្យនាយករងនោះបង្រៀនមុខវិជ្ជាគណិតវិទ្យា ដោយជ្រើសរើសយកតែសិស្សពូកែៗទៅបង្រៀន។ លោកថា ក្រៅពីនេះ អ្នកគ្រប់គ្រងសាលា បានបំបាត់លុយជំនួយទ្រទ្រង់សាលាច្រើនលានរៀល និងលុយក្រសួងអប់រំ ដែលផ្តល់ឲ្យ១ឆ្នាំៗសម្រាប់បើកឲ្យគ្រូនៅរាល់ពេលប្រជុំម្តងៗចំនួន ៥.០០០រៀលក្នុងម្នាក់ទៀត។ ប៉ុន្តែ ក្នុងពេលប្រជុំ និងរាល់ពេលបិទបញ្ជី ថ្នាក់ដឹកនាំជំរុញឲ្យគ្រូៗក្នុងសាលា ចុះហត្ថលេខាទទួលស្គាល់លើក្រដាសចំណាយទៅវិញ៖ «មួយខែៗឃើញតែឲ្យពួកខ្ញុំស៊ីញេបុង តែបុងនោះគឺមានតែក្រដាស»។
បំភ្លឺតបនឹងការចោទនេះ នាយកវិទ្យាល័យ ហ៊ុន សែន សំពៅពូន លោក ជឺ វណ្ណា ឲ្យដឹងថា អ្វីដែលនាំឲ្យមានទំនាស់ គឺមកពីការបែងចែកកាលវិភាគបង្រៀនបណ្ដោះអាសន្ន នៅពេលសិស្សប្រឡងធ្លាក់បាក់ឌុបថ្មីៗមិនទាន់មកដាក់ពាក្យសុំរៀនថ្នាក់ទី១២ឡើងវិញ។ លោកថា នឹងបែងចែកកាលវិភាគបង្រៀនត្រឹមត្រូវ នៅពេលសិស្សចូលរៀនជាប់លាប់។ លើសពីនេះទៀត លោកសន្យាថានឹងផ្តល់សិទ្ធិដល់ លោកគ្រូ សឹម សាវណ្ណ ឲ្យបង្រៀនមុខវិជ្ជាគណិតវិទ្យាសម្រាប់សិស្សថ្នាក់ទី១២ និងថ្នាក់ទី១១។ លោកនាយកបន្តថា ចំពោះ អ្នកគ្រូ ចន សុភា ដែលអវត្តមានច្រើនឆ្នាំមិនមកបង្រៀន ព្រោះគាត់ឈឺ ទើបសាលាជួលគ្រូបង្រៀនជំនួស ដោយយកប្រាក់ខែ អ្នកគ្រូ ចន សុភា បើកឲ្យគ្រូជំនួសនោះ៖ «ក្រសួងដាក់ទិសដៅមក ព្រោះគាត់ឈឺ ហើយឲ្យខ្ញុំធ្វើម៉េច។ គាត់ឈឺហ្នឹង មិនមែនថាគាត់យកប្រាក់ខែទេ គាត់ជួលគ្រូចូលនិវត្តន៍ហ្នឹង ឲ្យបង្រៀនជំនួសគាត់ ឲ្យប្រាក់ខែរបស់គាត់»។
ចំណែកនាយករងវិទ្យាល័យ ហ៊ុន សែន សំពៅពូន លោក ខួយ សុភាព ឲ្យដឹងថា លោក សឹម សាវណ្ណ បង្រៀនសិស្សថ្នាក់ទី១២ ពេលប្រឡង គឺសិស្សធ្លាក់គណិតវិទ្យាច្រើន ទើបគណៈគ្រប់គ្រងសាលាបន្ថែមគ្រូនាយករងឈ្មោះ ឈាន លាងហួរ ឲ្យបង្រៀនសិស្សថ្នាក់ទី១២ ជាមួយ លោកគ្រូ សឹម សាវណ្ណ។ លោកបន្ទោសថា តាំងពី លោកគ្រូ សឹម សាវណ្ណ ផ្ទេរពីវិទ្យាល័យផ្សេងចូលមកបង្រៀននៅវិទ្យាល័យ ហ៊ុន សែន សំពៅពូន គឺលោក សឹម សាវណ្ណ តែងតែបង្ករឿងចាប់កំហុសគ្រូមិនមកបង្រៀន កំហុសចំណាយលុយកាក់ក្នុងសាលា កំហុសបច្ចេកទេសបង្រៀន ការបែងចែកកាលវិភាគ ជាដើម៖ «សម្រាប់គ្រូ សាវណ្ណ នៅក្នុងសាលាខ្ញុំបើសិនជាមានគ្រូគ្រប់គ្រាន់ ខ្ញុំអត់ឲ្យបង្រៀនទេ តែវាអត់គ្រូ គឺសាលាខ្ញុំវាអត់គ្រូសោះ»។
ទាក់ទងការចោទប្រកាន់នេះ អ្នកនាំពាក្យក្រសួងអប់រំ យុវជន និងកីឡា លោក រស់ សាលីន ថ្លែងថា ក្រសួងមិនទាន់បានទទួលពាក្យបណ្ដឹងពីគ្រូបង្រៀននៅវិទ្យាល័យ ហ៊ុន សែន សំពៅពូន ប្ដឹងពីកំហុសថ្នាក់ដឹកនាំនៅឡើយ៖ «ក្នុងករណីដែលមានភាពមិនប្រក្រតី ហើយមានលិខិតស្នើសុំ និងមានបណ្ដឹងណាមួយជាមូលដ្ឋាន ក្រសួងនឹងពិនិត្យមើលស្ថានភាព និងហេតុការណ៍ជាក់ស្តែង ហើយបញ្ជូនក្រុមអធិការកិច្ចដើម្បីចុះទៅពិនិត្យ»។
លោក សឹម សាវណ្ណ ឲ្យដឹងថា គាត់ទើបចូលមកបង្រៀននៅវិទ្យាល័យ ហ៊ុន សែន សំពៅពូន រយៈពេល ៣ឆ្នាំទេ តែគាត់ឃើញថ្នាក់ដឹកនាំក្នុងវិទ្យាល័យនោះប្រព្រឹត្តកំហុសច្រើន ដែលគួរតែក្រសួងអប់រំ យុវជន និងកីឡា បញ្ជូនក្រុមអធិការកិច្ចចុះពិនិត្យគ្រប់សាលា ដើម្បីកែលំអកំហុសថ្នាក់ដឹកនាំឲ្យស្របនឹងការប្រកាសកែទម្រង់វិស័យអប់រំ ដែលកន្លងមកច្រើនកើតមានអំពើពុករលួយ និងបក្ខពួកក្នុងការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។